Boargemaster

Tongersdei wie de politike kwis yn ús gemeente. Yn de oanrin hjir nei ta mochten de ploegen harren foarstelle. De measten hiene gjin lêste fan falske beskiedenheid. De moaiste útspraak wie fan Tjerk van der Pol. Hij sjocht him sels as boargemaster fan Littenseradiel yn 2020. Dêr kinne je om spytgnyskje, der kinne je om gnize, der kinne je om laitsje en miskien komme sommigen wol net mear bij fan de wille.
Mar ik net, ik nim dit serieus. Want ik haw al ris earder immen moete dy't sei dat hij boargemaster wurde woe en it no ek noch wurden is.
It sil earne yn 1996 west ha, doe't ik mei in kollega fan doe fan in gearkomst werom kaam en wij it hiene oer it libben en de ambysje. "Ik wol boargemaster wurde", sei hij sûnder in kaam te krijen. "Al is it mar fan Skiermuontseach".
Op syn fraach wat myn ambysje wie, moast ik it antwurd skuldich bliuwe: ik sjoch wol.
No sa'n 20 jier fierder bin ik twa banen en bazen fierder en ik haw it ek no wer goed nei de sin.
Mar Fred dy sette syn paad út. Earst riedslid, doe wethâlder en no boargemaster fan Frjentserteradiel. Per 1 desimber.
En nei Fred hat no ek Tjerk syn ambysje. Efkes tinke; Liemburg fan 1952, soe mei 65 ophâlde kinne, mar is as sosjaliste solidair mei de jongeren dy't ek sa lang trochwurkje moatte en sij giet troch oan 67 jier: 2019. En op dat momint is der wer in diskusje oer weryndieling en ek no wol sij ús wer behoedzje foar it grutte gemeente syndroom. En sa nimt sij yn 2020 ôfskie fan de lytste gemeente fan Nederlân en nimt Tjerk van der Pol it stokje oer.
En ik: ik haw no ek in doel steld. Ik wol in koart ferhaal skriuwe. Dat ferhaal wol ik ynstjoere foar de Rely Jorritsmapriis. En graach ûntfang ik dan de priis út hannen fan boargemaster T. van der Pol, mar ik mei him Tjerk neame. Ik haw noch wol efkes tiid, mar Tjerk sil takemjier fêst op in list fan in politike partij stean. Syn twdde stapke nei de politike kwis.

Jim litte it raar sitte

Beste Wommelsers,

It fisyplan fan Wommels 2010-2020 is krekt lyn presintearre. At jim it goed lêze, dan komme jim ta de konkluuzje dat jim as Wommelsers wol aardich tefreden binne en dat de pylken foar de takomst rjochte wurde moatte op behâld fan de dingen dy't der al binne.
Nei in oantal muzykjûnen konkludear ik dat it behâld fan goeie dingen net jildt foar muzyk en teater, sis mar kultuer.
De Troanies, in aktive groep jongeren dy't rockjûnen organiseart, sjogge se jim te min, en dêrtroch binne der te min minsken dy't de kassa passeare. En rop net : ik wist it net. It hat oeral stien en oanplakt west.
Bij Tryater litte jim it ek hielendal ôfwitte. Soms wol in heal folle seal, mar foaral mei minsken fan bûten. It is no al sa fier dat Tryater dit seizoen net in nij stik nei Wommels bringt, mar it âlde Arendz spilet Arents bringt.
En doe wie dêr koartlyn Ted Roozendal dy't Marlene Dietrich spile. Jehannes Hibma krige triennen yn de eagen fan de opkomst en skreau dêr al oer hoe teloarstellend hij dat fûn.
En dan binne dêr de Sneinslûden: Ferline jier wie it jier fan prebearjen, mar no moat it der wol stean. Twa prachtige muzikale middeis/jûnen hawwe der no west en it oantal Wommelsers dat lâns komt, is op in pear hân fol te tellen. En at der te min Wommelsers binne, dan binne der ek te min minsken.
En dan doarre sommigen fan jim ek noch te roppen dat der neat te dwaan is yn Wommels.
Der is fan alles te dwaan yn Wommels, mar je moatte de doar der wol foar út.
At je op de fisyjûnen optekenje litte dat it aksint lizze moat op it behâld wat wij hjir hawwe, dan sille wij der sels ek wat oan dwaan moatte.
Dat betsjut op 'e tiid yn eigen doarp wat keapje en nei kulturele dingen gean, lykas it korps, de toanieljûnen en al dy muzykjûnen dy't der binne.
Of fiele jim no al te âld om út te gean?

De groetnis fan in âld man mei in jong hert en jong gefoel
Aant

In brief

Dat minsken noch brieven skriuwe ferbaasd mij. Dizze wike kaam yn it nijs dat Anton Geesink in brief skreaun hat nei Maradona. Dizze eardere goeie fuotballer en hjoeddeiske net serieus te nimmen koach fan Argentinie hie wat rare kreten dien oer de parse. Geesink begrypte dat allegear hiel goed. Wij litte Geesink mar yn de waan dat Maradona de brief iepent, mar wij witte wol better. Anton Geesink hat wol wat mei brieven.

In goeie wike

Kom krekt bij de brievebus wei. In geweldich berjocht fan de Postkoade lotterij. Ja, ik doch mei, allinne fanwege de buorlju. Ik soe it net oansjen kinne dat de hiele buert de priis hat en ik net. Ik hannelje dus krekt sa't it betocht is, dêrom dogge der ek safolle minsken mei. 8731CV is net in gelokkige postkoade oant no ta. Noch net in priis wûn. Nee, ek gjin bakje iis, te heljen bij Murk de slachter. Mar no haw ik it lok oan myn side. Want der stiet yn de brief: "u bent geselecteerd door de centrale computer om kans te maken op 1 van de 500 studioplaatsen".
Neffens it skriuwen in deiarransjemint , mei in lunch en kâns om neist Linda de Mol te eingjen yn de finale. Der sit in "Uitrijkaart Parkeergarage" bij. Wat in bofkont bin ik. Allinne spitich dat ik nea oan geloksspultsjes en shows foar tv meidoch ek al kin ik in miljoen winne. Nee, dit wurdt neat. Helaas kin ik jim de kaart net oanbiede, hij is persoanlik. Foardat ik de brief yn de griene kontainer smyt lês ik him noch ien kear troch. Datum fan it feest: 11 desimber 2008. In flaterke sille wij mar sizze.
It oare gelok helle ik dizze wike bij Albert Heijn wei. In sparlampe, oanbean troch dy selde Postkoadelotterij. Neffens it omslach normaal 25 euro, mar nijsgjirriger wie de tekst: besparret op syn meast 425 euro yn 20 jier. Dat is pas in finansjeel foardiel. Ik haw him der gelyk yndraaid, oansetten en de skeakelaar fuorthelle. Want at ik 75 bin haw ik mar moai 425 euro fetsjinne.
Noch mear gelok dizze wike: gjin meksikaanse griep, mar twa kear it reinpak oanhân, de partij wûn op training en ik hoechde mar ien kear nei de doar bij sint marten.

Rampen kome...kent skele ju

Doe't ik yn it ferline mei de bus nei Ljouwert reizge, riden wij bij de Boksumerdaam lâns. En dêr stie in elektrisiteitshokje mei dêrop de tekst: Rampen komen.....kent skele ju. 6 novimber gyngen der wer hiel wat sirens ôf. En tocht gelyk oan de krekt neamde tekst en skriuw it folgende stikje foar stjoerder.nl

Wat in ramp
Wommels, Freed 06 Novimber 2009, 16:32 oere
Ynstjoerde kollum troch Aant Hofstra

Dat is efkes skrikken freedtemoarn. De sirenes geane ôf. Yn hiel Fryslân. En it is net de earste fan de moanne ek net freed de tretjende. En foardat ien him ek mar ôffreget wat der is, geane alle remmen los.

Alle helptsjinsten wurden rjochting Dronryp delegeard. Ambu’s dy’t ûnderweis binne mei oare pasjinten wurde leechhelle, brânwachten dy’t dwaande binne mei oare brannen meie de boel de boel litte en bonnen útskriuwende plysjes meie echt oan de bak. De ANWB melt in file mei in heech blau swaailjocht gehalte rjochting Dronryp.

Boargemasters fan alle gemeenten wurde op harren lintsjeknipdei nei it gemeentehûs dirigeard om neffens it protokol “grutte rampen” lieding te jaan oan elkenien dy’t mar harkje wol. Sporthallen wurde ûntromme en elkenien moat binnen bliuwe en harkje nei de radio mei it needpakket bij de hân.

Omrop Fryslân, de kranten, stjoerder.nl en alles wat filmje en skriuwe kin fljocht nei Dronryp. Foar sa fier se it rampgebiet noch berikke kinne. Bij de Omrop setten se gelyk in oantal minsken efter de mikrofoan dy’t it Nederlâns wat machtich wiene. En ferslachjouwers Hayo B en Gerrit H wurde yn oarlochpakken hesen om ferslach te dwaan op de lokaasje mei gefaar foar eigen libben.

Balkenende wurdt belle, Obama krijt in sms-ke en de loftmacht stjoert 4 F-16 fleantugen de loft yn. Want it is ûnderwilens dúdlik. Der is in slang kapot gien en der is wat saltpetersoer lekt yn en bij de sûvelfabryk. Ferfelend at je it ynademje dus mûle en noas ticht, soe it adfys wêze kinne.

Op it selde stuit wurdt ek noch in waarsintrum ynrjochte mei Piet Paulusma oan it haad dy’t assisteard wurdt troch wyndeskundigen, wolkdeskundigen en atmosfeardeskundigen. Hiene wij hjoed te meitsjen, mei in súdweste-, in flap- of en hurde wyn. Waarkompjoeterdeskundigen wurde ynhierd om it paad fan de gifwolk te folgen.

