In app of playmobyl?

Pake en beppe gean mei de tiid mei. 

Beide in tablet en dat foldocht mar skoan.

Pake- en beppesizzer Jelske  sjocht altiten earst nei de hoes en at sij in Frysk flagje sjocht, seit se: fan Pake.

Jelske is no krekt twa jier en fynt in tablet tige nijsgjirrich.

Der is ek neat mis mei dat bern dêr sa jong al wat mei ompiele.

Jelske hâldt (noch) net fan twitter, feestboek, email, google en spotify.

Jelske wol in 'pultsie dan".

Spultsje dwaan dus.

Dus soarget pake foar in berne app op de tablet.

Mei wat puzzels, mei wat bistegelûden, mei wat memory en in mooglikheid om mei de finger te tekenjen.

It giet mei dy spultsjes krekt as mei oare dingen wêrbij konsintraasje nedich is.

It duorret mar in pear minuten.

"Oar pultsie dan" seit se dan.

Ferline wike freed hie se nei minder as in kertier har nocht.

En ik ek. Want spultsje dwaan is seker net myn favorite bezichheid.

Wierskynlik haw ik bij it delheljen fan de app net krekt lêzen wat it gefolch is fan gebrûk.

Dêr bin ik dizze wike efterkommen.

Ik krige in email.

Mei sis mar de toetsrissultaten.

Wat hat dat lyts kertierke oplevere oan kreative, kognitive ûntwikkeling en hoefolle minuten sosjale feardichheid hat se dien.

At har mem en heit har oer 2 jier oanmelde bij de basisskoalle dan wurdt yn it ramt fan Passend Underwiis foarôf beoardiele at krekt dy basis skoalle wol it goeie plak is.

Heit en mem kinne dan fertelle wat harren  befiningen binne en se kinne mei it tabletrapport fan pake fêst goed oantoane hoe't Jelske der foar stiet.

Moarn komt se wer in dei. Pake past op en pake hat op souder de bak mei playmobyl helle. 25 jier lyn it favorite boartersguod fan soan Tsjeard en dochter Anne-Marije. Benijd wat dit mei Jelske docht.

Nei in flinke waskbeurt binne se der klear foar. Moarn sil it as boartersguod tsjinje foar Jelske. Haw der mar in pear hynders bijdien, dan kin it hast net misgean liket mij.

En moarntemiddei meitsje ik myn "eigen rapport" op.

Op basis fan wat ik sjoch. 

Ik haw der yn alle gefallen sin oan want sjen nei in famke dat mei playmobyl boartet liket mij folle leuker as it sjen nei in famke dat oan it  "pultsie dan" is op in tablet.

Wybren

Op twitter wie it hjoed wrâldnijs like it wol: Wybren Jorritsma amtner fan it jier.
Wybren in alsidige jongfeint, dy't hikke en tein is yn Wommels.
Wybren, fan herte lokwinske.
Ik wit wat it is om amtner te wêzen.
In gewoane grize amtner om samar te sizzen.
Ien dy't op é tiid efkes nei bûten seach en ien dy't djippe laden hie (om te foldwaan oan it byld fan de bûtenwacht).
Ik haw njoggen jier amtner west bij de gemeente Snits en dat hat prima foldien.
It hat mij mar ien titel oplevere: fytser fan it jier fan de gemeente Snits.
In hegere titel kin hast soene je sizze mar wat Wybren no berikt hat nei hast twa jier is boppe-ierdsk.
Ik haw gjin stim op Wybren Jorritsma útbrocht.
Dat komt omdat ik de oare kandidaten net kin.
Stimme foar iets betsjut wol in kar meitsje.
Dat slagget net at je mar ien kandidaat kinne.
Dat Wybren hiel goed is as amtner en boppedat in aardige fint is, dêr is gjin twivel oer.
Om te stimmen moatte je ek op Linkedin sitte.
Ik sit net op dat medium.
Dus stimme koe al net.
  