En yn de studio fan Omrop Fryslân is it in kommen en gean fan oare deskundigen: in rampedeskundige, in sâltpetersoer deskundige, in gifwolkdeskundige en in slangdeskundige.

Psychiaters, psychologen, haptonomen en gebedsgenêzers stiene klear om help te bieden.

Nei in goed oere wurdt it sein master jûn. Omrop Fryslân besiket it noch in oere te rekken mar de helpferliners taaie ôf. Ambu’s sykje de earder út de auto smiten ferwûnen wer op, brânwachten geane wer nei in heabroeike en de boargemasters slaan harren sels op de boarst want dizze ramp hawwe se mar moai tsjingas bean.

En Cambuur siket noch kontakt mei de KNVB en mei Excelsior. Kin it jûn allegear wol trochgean? Is de feilichheid fan ús spilers en ús hûnstrouwe publyk fol garandearre. “Ja”, seit de KNVB. “Geen probleem”, sizze se bij Excelsior, “zo iets gebeurd hier dagelijks op de Maasvlakte, daar worden wij niet anders van.”

En jûn en moarn dan komme de fragen. Earst komme der allegear suggestive fragen fan de Omrop: wie dit net wat oerdreaun, werom net dit, werom net dat.

En dan komme der fragen fan ien fan de fraksjes yn de Steaten: wêr wie de kommisaris? En de fragen fan Atsma of de Rouwe yn de Twadde keamer sille fêst ek wol wer hout snije.

En ik? Ik bliuw ek mei in fraach sitten. Hoe is it dochs mooglik dat troch ien ferkearde druk op de knop der sa’n grut sirkus optúgd wurdt ?

Aant

Reklame

Lit mij no mar ris earlik wêze. De bledsiden fan adfertinsjes fan minsken dy't ferstoarn binne slaan ik nea oer. Ik ha sa wie sa wol wat mei nammen en boppedat je moatte dochs ek wat bij bliuwe. Nijsgjirrich yn adfertinsjes fyn ik ferwizings nei lieten. En dan net de psalmen of gesangen mar de moderne lieten. Lieten dy't wat sizze oer de persoan, oer de ferhâlding dy't men mei elkoar hie en soms oer it werom. Meast knip ik dy út en ik sjoch se sa no en dan troch. Blof, Tom Waits, Bruce Springsteen, Bob Marley, Van Morrison en Gerrit Breteler. Se hawwe allegear wat besongen wat immen rekket. Moai is dat.

Minder moai binne de reklame útingen yn deagean adfertinsjes. Dêr stoar ik mij allemachtich oan. Efkes reklame meitsje oer de dea hinne.
Sa as dizze. It mankeart der noch krekt oan dat men in hiele moaie kolleksje begraffenisklean hat. Spesjaal foar dizze gelegenheid.

Geitewollensokken

(Sis mar Durk) Skeringa is de man fan de geitenwollen sokken. No't it wat minder mei de man giet, wurdt dat stik fan saken der hieltyd bijhelle as in negatyf punt. Of omdat it sa apart is. It is dochs te mâl foar wurden dat in sok in ûnderwerp fan petear is. Dat selde jildt foar klean. Ik sis altiten it giet om de minsk en net om hoe't er der bij rint.
Mar werom nei de sokken. Neffens in algemiene omskriuwing yn de enseklopedy beskermt in sok tsjin kjeld en it foarkomt it de wriuwing tusken foet en skoech.
(Sis mar Durk) Skeringa dy woe fansels net yn de kjeld sitte en dêrom hie hij altyd lekkere waarme geitenwollensokken oan en dêrneist wurke hij mei hiele skerpe woekerpolissen dy't der foar soargen dat hij de kommende 280 jiernet yn de kjeld hoechde te sitten. Dat oaren dêrtroch wol yn de kjeld komme te stean, is eigen skuld: hiene se mar geiten wollensokken keapje moatte ynstee fan woekerpolissen.
Geitewollensokken hat net allinne in letterlike betsjutting. Figuerlik hat it folle mear betsjutting. De geitenwollensokken kultuer komt út de jierren 70 en it wie de tiid fan de flowerpower fan 'vrijheid, ongehoorzaamheid, vrolijkheid en hoop'. In moaie tiid, soe ik sa sizze.
Ik kin mij dêr hielendal yn fine. Ja, slimmer noch ik fyn mij sels in produkt fan de geitenwollesokkentiid.
Ik haw sels trije ferskillende soarte sokken ta myn beskikking.
1. De enkelsokken foar de simmer en ja seker ek yn de sandalen.

2. De SDS fuotbalsokken út de jierren 70, dy't neffens elkenien foar gjin meter stean mar symboal steane foar it âlde SDS. Ype Burggraaff en ik sille, sa lang wij fuotbalje, dy sokken oanhawwe want wij kinne de sokken der noch goed ynsette mei sokke sokken oan.

3. De legersokken: at dy fan geitenwol makke binne betwifelje ik mar dat is it ienige fan myn legerútrêsting (lichting 75-1)wat mij nea tsjin stien hat. Ik draach se mij genoegen en American Base hat se altiten yn foarrie, yn de selde kleur en maat.

En (sis mar Durk ) Skeringa dy hat wierskynlik safolle ôfdroegen mar noch net fersliten geitenwollensokken lizzen, dat syn hiele kapitaal (sa'n 46 miljoen euri's, (bron Pieter L)) der maklik yn past. En (sis mar Durk) Skeringa is wol hiel raar fan syn sokkel fallen.
Mar efkes rocke op sokken soe ik sa sizze.

God of de duvel

"Ik ben God niet" sei Louis van Gaal dizze wike neidat syn Dútske ploech ferlern hie. In goeie wike nei it presintearen fan syn boek "de Totale Mens" wie der mar ien dy't efkes tocht dat er God wie. Dat wie Louis sels. Moai dat der nei in wike ta ynsjoch kommen is dat God wierskynlik de totale minsk makke hat en dat hij allinne mar in boek skreaun hat wêryn hij in totale minsk betocht hat nei syn syn idee. En dat ynsjoch fan Louis van Gaal kaam nei in nederlaach en net yn ferbân mei de thomasfiering. Want hjoed wie dat it tema yn in soad tsjerken. Wat ik der fen begryp is dat je op dy dei je twifel wat mear sjen litte meie as oars. "Thomasvieringen zijn er voor twijfelaars met verlangen en voor gelovigen met vragen". Ik wit net at ik wol ta ien fan dy groepen hear, mar it is wol in nijsgjirrich punt.
Op dizze dei fan de Thomasfiering gong ik net nei tsjerke mar nei Sult. It stik Heksershol waard opfierd op in heasouder fan in pleats bij Molkwar.
De prachtige (technyske) fynsten fan Piter Stellingwerf, de aparte lokaasje en it moaie Frysk makke dit stik ta in bysûndere erfaring.
Ek no wer. It wie in tryst ferhaal, wêr't net God de haadrol spile mar de duvel.
It stik wie in frije fertaling fan in ferhaal fan de bruorren Halbersma en stiet yn Rimen en Teltsjes.
En at van Gaal hjir bij west hie, dan hie der fêst fan sein, dat hij it oerfrysk allegear poerbêst ferstean koe en dat hij seker foar de duvel net bang is. Dit froutsje ek net.

Riejouwers

Ik haw it net sa stean op riejouwers. En foaral net at it minsken binne dy't in flinke steat fan tsjinst hawwe bij de selde organisaasje. Nim no dy direkteur fan it Friesland College. Goed syn bêst dien, earst ek wol wat delsetten mar yn it lêst net mear goed foar de ûntwikkeling fan de skoalle. Sokke minsken geane net sels fuort, se krije ek gjin ûntslach mar wurde riejouwer. Fansels krije se in sek jild mei.
Foppe de Haan wie ek riejouwer bij sc Hearrenfean. Sa'n twa en heale dei yn de wike. In bytsje bemuoie mei dit en dat. De skoalmaster wat úthingje en tige frijbliuwend allegear. Riejouwer fan Emmen (stiet ûnderoan) en riejouwer bij it Fean (stiet hast ûnderoan)
Dat Foppe graach op it Wk yn Afrika wêze wol, begryp ik wol. De kâns dat se him freegje as analist wie net sa grut want hieltyd mear minsken fine him net mear echt te leauwen. Dus hoe soargje je dan dat je der wol bij binne en dat je foar en tidens it WK wer yn de belangstelling steane en de alleswitter wer úthingje kinne?
Je wurde trainer yn Sud Afrika. 8 moannen lang. De frou seach it wol sitten. De bern ek wol. Want je regeleje der fansels moai wat tikkets bij sadat de famylje it WK ek meimeitsje kin. Ja Foppe dy is der in master yn om it ek allegear te ferdigenjen. Sa'n kâns, altyd in kear nei it bûtenlân wollen.
En sc Hearrenfean dan? Dy hawwe bekind makke dat de fakatuere net wer ynfold wurdt! Soks seit genôch.

Tiid

Wol ynspiraasje mar te min tiid, is de reden dat der net folle aksje op dizze blog is. Mar wylst ik dit skriuw moat ik mij sels gelyk mar wer tsjinsprekke. Gjin tiid hawwe is flauwekul. Gjin tiid der foar meitsje wolle omdat oare dingen wichtiger binne, is it neffens mij. (momintsje: efkes de radio sêfter sette,want fan rap rekket myn kop oerstjoer).
At je it iene dogge kinne je it oare net dwaan. At je op fuotbal sitte, dan is de bedoeling dêrfan dat je sneons of sneins fuotbalje wolle. En tsjintwurdich liket it der op dat foar sommigen dat allegear hiel frijbliuwend is. Want der binne ek oare dingen dy't sa nedich op sneon moatte. Dat je as teamsporter oare dupeare dat wurdt faak net realiseard. Je eigen ploechgenoaten mar ek tsjinstanners. Hearemetyd, want binne der dit seizoen al in soad fuotbalwedstriden ôflast om dat der te min spilers binne.
Team sport is mear as tiid hawwe, it is foaral tiid der foar nimme wolle.
Dus dat der hjir efkes neat bij kaam te stean, hie neat mei tiid te meitsjen. it hie mij sleauwichheid te meitsjen en oare prioriteiten. Kubaard om, Hinnaard om, Spannum om, Tsjom om, allegear rûntsjes dy't mij it meast ynspireare om wer wat te betinken.
Oh ja, juster hie ik samar wer tiid oer: it fuotbaljen tsjin Wardy gie net troch. Krekt, te min spilers. En dat hie oars gau 4 oeren koste. Dy koe ik dus moai brûke om Hinnaard om te gean en dit ferhaaltsje te betinken. En ik beloaf betterskip!!

Minne Piet,

Nei de safolste misser wurdt it dan dochs tiid datst op kursus giest. In kursus om foar te sizzen at ik ek reinen giet. Nee, do hoechst neat te witten fan depresjes bij de Baliaren, fan tongerbuien mei bliksemsketen, fan wynpûsten mei útsjitters, fan barbekjoewaar en hegedrukgebieten.
Nee Piet, asto ús waarman bliuwe wolst, of leaver sein de waarman fan it iepenloftspul fan Jorwert dan wurdt it tiid datst in kear op de buienradar sjochst. Te finen op www.buienradar.nl. En dan is it net dreech om te sjen at it wiet of droech wurdt. Dat griene is it lân, it donker blaue is it wetter, it seewetter wol te ferstean want dat ljocht blaue mei soms wat donkere plakken deryn en soms sels read dat is ek wetter. Reinwetter wol te ferstean. En at wij hiel Fryslân net mear sjogge dat betsjut dat dat it reint. Dus at sij út Jorwert belje, hoe't it mei it waar komt dan earst efkes op buienradar sjen en ast sa'n grut reingebiet omkommen sjochst dan seist gewoan tsjin de foarsitter: ik haw op de buienradar sjoen en it kin net. Dêrmei foarkomst dat net in pear hûndert minsken fergees nei Jorwert komme, en op it momint dat it ôflast wurdt sizze: "ik hie fannemiddei op buienrader al sjoen dat it net droech bliuwe soe"
Minne Piet, ik bin de beroerdste ek wer net. It is no hast 22 oere op de selde jûn en it eazet hjir yn Wommels. Do siest der oeren neist. Haw foar dochs dij in prachtich klipke útsocht fan Norah Jones. In klipke dat ek giet oer in depresje en mei in tapaslike titel: Rain.

Neat bij neat

Hearlik is dat, moarns in krantsje lêze. In heal oerke tiid der foarút lûke. Mar it is minder hearlik at dy krante De Telegraaf hyt. Raar ek dat ik dy Telegraaf dan komme lit. Fanôf myn jeugd haw ik wat tsjin dy krante. Bij útsûndering sil ik dêr ien fan keapje. En no samar 6 wiken yn de bus. Hie wat "wensbonnen" en de earsten dêrfan hie ik omsetten yn in tydlik abonnemint op in krante. It AD mei syn moaie sportbijlage is dan myn favoryt. Mar bij de lêste ynskriuwing die bliken dat it AD net mear meidie. Dan mar Trouw. Dy die ek net mear mei. Dus kieze út NRC Next of de Telegraaf. Ferkearde kar dien. Freselik nijs. Oerdreaune koppen. Shownijs op papier. Sensaasjenijs. It byld dat ik altiten al hie fan dizze krante wurdt alle moarntiden wer befestige. In 20 minuten út! En dan haw ik it rêstich oan dien. In moarnskrante jout mij gewoanwei enersjy, mar dizze net. Dy set mij oan ta it skriuwen fan dit stikje. Net in geweldich stikjje, mar dat komt dus troch dy Amsterdamse krante. Echt it is hielendal neat.

Let

"It kin woansdei wolris let wurde", sei ik hjoed tsjin Jellie. "Woansdei?
Let?" Hoe sa letter as oars? It is dochs altiten al let?" "Ja maar, it kin no wolris hiel let wurde; want neist it feit dat de keatsers altyd de want nei elke útslachbal op nij fêstmeitsje moatte, ek al ha se de bal net iens slein, en neist it feit dat se nei elke opslachbal wat drinke moatte, komt der no de sinnebriltaktyk bij. En dy is net snelheidbefoarderjend, kin ik dij sizze". De sinne briltaktyk waard sneintemiddei út de doeken dien troch it partoer fan Renze Pieter Hiemstra. Se reitsje dit jier net in bal, winne hast gjin prizen, hiene sûnder sponserkontrakt ek allang net mear meielkoar keatst, mar dat partoer siket no syn heil yn de sinne bril. Neffens Hiemstra hat de bril sa'n 10 ferskillende setsjes brilleglêzen.
Foar allegear ferskillende omstandichheden. Sa is der in bril foar de man op de boppe at dy yn de sinne stiet te sjen en de tribune sit fol mei minsken yn ljochte klean (bril b1). Mar at it perk ek yn de sinne leit dan moat bril b2 op en at de sinne yn in hoeke fan minder as 67 % stiet en Geert van Tuinen is efkes stil dan kinne je better bril b3 opsette. Dy bril sil dus net folle brûkt wurde. Sa is der in bril foar at de sinne skynt en it reint (de reinbôge bril) en bril 6 kinne je it beste opsette at de minsken de triennen net sjen meie nei it ûnferwachte ferlies. Sa sil it woansdei wat wurde mei de taktyske koach op de boppe en de brilkoach (Hans Oars wa anders) oan de siidline. Mei trije nijmoarderige brillen mei elk 10 ferskillende glêzen en in spegel om dochs efkes te sjen at it wol stiet. It is no de bril wêr't se it yn sykje mar der komt in tiid dat bij elke slach
sjoen wurdt at se de goeie bûsdoek wol yn de bûse ha.

Miggen en in vuvuzela

Yn Gaasterlân hawwe se lêst fan miggen. Lêst dat betjut yn dit gefal dat se om je hinne fleane,in freeslik sûzend gelûd meitsje at se mei harren allen binne en dat se soms stekke. Migge spul foardat se stekke, eardopkes en miggespul neidat se stutsen hawwe, binne dan nedich. In gewoane miggeklapper helpt dan net. Fragen fan de FNP yn de rie en in stikken yn de krante binne it gefolch.
Bij it fuotbal yn Súd Afrika ha se lêst fan vuvuselas. Dat binne toeters dy't at der in hiel soad tagelyk oansteane, se it gelûd fan in grutte swerf miggen ha. It sûzet je oan alle kanten en der komt gjin ein oan. It ferfelende is: hjir is neat oan te dwaan. Ja miskien in miggeklapper, mar de fraach is at de ûntfanger fan de klap net in klap werom jout.
At dizze toeters yn Nederlân bij it fuotbale tastien wurde, is it aansens gau dien mei de taskôgers. Je wurde der echt gek fan. Tidens Brazilie Sud Afrika steurde it mij sa dat ik nauweliks genietsje koe fan it oars wol leuke kommentaar fan Frank Snoeks. It publyk heare je net mear (útsein at Booth oan de bal wie).
Dus ynnimme al dy toeters, ferbiede fanôf tiisdei. En moandei dan? Dan op nei Gaasterlân, en ien dei toeterje mei syn allen. Neffens mij wurde dy miggen hartstikke gek fan dat lûd en seker fan it feit dat oaren harren lûd noch better, lûder en irritanter dwaan kinne. En sij sille flechtsje nei de Noardeastpolder en de Iselmar. Of se falle fan ellende allegear dea del. At dat sa is, dan wol ik fan it simmer ek in toeter. Sa no en dan efkes blaze....

Profesjonaliseare

Profesjonaliseare, in lestich wurd om te typen en it is sels de fraach at it der no goed stiet. Yn dit gefal kin mij dat net folle skele. De rafaasje dy't dit wurd oanbringt yn de sport wurdt hieltyd grutter. Sjoch nei it keatsen. Neist de nap hat de profesjonalisearing der foar soarge dat it keatsen as attraksje hurd efterútgien is. Want hat dy profesjonalisering no safolle oplevere: sponsering (in gemeente it Bildt dy't sels al meibetellet oan in partoer, it moat net gekker wurde), bettere trainingsfasiliteiten, sponserauto's, websiden, je kinne it sa raar net betinke.
Mar better..... Nee!!! It is no al sa fier dat partijen net mear oanjûn wurde mei it oantal boppeslaggen (sa goed wie de partij) mar mei in oantal bûtenslaggen(sa min is de partij).
No miene de ljeppers ek dat sij in berop dwaan moatte op dat rare wurd dat ik no net wer typ. Sij wolle dit, sij wolle dat. Mar sûnt se dat roppe, is it nivo fan de topklassers flink sakke. Bin der dit jier al twa kear west en je kinne tsjintwurdich mar better net te ticht bij it wetter sitte, want je wurde dweiltrochwiet fan al dy tewetterlittingen.
Ophâlde mei dat geseur oer sponsers, gewoan better ljeppe en graach fierder springe as de pols lang is.