Sjoch at der stimd wurde moast om de bêste lifter dan soe Wybren bij mij in hiele grutte kâns meitsje.
En at der stimd wurde moast oer de gearstaller fan it leukste Fryske boek dan soe ik it ek wol witte.

Want miskien wisten jim it noch net mar dizze amtner fan it jier is ien fan de haadrolspilers fan it it machtich moaie boek "Lift" oer "10 jier op é tomme troch Europa".
Foar de net lêzers mar de harkers sit der sels in lústerskiif bij.....
Dus wa't lêze (of harkje) wol wat dy Wybren mei al syn freonen en freondinnen belibbe yn Europa, dy soe dit boek (mei in hiel soad foto's) ha moatte.
Dat boek, dêr binne noch in hûndert fan te keap.
De jubileumpriis (fanwege Wybren syn oerwinning) is 10 euro. Oars hie it 15  euro west.
Bestelle kin troch in mail te stjoeren nei redaksje@tsjeard.nl .
Dan komt it fêst foarelkoar.
At de boeken tenminste net te gau útferkocht reitsje. Doch it wol gau want der komt gjin twadde printinge.

Feiliger?

Wat fytsen oangiet mei ik mij sels wol erfaringsdeskundige neame. 

Alle dagen sit of lis ik op ien fan myn 3 fytsen. Yn de wurkwiken yn eigen omjouwing en yn fakânsjes faak yn it bûtenlân.

Berjochten sa as hjir boppe roppe dan ek altyd myn nijsgjirrigens op.

En dan giet it ek noch oer Wommels.

Wat mij opfalt yn dit stikje wat yn de L.C. stiet, is de sin: Voor automobilisten geldt dat ze de fietsers voor moeten laten gaan.

"Voor moeten laten gaan" wat is dat?

Is dat it selde as dat de fytsers foarrang hawwe?

Of giet men der fan út dat auto's dy't mei in gonkje fan 80 km oanriden komme fanút Easterein, de fytser dy't fanút Skrok oerstekke wol, foar gean lit út fatsoen?

Ik wit it net. 

Ho.

Ik wit it wol.

Dat bart net.

It liket mij sa ta dat al dy strepen dy't no op de dyk kalke binne de fytsers it idee jouwe dat se foarrang hawwe en dat auto's stopje moatte.

Mar al dy strepen jouwe de autorider net it gefoel dat it giet om foarrang ferliene oan fytsers.

Of wurde de blombakken dy't no tichter bij Wommels op de dyk steane, ferpleatst nei dat punt, sadat auto's wol ôfremje moatte?

De oplossingen dy't no keazen binne op de van Sminialeane komme mij net echt fytsfreonlik oer. It idee dat auto's mij foar gean litte moatte, wylst it net dúdlik oanjûn is, komt mij wat te gefaarlik oer.

Hofkesjonge

Ik wit net at der no noch hofkesongen wurdt,
ik tink it hast net,
hofkesjonge, dat wie in moaie bezichheid eartiids,
spannend,
en sûn, want it gie wol om fruit!
te hurde parren en te soere appels,
sûn ek fanwege it draven...it hurde draven

Wommels yn de jierren 60,
moaie hofkesjong adreskes.
Yn dûmny syn tún oan de Terp,
in grut ferskaat oan fruit,
spannend dêr oer dy muorre hinne op it Aldhiem,
jatte en op tiid werom,
mei fansels it risiko fan de hel,
want it wie úteinlik wol bij dûmny.
Bij Klijnstra yn it Bosk mei syn prommebeamkes,
mei noch in grutter risiko,
it gefaar fan de sel,
Klijnstra wie úteinlik wol de plysje.
Op de Hofkamp, meardere adreskes....
yn it hôf oan de van Sminialeane ......

Op ien plak mei in hiel soad beammen kamen wij net,
dat wie it hôf oan de grutte feart,
it hôf fan Willem Postma.
Dêr doarst ik net te kommen.
Dat wie allinne foar echte weachhalzen
De hel en de sel wiene neat at je it fergelykje
mei de driging om yn dy  grutte hannen te fallen fan Postma,
Postma dy't net ien kear warskôge,
Postma dêr hiene je as bern respekt foar.