Helden van de rock

It wykein fan de Wommelser feesten sit der wer op. Ik haw net folle mei sokke feesten. Nei dy freeslike toetermuzyk freedtejûn, dy't je gelokkich bûten de tinte net echt goed heare koene, wie ik bliid dat ik foar sneontejûn in kaart besteld hie foar de Heroes of Rock. Ik wie wat ôfgien of de ynspirearende namme, wat ôfgien op it moaie affysje en de loofjende teksten foarôf. It soe adembenimmend wurde, mei stevich sjongwurk en it nedige gitaargeweld. In gok want it wie it earste optreden die efterôf bliken.
Teater Romein wie net hielendal fol en dat wie spitich, want de groep sette in geweldige rocksjo del , mei fantastische muzyk.
Net ien momint fan de twa oeren dat it ferfeelde, de iene rock hit nei de oare waard de seal yn batst. Allegear nûmers fan bekinde artisten: Van Halen, Guns en Roses, ACDC, Whitesnake, Deep Purple, Alice Cooper, Bon Jovi en Iron Maiden.
In stel goeie muzikanten dy't harren foar dizze gelegenheid Heroes of Rock neame en dy't nei it eardere Pink Floyd Projekt sjen litte dat je mei in tema iets moais delsette kinne. In tip foar de sealhâlders, dy't wat oars wolle as Top 40.
Yn augustus op it Dicky Woodstockfestifal yn Stienwyk en yn Aldeboarn.

Seure

7000 klachten nei ien dei eksamen. Dat wie moandei 18-5 serieus nijs fan it ANP. 7000 jongelju dy’t har net goed taret hawwe op it eksamen en dy’t dan de skuld sykje bij oaren en oare dingen.
Ik bin wat fan de generaasje net seure. Dat jilde seker foar it eksamen dwaan. Je diene eksamen en nei ôfrin dan seine dat je it dreech fûnen, dat it swit je betiden útbruts en dat je de kop der net altyd goed bijhâlde koene.
Dat seine je tsjin je klasgenoaten, dy befestigden dat of hiene oare erfaringen en dat wie it dan. At ik thús kaam en se fregen hoe’t it west wie, en ik neamde it wurdsje dreech dan waard dat hurd ôfdien mei de fraach: hast wol genôch dien.?
At ik sei dat it benaud wie yn it lokaal wie dan wie it antwurd: better as te kâld. En dêrmei wiene myn klachten ôfdien.
At je tsjinwurdich ek mar iets konstateare bij it eksamen dat tsjinje je in klacht yn. Bijgelyks at der in fleantúch oerfjocht dat is dat seker in reden foar in klacht. Je hawwe in kladbriefke te min krigen, de stoel siet net lekker, de learaar stjonkt nei sigrettereek, in oare leerling liet twa kear in pen falle, je wisten trije sommen net, it eksamen begûn 30 sekonden letter, je moasten je namme links op papaier sette wylst it oars altiten rjochts wie, je kamen der efter dat je fan bepaalde dingen noch neat heard hiene en fansels it feit dat de twa froulju yn de klasse wol hiel koarte rokjes oan hiene en je tinzen en eagen ôfdwaalden.
Seure, dat dogge se tsjintwurdich allegear bij Laks, it seur-orgaan fan Nederlân.
En helaas kin ik net in leuk liet fine oer seure, mar ik seur dêr net oer.

Sa bang as in hûn

De hûn stiet yn de belangstelling. It skynt sa te wêzen dat Obama in hûn krigen of kocht hat en dat no elkenien sa'n hûn ha wol.
Ik soe dus nea bij Obama op besite gean. Ik sil ek mei myn lisfyts bij it Wite Hûs del fytse. Want at it no komt fan mij, fan myn burd of fan myn fyts, feit is dat hûnen graach blaffe meie at ik der oan kom, dat se graach drigend heal de dyk op fleane en dat sommigen ek noch in byt dogge.
Ik haw dus alles tsjin op hûnen. At ik yn it wurdboek it wurd hûn op sykje dan stiet dêr "huisdier". At dat sa west hie dan seach ik hiel oars tsjin hûnen. Oars sein dan wie it foar mij wat makliker allegear.
De hûn yn de hûs, in boerd oan de muorre mei de wurden "hjir is in hûn de baas" en ik gjin stap binne sette.
Nee, ek net at men seit: "hij docht neat, hij moate efkes rûke, hij is sa goed as in hûn en hij jout him daliks wol del", dan noch bliuw ik bûten.
Ik kin jim sizze dat ik mij no ek beheind fiel yn myn frijheid troch dy ferrekte hûnen. Ik kin jim krekt fertelle wêr't hiel ferfelende hûnen binne of miskien wol wiene. Want at ik ea neisitten wurdt troch sa'n rotbist dan kom ik dêr earst net wer.
Sa haw ik mij sels in fytsferbot oplein foar Skrok (hûn Plantinga) en foar de Slachte tusken Swarte Beijen en Krabbedyk. Sa haw ik ek jierren net troch de Súdhoeke fytst troch hûn de Boer en gie ik nea de dyk del nei Iens (hûn Breeuwsma).
Myn binnentroch reis nei Snits stiet ek ûnder druk. Tusken Easterein en Reahûs haw ik alle moannen it ûngenoegen om lâns meardere hûnen te gean en hûn Jellema op de Ivige leane is ek myn favoryt net. Ik synt ek net trouwens.
It ienige wat moai is oan hûnen binne de sprekwurden en siswizen, sa as: de hûnen pisje mij oan wat betsjut dat de beurs leech is en kommandearje de hûn en blaf sels.
Fansels is der ek ien dy't net klopt: Blaffende hûnen bite net.
De muzyk oer hûne hâldt ek al net oer.

Dreame

It is nuver mar de lêste tiden hear ik hieltyd mear minsken dy’t it oer in dream hawwe. In dream dy’t se earder hiene.”Dêr dreamden je fan” sa sei lêsten ien tsjin mij doe’t wij it hiene oer it earste ljipaai dat de keninjin krige. “As jonkje dreamde ik echt dat ik dêr hielendal nei dat fiere Soestdijk gie en dat ik dat aaike dat oerlangje mocht.” sa gie hij fierder. Ik seach ferbaasd.
“Ik dreamde yn de jierren 70 fan Vicky Leandros”, hearde ik in oar koart lyn sizzen en syn eagen glunderje no noch. “I haw a dream” sa sei Marten Luther King mar dat waard al gau “He had a dream.”
De boppesteande foarbylden binne deidreamen. Je fantasij giet op de rin en dogge wij dat net allegear deidreame. Dat diene we froeger en dat dogge wij no noch.
Ik deidream wat ôf. Want op in lisfyts wol dat hiel goed.
Echt dreame dat is ferfelender. Ik bin net fan doel om myn persoanlike libben hielendal út te lizzen, mar dochs wol ik wol kwyt dat wannear’t ik dream dat myn bril der altyd in haadrol yn hat. Hij falt earne yn, earne tusken, earne op en meastentiids is hij stikken….. Ik kom pas wer bij myn positiven at ik heal wekker myn bril wer fyn op it nachtkastke.
Foar alles is in betsjutting en dat sil mei myn brildreamen ek sa wêze. Dus mar efkes sneupt op ynternet: "Droominfo" moat de oplossing biede en dat is ek sa.
In tik yn “bril” en krij de folgende ynformaasje:

Wanneer je in het echte leven geen bril draagt, maar wel in je droom, suggereert dit dat je een helderdere blik op de situatie zou moeten krijgen. Er kan sprake zijn van een misverstand, of een verkeerd ingeschatte situatie moet rechtgezet worden.

Een gebroken bril duidt erop dat je blik op de zaak niet klopt. Je ziet de zaken niet zoals ze werkelijk zijn.

No at je dy lêste sin lêze dan wit je genôch: ik sit der dus wol gau ris neist mei myn miening. Gelokkich dream ik net wykliks. Ik rin mei dit ferhaal it risiko dat ik myn miening tenei oan de kant wuifd wurdt mei de wurden: hast ek dreamd de leste tiid? Dat risiko nim ik dan mar.

Der binn e hiel wat dream lieten, mar ien fan moaiste is dochs wol dizze.

It hat gjin styl mar dochs

Ik hâld fan taal. Dat haw ik te tankjen oan master Marten de Boer, dy't dat der bij mij earder goed ynstampt op de Herfoarme Legere skoalle yn Wommels. Untlede wie foar de measten in ferskrikking, mar foar mij wiene dat de moaiste lessen. "het naamwoordelijke deel van het werkwoordelijke gezegde" it klonk mij as muzyk yn de earen. Dat ik graach skriuwe mei, is dus net sa raar. Dat ik ek graach lêze mei, past dêr ek bij. Wurden, taal je kinne der safolle dingen mei dwaan: minsken in hert ûnder de riem stekke mar ek in stjit ûnder de mulle jaan. It leit him soms oan in inkel wurd. Foar in goeie kollum kinne se mij wekker meitsje. En der binne prachtige skriuwers: Bonne Stienstra, Wiebe Pennewaard, Hugo Borst, Martin Bril en Wilfred Genee.
Ik dwaal ôf. Want ik woe wat sizze oer de Geen Stijl en fergelykbere webside skriuwers. Mei altyd negative inkt yn de pen, kreakje se alles ôf en benaderje se hast alles negatyf. Dat se dêr mei betiden oer de grins geane is spitich. Mar ûndanks dat, kin ik betiden genietsje fan it orisjinele taalgebrûk.
At je dit lêze:

We nemen u mee naar het ultra-, ultraconservatieve en zwáár gristelijke vooroorlogse plaatsje Wommels, beter bekend als het geïsoleerde dorp waar men volgens de 1950-norm nog trots de lakens uit het raam hangt zodra men piepel in de goggel gedaan heeft en waar abortussen verboden zijn en dus eigenhandig plaatsvinden met breinaalden en groene zeep, waar boeren je aankijken alsof ze nog geen vijf minuten hun leuter tevoren uit een schaap hebben getrokken en waar de media verboden zijn

dan fyn ik dat hearlik omskreaun, wylst it gewoan nearne opslacht mar wol in leuke tekst is.

It hiel stik kinne jim hjir lêze.