Op alle plakken yn Wommels haw ik wol west,
as bern, as jongfeint of as âldere,
mar yn it hôf fan Postma wie ik nea,
dat bleau ferbean
ek doe't hij ferstoar bleau it "it hôf fan Postma"
it hôf fertuteaze wat romte joech oan de fûgels

De ferhalen wiene der al in skofke
in oare eigner, feroaringen
wat soe der barre?

Wat hie it moai west at ik dêr dochs noch in kear sjoen hie
gewoan omstappe op it ferbeane, stikje grûn fan Wommels.
tusken de tsjokke beammen,
mei it tichte strewelleguod
mei it heal ynsakke hok
mei in "Postma" dy't miskien wol fanút syn himmelstoel der altyd noch driigjend op tasjocht

It kin net mear,
it is opromme
keal
spitich foar dy fûgels, mar dy fine wol wer in oar plakje, dy hawwe der faak genôch west.
spitich foar mij, in Hofstra dy't nea hofkesong yn dit hôf en der sels ek nea west hat en dy kâns ek net wer krijt.

The Frames

Dizze wike pakte ik de CD fan the Frames mar wer ris út de kast. In Ierske rock band dy't ik no twa kear live yn Nederlân sjoen ha. Al wer wat jierren lyn want se geane net folle op toernee mear.
Mar ik hâld se yn de gaten.....
Wat in geweldige CD en wat bleau ik dit in moai nûmer finen. Mei safolle spanning en gefoel songen.
Dit filmke is opnommen yn dy prachtige seal  oan de Vicar street yn Dublin, wêr't ik ferline jier bij the Dropkick Murphies wie.

Freonen op de fyts

30 jier bestiet de stifting "Vrienden op de fiets".  Ek it kommende jier binne wij wer stiper. Sûnt 2003 is dat al sa. Alle jierren meitsje wij der gebrûk fan. Underweis op de fyts foar ús in prachtige oplossing om sa mei in bytsje spul op paad te gean.

Sliepe bij ûnbekende minsken yn in ferboude garaazje, yn in oerstallige karafan, op in souderferdjipping tusken de wekflessen of gewoan op in sliepkeamer dy't oars dochs net brûkt wurdt.

Freonlike minsken oer it algemien en allegear mei in eigen reden wêrom se dit dogge.
Sliepe en dan it moarnsiten en dan wer fierder. Op nei it folgjende adres.

Wij sjogge no al wer út nei de maaiefakânsje. Lekker in rûntsje troch Nederlân of sa.

Donatuer wurde kost 8 euro per jier en dêrmei krije je adressenboekje en in routekaart en de ynlochgegevens om de wepside te besykjen en te sjen wat de ferskillende adressen te bieden ha.

It boerd

It hat moai west. It hat lang genôch duorre. It is net slagge. Nettsjinsteande dit boerd mei ark dat yn ús garaazje hong. Al hoe moai it der ek útseach mei skroevedraaiers, kaairingen, hammers, in seage, wat tangen, in skjirre, in tomstok, in wetterpas, in seage, in file, in potlead en meardere dingen wêrfan ik nea witten ha wat je der mei kinne.

Ark oerkrigen doe't myn heit ferstoarn sa'n 15 jier lyn. Oerbrocht fan syn hok nei myn garaazje.

Dat it sa kreas yn de garaazje hong en foar it gripen hong, hat neat feroare oan myn twa lofter hannen (ûn)handichheid. Ik haw sa no en dan myn fingers weage oan wat kluskes wêrbij ik dit ark nedich miende te hawwen. It wie altyd wer in gok.

"Je moatte it goeie ark ha en je moatte dingen dwaan mei it goeie ark" waard der sein.

Yn de teory maklik yn de praktyk net útfierber. Foar mij dan.