Oertraind

Wij kinne allegear de tiden fan Schenk en Verkerk noch yn it sin krije. Of better sein de tiden fan Ard en Keessie. Sij koene ferrekte hurd ride. De ien titel nei de oare. Neffens mij hiene sij beide in baan neist it riden. Simmers draafden se wat of fuotballen se bij Puttershoek 3 of Beemster 7 en se hiene fansels gewoan in baan.
Yn oktober begongen se oan it iis te tinken en dan nei wat wiken training gie it los. It Nederlandske kampioenskip, de Deventer Cup, it EK en it WK. Dan wie it ein febrewaris en dan wie it al wer dien. De redens kamen yn it fet en kamen der oktober werút.
Yn dizze tiid giet is gâns oars. It iene seizoen is noch net dien of se binne al wer mei skema's en tarissingen dwaande foar it nije seizoen. Krekt noch tiid om tusken troch in wykje fakânsje te hâlden, mar foaral de trainingen troch gean litte. Krêft trainingen of wie Verbeek de trainer!!. En dan begjint nei in simmer hurdtarine yn de bergen, in hjerst mei ûntberingen op hichte, de winter. Wurch, deawurch. Van Deutekom. Net mear yn steat in goeie tiid te riden. Twa sekonden langsumer as oars op de 1500 meter. Oertraind.
Folgend seizoen gewoan wer lekker yn oktober begjinne soe ik sizze.

Tommy

Tommy is it ferhaal fan de Who. It ferhaal fan de jonge dit wat heard hie (in skot) en wat sjoen hie (in deade man). En hij hie it net sjen en heare mochten. Tommy dy't de opdracht krige om dôf en blyn te wêzen. It ferhaal skreaun troch Pete Townsend as muzykfilm útkommen yn de begjinjierren 70.
Dy selde Tommy is no wer ta libben brocht troch Di-rect. In rockjûn mei in prachtich ferhaal.
Freedtemoarn earst myn earen útspuitsje litten om freedtejûn yn de Lawei foaral neat te missen. Ik wie fol ferwachting want de muzyk fan Tommy is gewoan super goed. Ik hie yn augustus al kaarten besteld en woe gjin resinsjes ôfwachtsje. Gewoan der sels wat fan fine. Wie wol bliid dat alle kranten skreaunen dat it in wier rockfeest wie. Ik haw echt genoaten fan de muzyk. It swingde oan alle kanten en de teksten fan Jan Rot wiene prima, hoewol dat mij net folle útmakke. In hearlike jûn wêr't je net bijsitte bliuwe koene. In echte oanrieder, mar helaas net mear yn Fryslân.
Hjirûnder twa filmkes fan Tommy, sa't it yn rockfoarm klinkt fan the Who en Tommy sa't it ek klinke kin: in studio opname fan Di-rect. Want helaas der binne noch gjin goeie DVD opnames.

Feyenoord

Wij as Feyenoord supporters mienden dat de (UEFA) beker al leech wie, mar it is no wol dúdlik dat der in dûbbele boaium ynsit. Ik wit net hoe lang ik dit noch ferdrage kin. Foar mij hâldt it echt op wannear Feyenoord no oer giet ta it oanstellen fan de man dy't foar mij hielendal ôfdien hat: Willem van Hanegem.
Ik warskôgje it Feyenoord bestjoer, gean net oer ta it oanstellen fan dy man, want dan is der echt in supporter minder.
Lit mij dúdlik wêze, myn tsjinsin tsjin Ajax bliuwt like grut. Dat is miskien noch in treast.
En at it goed komt at Beenhakker syn ferantwurdelikheid nimt dat betwifelje ik.
Sjoch nei dit prachtige filmke oer in tiid dat it ek net sa goed gie mei Feyenoord.

It is oke

Ik haw de lêste twa wiken wol in hiel soad efter de kompjoeter sitten. Liftwedstryd ferslaan, oare websiden bijhâlde en in fotokwis meitsje.
Oer de liftwedstryd binne nei de tiid altyd prachtige ferhalen te fertellen. Tidens de wedstryd ek wol, mar de echte ferhalen komme pas letter los. Sommige teams hawwe 19 liften hân om yn Eastenryk te kommen. 19 ferskillende minsken en dus 19 ferskillende ferhalen. Dat kin net oars. Want wêr't de iene sjoffeur hiele ferhalen ferteld oer syn of har libben, is in oare sjoffeur sa stil, dat je der hast benaud fan wurde. Je sille mar 100 kilometer neist yn sitte, dy't neat seit. Je soene sizze werom nimt sa'n man dan guon mei. Geweldich is ek dat nachts om 11.00 oere bij in tankstajson bij Nurnberg samars trije koppels steane te liftsjen.
Ik hoop echt dat al dy liftferhalen aansens in kear bijelkoar komme yn in prachtich boek. En dêr sil ek seker it ferhaal yn stean fan Sytse en Jimmy dy't plak namen yn in folle auto mei evangelisten dy't seinen: Dy twa plakjes dy't noch frij wiene, dy wiene foarbestimd oan jim. It hiele ferslach fan dit jier is hjir te lêzen.
Mar moai wie ek it relativearen. Sjoerd en Teade fregen oandacht foar dit liet

Ik haw it helle

Dit moat in posityf stikje wurde oer de 11 stêdentocht: It grut teatraal aventoer fan Tryater, sa't it omskreaun wurdt. Grut is it seker, teatraal is it betiden ek mar in avontoer fûn ik it net. Ik haw genoaten fan de prachtige lokaasjes dy't se útsocht hiene, fan twa geweldige stikjes toaniel (yn Winaam en Hylpen) wêrbij wij sieten te frekken op de tribune mar meisleept waarden troch it ferhaal fan de riders.
Ik haw mei nocht sjoen nei it betiden net hielendal goed fersteanbere toaniel yn de Noardertsjerke yn Snits. Yn Harns waard ik ferrast oer de sjow fan de lûden dy't it iis en de riders meibringe. Ik miste lykwols de echte klou of it hichtepunt. Mei dûnsteater sûnder tekst haw ik neat. It seach der leuk út yn Dokkum, mar ik waard der kâld fan (-3). Ek fan de twadde foarstelling yn Harns haw ik kennis nommen. Yn Sleat kaam bij mij it gefoel dat ik mij bij de poat nommen litten hie. Dat fûn ik kits.
In posityf stikje? Ja dochs. It wie seker leuk om mei te meitsjen, it wie geweldich regele allegear. Mei safolle minsken op paad en wij hoegden nauwelijks op elkoar te wachtsjen. En wachtsjen dêr haw ik in hekel oan.
En yn de bus dêr hiene wij meastal de koptillefoan op mei ferhalen en lûden fan de 11stêden. En dat wie mar goed ek, want ik moat der net oantinke at wij dy net hiene, dan hie ik de hiele dei harkje moatten nei twa efter ús sittende froulju dy't it de hiele dei hiene oer harren bern: ik wit no alles fan se, ik wit dat se mei 6 jier al in fiterdiploma hawwe, in jastichtkrijersdiploma, in ôfwaskdiploma, in doartichterdoggersdiploma en in toskpoetserdiploma. At dy bern sa troch geane, dan hawwe se mei 10 jier al 4 kear safolle diploma's as ik mei 50. En tuskentroch hearde ik ek noch wat er der allegear yn it krystpakket siet en wat se dêr mei dien hawwe.
Leve de koptillefoan.

Fuort

Dat der yn 54 jier in soad feroare is, is wol dúdlik. Dat is ek moai, want ik moat der net oan tinke at ik gjin kompjoeter hie en gjin lisfyts mei mp4 spiler en gjin Us Heit Bier drinke koe.
Dat er safolle dingen bijkommen binne is moai mar at ik no werom sjoch dan bin der ek safolle dingen net mear dy't wierskynlik in wichtige rol spile hawwe yn myn libben.
Sa stiet de Herfoarme skoalle oan de Hofkamp der net mear, lykas de noadslachting, it gebou wat altyd in kommen en gean wie fan minsken en bisten. De bisten wiene meast dea de minsken net.
It hûs bij de suvelfabryk is al hiel lang mei de grûn gelyk makke en de faryk letter ek.

Kryst

Mei Kryst rinne de tsjerken (relatyf sjoen) fol. Raar is dat. Minsken dy't it hiele jier net in oerke yn de wike útlûke wolle om nei tsjerke te gean en dat op Krystnacht ynienen wol dogge.
Wêrom soe dat sa wêze? Wolle se miskien sjen litte dat se der noch wol bij heare? Fine se it sa bysûnder gesellich dat se it net misse wolle. Of is it gewoan de tradysje dy't heechtij fierd.
Tradysjes dêr bin ik sljocht op, derom bin ik mar net gien.
Ik fûn op ynternet in liet dan Johnny Cash. Hij beskriuwt dêryn it bidden fan immen dy't noch libje wol en dy't noch nea bidden hie. Dy't ek net tocht hie dat er ea bidde soe.
Soe it sa wêze dat wannear je de striid tsjin de dea stride dat je begjinne te bidden? Ek al ha je der nea folle fan witte wollen. It soe kinne. It is yn alle gefallen in prachtich liet wurden. En in moai gebet.

Muzyk

Gjin lang ferhaal dizze kear. Net omdat ik gjin tiid haw, mar omdat ik net wol dat jim earst in lang ferhaal lêze en dan gjin nocht mear hawwe om nei dit nûmmer te harkjen. The Kinks mei Ray en Dave Davies en it prachtige nûmer: Celluloid Heroes. It filmke derbij sprekt foar him sels.

Mar wolle jim krekt witte wêr't dit liet oer giet sjoch dan hjir. Oersetten yn it Nederlânsk.

Fryske top 100

Hawwe jim de Fryske top 100 al ynfuld op ynternet? Nee? Of hawwe jim der noch nea fan heard. Dat kin hast net. Fanôf septimber is Omrop Fryslân dwaande om it lykje te litten dat dit it wichtichste barren is nei de 11-stêdentocht. Mei reklame spotsjes, mei Geert âld-wiif fan Tuinen yn de haadrol en syn kompaan, wêr fan ik de namme net wit want alle kearen at hij dy sizze sil hat Geert it wurd al wer.
Alle sneontemiddeis wurde minsken hast twongen harren list yn te sjoeren, te sms-en en âld wiif fan Tuinen ljurket wat oan syn tee, en praat mear as de helte fan it programma fol. Sa wichtich fynt er de muzyk net. Sa wichtich fynt er syn harkers ek net. Nee, sa wichtich fynt hij him sels. En it tillefysjeprogramma op woansdei dat is in parody op in tillefysjeprogramma mei Geert oan it wurd en dy oare dy't der bij sit.
Wol frjemd allegear, want oars docht Omrop Fryslân ek net folle oan Fryske muzyk.
Ik haw myn list al hiel lang lyn opstjoerd. Net omdat Geert en syn maat dat sa graach wolle. Nee, want dan soe ik it krekt net dwaan. Mar gewoan om it Fryske muzyk is.
En at ik jim wie soe ik it mar gau dwaan, want oars rinne jim it risiko dat Geert persoanlik bij jim lâns komt. En dat is net in feessie.
Myn list:
1. Eilân - Doede Bleeker (fan syn nije lêste geweldige CD: Omarmd op Texel)
2. It reint yn de sinne - Sytse van der Werf (Hard rain is gonna fall fan Dylan yn it Frysk, mei in moaie tekst)
3. Op een dag - Gerrit Breteler (nei syn yndrukwekkende optreden yn Jimbar yn 2007 heart hij der yn thús)
4. Grûn fan dyn bestean - Sult ( in prachtich liet wêr't songen wurdt "ik wol wêze wa't ik bin, myn woartels hoedzje dêr't ik kin, myn wjukken útslaan nei eigen sin, it libben boartsje sa't ik bin)
5. It reint yn é Gastmar - Jarje ( fan Stoffel 2 LP's fan Jarje te lien, dy't hast werom kinne mei de prachtige Fryske blues út de jierren 70)

Yn dit filmke fan Gerrit Breteler docht bliken dat it optreden yn Jimbar ek yndruk makke hat bij him.

It gefoel

Ik fyn mij sels in Fries. Dat fynt in oar ek, sa fernim ik wol. Bij mij giet it al faak oer it Frysk. Is der in diskusje oer Fryske plaknammen dan tinke guon dat se mei mij de diskusje wol efkes oan gean kinne. Sij tsjin en ik foar.
Dat doch ik net. It hat gjin sin om te bekfechtsjen mei minsken at je dochs oan je stânpunt fêsthâlde. Mar meitsje mij net wiis dat Uitwellingerga in bettere namme is as Twellegea. Top en Twel soene neffens mij prachtige nammen wêze foar in goed produkt yn it bûtenlân. At je dat wolle. Ik wol dat hielendal net. Dêrom bin ik ek foar it ferfryskjen.
Wat folle earnstiger is oan myn Frysk wêzen, is myn gefoel foar de 11 stêden tocht. Of miskien better sein, myn gjin gefoel.
Ik haw der hielendal neat mei. Ik wit net hoe gau ik in oare stjoerder op sykje moat at Omrop Fryslân foar de safolste kear wer in rider oan it wurd lit dy't in sterk ferhaal hat oer syn 11 stêden gefoel. Al moannen wurde wij troch de Omrop teistere mei dokumentaires en âlde bylden. Ik haw der neat mei.
En de inkt fan it boppesteande stik is noch net droech of ik moat jim al in bekentenis dwaan, dy't heaks stiet op it boppesteande. Ik sil oan de 11 stêden tocht meidwaan. Fan Tryater. Fan moarn 6 oere oant jûns 6 oere in tocht lâns allegear foarstellingen mei hopenlik kjeld en in protte oare ûntbearingen.
Mooglik dat ik dan ek wat in 11 stêden gefoel krij en miskien wol ik dan al dy útsjoeringen fan de Omrop wol sjen yn útstjoering mist.
Op 29 desimber sil it heve en giet it oan. Fansels mei it foarbehâld dat wannear dy dei de echte tocht is , dy fan mij net troch giet. Dan wurde wij gewoan oan de kant setten. Foar it echte gefoel......

Herman Finkers hat in prachtich liet makke oer de 11 stêden

Meast irritante side

It jier is hast om. En foardat it jier om is wurde der al allegear klasseminten opmakke. Wat is it beste fan dit en wat is it minste fan dat. Dêr soe ik net oan meidwaan wolle. Mar ik kom der dit jier net ûnderút.
Yn 2007 en earder wie ik noch wol in trou besiker fan kaatsen.nl. In oersichtelike side mei keatsnijs en útslaggen. Sûnt begjin 2008 hawwe se de striidbile net begroeven mar oppakt. At je alle berjochten op dy side nochris besjen soene dan hat mear as de helt in negative lading. Mei skriuwers as Rynk Bosma en Geert van Tuinen waard altyd iets socht om tsjin de KNKB oan te skoppen. Djiptepunt yn 2008 is wol wurden dat in sekere Gerrit Lettinga (Gerrit wa?) de romte krijt om syn eigen ik te profilearen.
En helaas is dat in ik wêr't ik hielendal neat mei ha. Ien fan de bestjoerders fan in keatsferiening rôp op om net mear op dy side te sjen foar keatsnijs. In goeie oprop, mar ik tink net dat it wurket. Ik rop de side út ta meast irritante side fan 2008. En normaal sykje ik der altyd in kreas stikje muzyk bij, fyn ik sels. Dizze kear net: irritante muzyk bij in irritante side. Ik soe der net nei harkje at ik jim wie.

Dea

It aaisykjen is in skoft lyn al dea gie, ûndanks Anita Andriessen. It keatsen is neffens www.kaatsen.nl ek al dea, ûndanks dat Anita Andriessen it keatsen in waarm hert ta draacht en no is Anita Andriessen is dea.
Dat is net earlik. At der de lêste jierren ien politikus wie, dy't har net gedroech as politikus mar mear as belangbehertiger dan wie sij it wol. Belangenbehertiger fan Fryslân. Tusken en boppe de partijen. Want Anita hie mar ien belang: Fryslân.
Spitich dat wij no fierder moatte mei politici. Wa past no op ús heitelân?

35 jier minder jong

In reuny kin ek in sukses wêze. Dat bewiis waard snein yn de Koperen Tún levere troch de twa eksamenklassen fan de MDS yn 1974. Fan 16 oant 22 oere mochten wij herinneringen ophelje. Mei 6 learkrêften. Wêr't wij doe fan mienden dat se âld wiene mar wêrfan sommigen mar in 10 jier âlder wiene as ús.
Wat mij opfoel wie dat elkenien syn eigen herinneringen hie en dat bij it hearen fan sommigen saken der ek bij oaren wat begjint te dagen.
Dat ik doe fol siet fan BZN dat stie harren noch wol bij. Ik gie yn dy tiid in protte om mei Teun Nicolai (pikefange wie syn hobby en Leonard Cohen syn muzyk en Harkema syn klup) en Ate Eijer (útgean wie syn hobby, Green Apple syn band en Jobbegea syn klup).
En it moaie fan dizze reuny wie ek dat wij neat hoechden. Wij hoechden net te kuierjen nei de earder skoalle (sa as sa faak mei soks) wij hoechden net nei muzyk of nei taspraken te harkjen. Wij hoechden mar ien ding: mei elkoar prate, bier drinke en sa no en dan wat fleis bakke. En Teun moast sa no en dan in sjekkie draaie. Dat hij no bûten roke moast wie oars as doe.
In gouden formule fan Jouke en Kees de twa organisatoren. Moai dat er ek efkes stil stien waard bij it ferstjerren fan ien fan ús klasgenoaten: Gerrit bij de Leij. Mar 48 is hij wurden.
En tanksij Ate syn dochter en frou kaam ik wer feilich yn Wommels en Ate yn Jobbegea.
Ik slút altyd ôf mei in klipke.
Dizze is foar Ate omdat hij noch wist te fertellen dat dizze muzyk altyd tusken de middei draaid waard yn de 5 Pennies. Ik wist it net mear.

35 jier lyn

Snein 30 novimber moat in bysûndere dei wurde foar mij. Yn 1972, 1973 en 1974 siet ik op de Middelbare Detailhandels School (MDS) yn Ljouwert. Dat is dus no sa'n 35 jier lyn. It wie in lytse skoalle en ik moat sizze dat it in moaie tiid wie. Omdat it de ienige MDS yn Fryslân wie, kamen de learlingen oeral wei. Fan de Blesse oant Dokkum en fan de Harkema oan Mullum. Nei dy trije jier haw ik hast nimmen wer sjoen. Allinne Sjoerd Reitsma fan WWS en Siebe Post fan Wikels Hallum trof ik noch wolris troch it fuotbal. En fansels Jan van der Meij, de eardere foarsitter fan de PC en yn dy tiid ús gymlearaar.
Troch schoolbank.nl binne der dit jier wat kontakten ûntstien en snein 30 novimber komme wij nei 35 jier wer bijelkoar yn Ljouwert yn de Koperen Tún. In bysûnder plak want dêr wiene 35 jier lyn faak keunsteksposysjes en it wie de bedoeling dat wij dêr hinne giene. Dat wie in drege opjefte want de 5 Pennies wien net fierwei.
Snein komm der fan fan de 33 sa'n 28 man!!! 2 wenje yn it bûtenlân, 2 koene echt net (dy krije spyt) en Gerrit bij de Ley is helaas ferstoarn.
Fan de 9 leraren fan komme der 7! Om werom te kommen yn de âlde tiid wat muzyk fan ...BZN

Ik wie yn dy tiid tegearre mei Ate Eijer fan Jobbegea of fan de Tredde Slús (ik snapte net hoe't dat siet dêr) fan fan BZN. De âlde BZN mei Jan Keizer op drums en Jan Veerman as sjonger.