Dizze wike de hiele hannel opromme. It hat gjin sin dat it sa'n prominent plak yn nimt yn de garaazje. Fuort der mei. Yn de nije arkkiste. Op tsjillen. Maklik at ik "in klus" efter yn de tún ha en de goeie skroevedraaier sykje moat. Hoech net 5 kear te rinnen.

Nostalgy? Herinnering? Nee hear.. sels de enseklopedy dy't myn heit as in wier besit beskôge hat hjir gjin plak mear.

Tiden hawwe tiden.

Schemeruur

It wie it debútboek fan de Sweedse skriuwer Johan Theorin. It is al fan 2008.Hij hat ûnderwilens al in stik as 4 boeken skreaun.
In bysûnder moai boek. Lêzen op tablet en net yn de gaten dat it in boek fan dik 400 siden wie.  In prachtich skreaun ferhaal oan de lêste side ta.
It boek brocht mij hielendal yn de sfear fan it eilân Oland, wêr't wij yn 2008 in pear dagen op fakânsje west ha.

Noch efkes wat foto's opsocht dy't nommen binne op dat (skier) eilân. Want in dyk ferbynt it eilân no mei de fêste wâl.

prachtige loften , dêr seagen wij jûns nei út

Wij troffen it, der wie in Yogafestival op de kamping dêr't wij wiene,
 en der waardfrjemdgenôch fan útgien dat wij dêr ek foar kamen.

Der wiene Nederlânske eigners en de kamping wie doe oansluten bij Rondje Zweden,
in gearwurkingsferbân fan Nederlanners yn Sweden mei in kamping.

Kroechkwis

Mei it grutte gefaar beskuldige te wurden fan minne ferliezers (Lolke, Willem, Ype, Durk, Popko en Aant) moat ik dochs mar wat skriuwe oer de tige gesellige jûn yn Noflik Easterein bij de Fryske kroechkwis.
Fan te foaren hie in anonime Eastereinder yn in briefke bij de Afûk oanjûn wêrom it oan de protters raasde dat it no krekt dêr holden waard (gjin kroech en in eigner dy't net Frysk praat). Wij waarden lykwols wolkom hjitten bij de doar troch eigner Ab mei de dochs tige fryske wurden "goeiejûn allegear" en de (grutte) seal like echt op in hiele gesellige kroech. Al mei al azeme it de goeie sfear út om der wat fan te meitsjen. De muzyk fan Baba live die gelyk in flinke oanslach op de earren mar dêr hâlde wij wol fan.
Fan te foaren hie ik fansels heech fan de toer blaasd (dy fan Easterein is fan de 11de ieu witte wij no)  mei útdaagjende teksten op twitter nei de Aaipopkes en de Grodzemodzers út Wommels. Bij de útslach koe ik dan ek fêststelle dat it tige goed holpen hat. Troch de útdaagjende en prikkeljende teksten binne sij boppe harren sels útstegen en einigen beide ploegen op in tige fertsjinstlik tredde plakje.
Dankje wol Aaipoppers en Grodzemodzers ik haw dat graach dien.
Sels sille wij einige wêze op in plakje tusken de 4 en 23. Wij rekkenje der op dat ek de net winnende ploegen te witten komme op hokker plak se einige binne. Dat it frouljusteam út de 4 doarpen (Itens, Rien, Hinnaard en Lytsewierrum) as twadde einige is ús ek bekend.
"Wêrom binne jim dan net earste wurden? dy fraach stelle jim no fansels.
Wij kamen te koart sa't it skynt en wisten foaral te folle ûnnoazele fragen net en in oantal hiene wij graach nei de tiid oer diskusearje wollen.
Foaral de kategory muzykfragen wie net wat wij der fan ferwachte hiene.
In fraach as "yn hokker auto dy Twa ride " hat neat mei muzyk te krijen.
Ik frees foar de folgjende edysje mei fragen as "hoe hjit it hynder fan Gryt Wiersma" , "wennet Hendrik Hasjies noch yn Houtigehage" en "hoe heech binne de Cliffs fan Moher"
Mar hawar, ús diktee wie ek midsmjittich.
It kin oan de leeftyd, oan de foarlêzer, oan it tiidstip, oan de kennis of oan it bier lein hawwe. Of in kombinaasje fan dy fiif. Wa sil it sizze.
It komt yn dizze digitale tiid selden mear foar dat ik sokke lange sinnen opskriuwe moat dus hie ik mear it gefoel dat ik meidie oan de Fryske kampioenskippen hurd Frysk skriuwe.
Dat in groepke Fryske skriuwers nei Easterein ta kaam wiene om mei te dwaan fertsjinnet alle lof.
Dat sij ek mei de priis nei hûs giene is oan de iene kant net ferrassend oan de oare kant wol. Want fragen as wa is de foarsitter fan de folkstúnferiening fan Easterein binne fragen fan in tige lokaal nivo.
It wie dus in tige slagge jûn, want at der neat te protteljen is, dan hie it wis neat west.
En nei de tiid wie der muzyk en tiid foar in bierke..........en wij hawwe noflik sitten yn dizze kroech.

Boeken 2013

Yn 2011 en 2012 kaam ik ta 43 boeken.
Yn 2013 kom ik "mar" ta 37. Hie ik net tocht, foar myn gefoel in soad lêzen. Sitte wol in pear tsjokke boeken bij, sa as de twa fan Stieg Larsson.
Fan de 37 binne der 6 fryske boeken bij.
De moaiste is lestich te sizzen, mar it boek Skios fan Michael Frayn fûn ik geniaal betocht, mei sa folle humor en sokke moaie sinnen.
Hast alle boeken haw ik bij de bieb út Wommels en nûmer 35 en 37 haw ik digitaal lêzen. En dat hat mij poerbêst foldien.

1	Royen, Heleen van	Bloed, zweet en tranen	2013
2	Keenan, Brigid	Van Trinidad tot Kazachstan	2013
3	Egmond van Michel	Gijp	2013
4	Boer, Eize de	It sicht is withoefier	2013
5	Een licht in de duisternis	de Waal & Baantjer	2013
6	Dahl, Arne	Europablues	2013
7	Arghis	Klaaikluten	2013
8	Dahl, Arne	Verdwenen onschuld	2013
9	Dahl, Arne	Requiem	2013
10	Schiffart, Sipke de	Wat is it om bang te wêzen	2013
11	Thompson, James	Engelen van sneeuw	2013
12	Zwaan, Peter de	De vuurwerkramp	2013
13	Hollander, Loes den	Loslaten	2013
14	Zwaan, Peter de	De voeder	2013
15	Adler-Olsen, Jussie	Het Marco Effect	2013
16	Eisma, Dick	Dat kin de brune net lûke	2013
17	Rothenberg, Jess	Het rampzalige verhaal van jou en mij	2013
18	Macbride, Stuart	Verbrijzeld	2013
19	Terpstra, Arjen	De hearen fan Fryslân	2013
20	Appel, Rene	Goede vrienden	2013
21	Dittrich Boris	De waarheid liegen	2013
22	Higgens Clark, Mary	Neem mijn hart	2013
23	Larsson, Stieg	De vrouw die met vuur speelde	2013
24	Meijer, Deon	7 dagen	2013
25	Rijnvis, Dennis	Savelsbos	2013
26	Meijer, Deon	Onzichtbaar	2013
27	Larsson, Stieg	Gerechtigheid	2013
28	Meulen, Johannes vd	Fan Harns nei Goutum fia Malta	2013
29	Jong, Ferdinand de	De lêste trúk	2013
30	Edwardson, Ake	Kamer 10	2013
31	Frayn, Michael	Skios	2013
32	Kellerman, Jonathan	Skelet	2013
33	Hornby, Gill	Het regime	2013
34	Baldacci, David	Vergeten	2013
35	Tol, Iwan	Hans Kraay	2013
36	Dijkstra, Klaas	Killers	2014
37	Siebelink, Jeroen	Voetbalgenen	2013

Sûnt 1998 haw ik no 628 boeken lêzen.

Sinner

Mei ik mij efkes foarstelle. 

Ik bin de Sinner Demon. 