Postmoderne hedonist

Ik haw grut nijs: Ik bin in postmoderne hedonist. Geweldich net ju. Dat hiene jim net tocht. Ik ek net trouwens. Ik wist net iens dat der postmoderne hedonisten wiene.
Ik haw okkerlêsten wat fragen beandere en krige no de útslach: in postmoderne hedonist. Ik neam it noch mar in kear, dan kinne jim der oan wenne.
Want postmoderne hedonisten dat binnne " De pioniers van de beleveniscultuur, waarin experiment en het breken met morele en sociale conventies doelen op zichzelf zijn geworden. "
Sa'n múle fol sprekt mij wol oan. Wat it yn de praktyk betsjut haw ik mar efkes opsocht oars wit ik net wat ik bin en hoe't ik mij gedrage moat:
"Mensen die tot de postmoderne hedonisten worden gerekend, zijn individualistisch en tonen een sterke wil tot zelfbeschikking. Ook hechten zij veel waarde aan zelfontplooiing en persoonlijke groei. Mensen binnen dit milieu hebben een onafhankelijke leefstijl en hechten er veel belang aan zelf te kunnen beslissen over de dingen die hen aangaan. Werk is belangrijk, maar niet heilig: ook activiteiten in de vrijetijdssfeer kunnen intrinsieke voldoening geven. Postmoderne hedonisten genieten van kunst en cultuur (museumbezoek, cabaret en toneel), maar er is ook sprake van een rijk uitgaansleven en er wordt veel aan sport gedaan. "

At ik dizze typearring lês dan kin ik mij dêr wol yn fine. Ik mei wol sizze dat ik der grutsk op bin dat ik in postmoderne hedoniet bin. Je sille mar in kosmopoliet of in postmaterialist wêze.

Freek myn held yn novimber

Wylst 8 miljoen Nederlânners nei Peter R. de Vries seagen omdat hij fiergeande onthullingen dwaan soe oer Joran fan der Sleat, siet ik gewoan yn myn hok efter de kompjoeter. Wat muzyk harkje en wat surfe.
Ik haw hielendal neat mei dy man. Syn arrogante toantsje stiet mij net oan. It feit dat hij sjows makket fan misdied fyn ik hielendal neat.
Efterôf die bliken dat Peter R. him dochs wol wat fersjoen hie op de saak. Je kinne ek sizze: hij hat ferlern.
En dus gie Peter R. út op revansj. En wat is no moaier as de selde persoan wêr't je earst fan ferlern hawwe om dy no echt te ferslaan. Nee, om dy der yn te luizen. Mei in soad bravour waard it wer oankundige en bij ús waard de bank ek al wer reserveard op sneintejûn. Gelokkich wie Freek de Jonge der noch. Dêr haw ik neat oan ta te heakje. Oan dit moaie tillefysjefragmint. Wêr't dúdlik waard dat Peter R. sjen liet hoe min hij oer ferlies kin en hoe min at hij diskuseare kin. Freek do bist yn novimber myn held. Ik hie it Peter graach mei de selde wurden fertelle wold. Mar dit is ek prima. It liet wat Freek de Jonge dêrnei sjongt is it krystliet fan 2009. Skitterend

It leauwen

Justerjûn hie ik mei in oantal tiidgenoaten ûnder it genot fan in bierke nei ôfrin fan de training in prachtich petear oer it geastlik libben. En dat libben fan ús dat hie in protte parallelen. De oanlieding fan ús peatear wie it feit dat twa fan ús de foarstelling "Zelle" bijwenne hiene. It ferhaal, dat geweldich spile waard troch Freark Smink, giet oer in dûmny dy't tige eigensinnich wie en syn eigen wize fan libjen hie. Wij praten oer ús jeugd, de tsjerke en it ferfolch. Hoe dreech at is om fanút it eardere "nei tsjerke moatte" it in posityf ferfolch te jaan. Hoe lestich it is om fanút ús "nei tsjerke moatte" de bern dat selde moatten op te lizzen. En wat der bart at je it los litte.
It ferhaal sa't Freark dat spile wie net allinne it ferhaal oer it libben fan Zelle, mar it wie ek it ferhaal fan Freark en ......fan ús.
Derom rekke it stik mij ek sa, want de opfieding yn de jonge jeugd bliuwt altyd in stimpel drukken op hoe't je yn it libben stean.
Doe't ik woansdeitejûn fanút de foarstelling yn Snits thúskaam, lei der in folder yn de brievebus. Fan de Stichting Uit de Bron van Christus. In útnoeging om te kommen nei in iepen dei. Tafal bestiet dat? It briefke hat de keamer net helle. De griene papierkontainer stie yn it paad.
Freark fertelde in prachtige anekdote oer it bidden: Op de sportdei mei iepenbiere en skoalle mei de bibel bern moast Freark yn de finale tsjin in iepenbiere. De iepenbiere wûn. Grutte teloarstelling bij Freark, omdat hij de jûns der foar bidden hie foar in goed resultaat. En dat hie de iepenbiere seker net dien.
Janis Joplin bidt ek:


Ek ferwiis ik jim noch graach nei Het gebed fan CD Lewis. Neffens mij waard dit in nr 1 hit yn Nederlân.

Hat er noch freonen

Ik hie altyd wol wat mei Willem van Hanegem. In goeie fuotballer bij Feyenoord en in eigensinnige man. In persoanlikheid. Wol in ferfelende persoanlikheid. Syn optredens yn praatprogramma's binne lachwekkend of miskien wol sielich.
Dat hij spilers better meitsje kin en dat hij wol ferstân fan it spultsje hat is wol dúdlik. Dat hij ek in goeie haadtrainer wêze kin, wol der bij mij net yn. Hij kin net yn in team wurkje. Moandei wie yn it praatprogramma VI ek wol dúdlik wa't it probleem bij Utrecht wie. Ien fan syn lêste freonen (Johan Derksen) die in flink boekje oer him iepen en liet neat hiel fan syn freon.
Dat de helptrainers ek al gjin freonen mesr fan him binne, is sa logysk as wat. Ik tink dat hij noch ien freon hat.



Mar dy libbet net mear....
En in sjongkarriere foar Willem sit der ek net yn , tink ik.

Ronnie is dea mar syn muzyk net

Ronnie is dea, mar syn muzyk libbet. 16 augustus 2008 ferstoar de man fan de Dubliners mei de djippe stim .
Syn Ierske muzyk freonen sizze him tank (en dat doch ik ek) foar syn bijdragen oan de Ierske muzyk.
Harkje nei U2, the Dubliners, Christy Moore en oan de ein in tige fit eagjende Shane Mc Gowan



En wylst ik dit skriuw bringt myn broer Lolke de nije CD fan Ernst Langhout, Hans Battenburg en Johan Keus. Mei Ierske drinklieten. Ik krij der toarst fan en ik sjoch út nei it optreden fan Ernst en Hans yn it Dielshûs op 9 novimber.

Sportlieten

It AD, wêr't ik no wer in pear moanne in abonnemint op ha, hat altyd ferrassende dingen. Koart lyn kombinearden se de muzyk en de sport.
Under de titel "Popparelstjes over surfen en honkbal" stelden se in top 10 op fan lieten dy't wat te meitsjen hiene mei sportbelibbing.
Under oaren, Queen mei We are the Champions, the Beach Boys mei Surfin USA , John Fogerty mei Centerfield, the Nits mei J.O.S. en de Trockener Kecks mei Naar de top.
Mar it moaiste nûmer wie All the way fan Eddy Vedder.

20 jier jong

Skreau ik earder noch dat ik muoite ha mei de oprop fan de KNVB om in minút stil te wêzen foar in bestjoerder dy't stoarn is en dy't ik nea kind ha, sa soe ik no wol in oere stil wêze wolle foar in oertinking fanwege it ferstjerren fan Frank Voshol. Net dat ik him koe mar....
In jonge dy't folop yn it libben stie, in jonge dy't sosjaal belutsen wie bij in protte dingen en in jonge dêr't elkenien fan hold. En boppedat noch mar 20 jier. Falt der dea hinne op it fuotbalfjild yn Boalsert.
It klinkt miskien wol raar, mar wat je jouwe krije je ek werom. Syn Boalserter fuotbaljende maten makken in gedicht dat wat mij oangiet yn oanmerking komt foar de Nobelpriis foar de literatuur.
Sa folle gefoel yn in gedicht lizze, wêrbij elk wurd in betsjutting hat, dit is echt super.

Folksliet

Dit wykein wiene wij bij it Celtic Folkfestifal yn Ljouwert. In geweldige sfear dy't makke waard troch jong en âld. Mei Wout Zijlstra as sprekmaster giet it altyd in nasjonalistyske kant op. Hearlik, syn promoasje foar it Frysk, wylst hij yn in skotse rok en it swurd fan Grutte Pier op it podium stiet te fertellen dat it Fean fan Ajax wûn hat.
In Skotse groep, in Ierske groep en fansels Skrum. Wij hawwe minstens twa kear út folle boarst it Fryske folksliet meisongen.
Neffens mij koene se it yn it Fean heare, wêr't op dat momint 25000 minsken diene of songen se it liet.
De Skotse groep Beggars Row song ûnder oaren Flowers of Skotland.
Dit is in liet fan de Corries, yn de jierren 70 80 in ferneamde Skotse groep. Sij hiene nea tinke wat er letter mei harren liet barde.


Want no is it in liet dat stiet foar striid en wurdt altyd songen út folle boarst.


En wa't de tekst lêze wol, moat dit filmke sjen.

You Tube

Hast alle dagen sis ik wol in kear lûdop: ynternet en you tube wat soene wij moatte sûnder dy dingen. Alles kine je fine en wer belibje. En dat lêste dat is leuk, at je âlder wurde, kin ik jim sizze.
Sa seach ik de namme fan John Mayall stean, omdat hij optreed yn Ljouwert. John Mayall. Dat wie dy bluesman ût de jiereen 70 en 80. Dat wie de muzyk dy't ik wol leuk fûn mar de measten net.
Hoe âld soe dy man wêze. Ik sykje op ynternet: Berne yn novimber 1933. Dat betsjut 74jier. 74 jier en dan noch folle sealen lûke yn ferskillende plakken yn Nerderlân en de hiele wrâld.
Op You Tube socht en do kaam ik dit prachtihe blues filmke tsjin. Tribute to Peter Green, de man fan Fleetwoord Mac en de man dy't ek spile mei John Mayall

Andre had humor

Dat wie in diel fan de kop fan in stik yn de LC. De rest wie....en heel veel problemen.....
It giet oer it feit dat ene Robert de Waal, sjoffeur en bealchoppasser fan Andre Hazes in boek skreaun hat. Ik tink dat hij wat sterke ferhalen ferteld hat en dat in oar it boek skreaun hat.
Der wie al in boek fan Rachel, de frou fan Andre. Twa boeken oer in man dy't wol wat sjonge koe mar fierders net echt in bijdrage levere hat oan it tema hoe libje wij in bytsje sûn en litte wij wat noarmbesef sjen.
It slimste fan dit alles is dat yn dit stik ek stiet dat de âlders fan Rachel ek dwaande binne mei in boek oer harren held of antiheld. Neffens it ferhaal komt Rachel der net foardielich út.
Myn ferwachting is dat der noch in boek komt fan de buorlju op de kamping (titel: André onze kabouterbuur) fan de SRV man (titel: André lust er wel pap van) en van een homofile neef (titel: De achterkant van het gelijk)

In minut stilte

4 maaie dat wie yn myn belibbing in bysûndere dei. Dan moasten je in skoftke stil wêze. En dat diene je ek. Yn myn byld fan earder sjoch ik in bus en wat autos stilstean op de dyk en wij leine as jonges op de Terp te wachtsjen tidens it fuotbaljen. At de klok begûn te lieden koe it wer los. En mei in befrijingsdei der efteroan hiene wij donders goed yn de gaten wêrom je dat diene.
In minút stil wêze en efkes je tinzen gean litte, je emoasje komme litte is net ferkeard.
En dêr stean ik kommende sneon dan, op it fjild fan Menaam mei SDS 5 en myn emoasjes wolle mar net loskomme en ik sit mar te prakkesearjen foar wa is dizze minút stilte ek al wer.
Ik wit net wa't soks betinkt, mar om alle fuotballers fan it Noarden op te roppen om stil te wêze foar immen dêr't 99.9 % fan de fuotballers noch nea fan heard hat, giet mij te fier.
En dan kin it best de stille krêft west ha efter in sûne KNVB distrikt Noard, it tsjinnet gjin inkel doel om dêr in minút bij stil te stean, krekt foarôfgeand oan al dy 14.30 oere wedstriden.
Stil kin ik wol wêze bij Simon en Garfunkel

Supertreffer

It is tongersdeitejûn hiel let, let ik mar sizze it is freedtemoarn hiel betiid, dat de Treffer redaksje de kantine fan SDS binnenstapt. Sûnder mij. Like let as mei mij, hawwe se de gearkomst beeindige.
Ik haw foar it earst bartsjinst en Willem, Sjoerd, Gerard, Dirk Yde en Atty krije dan ek echt de lêste want it is tiid. Willem nimt it wurd en wit te melden dat de Treffer út is. (dat sil tiid wurde,it is mids septimber, flitst der troch mij hinne) . "In hiel bysûndere Treffer", seit Willem ( klopt, tink ik, sûnder mij makke) "en hij is foar dij, want it is de Aant Treffer".
Hielendal ferbjustere nim ik in prachtich boekje oan en blêderje it fluch troch.
Ik sjoch allegear nammen stean fan minsken dy't yn it komplot sieten: Jellie, ús bern (Hildau, Tsjeard en Anne-Marije), Douwe, goede-âlde Bolke,Freddie, Meinte, Klaas, Sibe en de redaksje. Wat in begjin fan de freed.
Ek noch mei 6 Murphys en in lekkere woarst yn de tas fyts ik mei Willem wer nei Wommels. Thús nim ik dy Treffer efkes troch en gean teloarsteld op bêd en fal foar twaen net yn sliep.
De oare moarn bin ik myn teloarstelling noch net kwyt:
"Hoe is it dochs mooglik dat se sa'n moaie Treffer meitsje kinne, sûnder mij. Sûnder mij!!!!
Mar nei trije bakken kofje en in slach om Kûbaard op de lisfyts, wêr't myn beste tinzen altyd boppekomme, slacht myn teloarstelling om yn bliidskip.
Geweldich dat de Treffer yn dizze foarm hast 10 jier bestiet en dat er altyd wer oare talinten binne dy't ek meiwurkje wolle oan it moaiste, it leukste en it meast Frysktalige fuotbalklupblâd fan Fryslân fan de moaiste klup yn de omkriten fan Wommels en fierderop.
Mannen en frouen dy't meiwurke hawwe oan dizze Treffer. Tige tank. It is wat mij betreft de moaiste Treffer ea....(en it bliuwt freeslik dat soks bûten mij om gien is) mei in prachtich twadde plak de Treffer wêr't Freddie it oer hie: de jubileumtreffer fan 2000. Doe mochten ek wij lekker fantaseare....
In moaie Treffer meitsje is miskien wol in keunst, mar it is noch wichtiger dat in redaksje de romte krijt om dat te dwaan sa't sij it wolle. En dy romte moat der altyd bliuwe want dan komt it beste yn de minsken boppe.
Je moatte altyd hoeden wêze om nammen te neamen, dochs wol ik net om de namme fan Willem hinne. Troch de webside hawwe wij wol in hiel soad mei elkoar opwurke. Wat mij betreft op in geweldige wize: beide altyd fol ideen en romte foarelkoar en beide mei it selde doel: in moaie Treffer en in leuke webside meitsje. Dat hâldt gelokkich net hielendal op. Want ik bin noch lang net útskreaun en do ek net hopenlik.
Ik mei myn stikje graach ôfslúte mei muzyk. Dêrom foar Willem in muzykje: in Skotse groep mei in nûmer dat passy útstrield sa't Skotten dat kinne as de besten. Passy foar de dingen dy't je as frijwilliger dwaan meie foar in klup. Geniet rom 8 minuten fan Runrig en in hiel grut koar,

Saai

De Pc fan dit jier wie nijsgjirrich. In soad echte en heale favoriten. It lei iepen. It soe seker net in saaie PC wurde. Ik wie moandei doe't ik de taspraak fan de foarsitter fan de PC hearde, wol efkes benaud. At syn ôfspraak oerienkomme soe mei de keatsdei dan hie it in oersaaie dei west. Wat wie dat in freeslike taspraak. Ik hie muoite om myn eagen op de lisfyts iepen te holden.
Ik soe sa'n taspraak typeare wolle as:
alledeisk, deads, slochtwei, toar, droech, grânzich, sleau, ientoanich, kleurleas, langtrieddich,seurderich, dof, net nijsgjirrich, ferfeelsum en ferfelend.
Krekt sa saai as Bush. Je soene der bij yn sliep falle.

Kening

De lêste tiid binne de keningen in soad yn it nijs. Willem Alexander ús takomstige kening bout in twadde paleiske (fansels oan it wetter)yn Mozambique, de kening fan Belgie docht alle war om de regering bij elkoar te hâlden en Chris Wassenaar slacht de iene nei de oare keningspriis bijelkoar.
It nijs dat Bart Helmholt kening wurden wie yn Burgum die de bûtensteander miskien efkes fermoeden dat Chris fan de troan stjitten wie. Mar neat is minder wier.
Ien kear yn it jier giet in ljepper mei in keningspriis nei hús. En dat wie Bart

Sommige minsken

Hjoed oerhearske it oppakken Karadzic it wrâldnijs. Dat oppakken wie goed nijs. Minder goed wie it feit dat hij him fermomd hie mei in grut burd. Sjoch, dat ik wolris útskolden wurd foar Vader Abraham, Sinterklaas en Sint Piter (allinne yn Grou) dat giet noch wol.
Mar dat ik dêrnei soms fergeleken wurdt mei sa'n Islamitiske lieder wie al folle minder.
At Karadzic der ek noch bij komt, dan soe ik miskien dochs oerwage moatte om.......Nee dat net. Ik gean net oan de kant foar terreur.
John Prine sjongt prachtige lieten mei oer it unnut en it leed fan oarlogen. Spesjaal foar Karadzic, de oarloachmisdiediger, in liet fan myn grutte favoryt John Prine.

Hingjen bleaun yn de jierren 60

Dizze wike moast ik foar in interfjoe in fraach beanderje oer myn favorite muzyk. No haw ik in brede smaak mar ik kom dochs wol faak werom op dat âlde spul. Fan de tiid dat ik de radio ûntdekte en it libben ûntdekke moast.
It puberjen sil yn dy tiid ek net oan mij foarbij gien wêze. Ik socht myn heil yn dy tiid yn it protest. Armand syn ferskes koe ik út de holle en ik woe graach bij dat folk heare. Dat hjitte doe alternatyf.
At ik it ûndersteande liet fan Armand, no 40 jier letter, wer sjoch en hear dan ferlang ik wol wat nei de tiid fan dy opstandige puber.