In lisfyts sa't jim sjogge.

Ik bin in Grinzer.

Makke yn Garsthuizen.

Dat leit yn it prachtige lânskip boppe Grins.

Bij Readeskoalle yn de buert.

En jim witte der giet neat boppe Grins.

Yn 2000 haw ik foar it lêst yn Grinslân west.

Ik waard dat jier op transport setten. 

Earst nei Ljouwert en doe nei Wommels.

Wommels!!

Yn novimber 2000. 

Yn al dy jierren yn Wommels hat hij 22412 kilometer op mij lein.

Dat is sljochtwei 1600 kilometer per jier.

Mei hichte en djiptepunten.

jier	km
2000	416
2001	6200
2002	2441
2003	1306
2004	1423
2005	416
2006	154
2007
2008	32
2009	1707
2010	2240
2011	1602
2012	1470
2013	3005
totaal	22412

It begong sa moai yn 2001.

6200 kilometer
mar wat te tinken fan de jierren 2005, 2006, 2008 

en net te ferjitten 2007 

It absolute djiptepunt. 

Ik waard yn dy jierren skoudere.

Stie efteroan yn it hok.

Neist in Nazca.

Myn konkurrint.

Al dy jierren

De Nazca wie alles en ik wie neat.

Ik wie yn dy jierren meast in sliepplak foar de poes.

Oant 2009.

Ik krige in oar stjoer en ynienen mocht ik wer meidwaan.

Mei as hichtepunt 2013.

3005 kilometer mar leafst.

Berikt op de Berkwerterleane,
(dat is tusken it deadekrúspunt en Kramershoeke)
op moandei 30 desimber

Mear kilometers as de Nazca, dy't foar wen-wurk is.

dy't sa no en dan in buike op de kop krijt

Ik wurd nea wiet.

Ik bin foar de frije tiid ritsjes.
de moaiwaar en droege ritsjes

Ik tel wer hielendal mei.

Ik gean takem jier foar de 25000 kilometer totaal

25000 kilometer yn Fryslân.

En dat foar in Grinzer.

Leechsteande sinne

De earste snein yn jannewaris 2014....de earste foarjiersdei

Fakânsjeboeken

Dit wie tidens dizze krystfakânsje myn digitale boekenkast. 6 boeken delhelle fan de byblioteek.  Genôch foar dizze fakânsje. Want tusken it fervjen, it opromjen, it garaazje leechmeitsjen, it garazzajeynromjen wie der gelokkich tiid foar in boek.

Ien haw ik net útlêzen. Tafalligerwize it Fryske boek. 

Griene simmer, haw ik foar de helte trochwraksele en hie te folle muoite om de oergongen yn it boek in plak te jaan. Mei oare wurden ik hie betiden gjin idee wêr't it en oer wa't in gie.

In lestige foarm fan ferhaal oerbringe.

De sosjale top 100

Ik haw hjir al ris earder wat skreaun en sein oer de Fryske top 100. Net myn ding. It leit er allegear sa dik boppe op. Wat in presintator graach wol bart. Dat sjogge je no ek al wer.
It is ûnbegryplik at je nei de Top 20 fan de Top 2000 sjogge, dan binne dat hast allegear legendaryske pop en rock songs. Ik haw begrepen dat Fryslân ek goed meistimd hat.
Foar de Fryske top 100 jilde sa't it bliken docht hiele oare muzyknoarmen.
Dêr giet in om sosjaal stimme.
Lit ús it asjeblyf net fierder fertelle oan ús buorprovinsjes. Dan wurde wij net mear foar fol oan sjoen.

Jeetje, myn neetje..... de Wiko's op 1. Ik wurd der tryst fan.
En ik foarsis jim foar de kommende jierren in oantal  nûmer 1 kandidaten
Eddy Dijkstra at hij beslút nei Kanada te emigrearjen, komt syn Fryslân op 1
Griet Wiersma, at har Fryske hynder rêst fûn hat yn it slachhús
Tetman de Vries mei Elts mei graach ris fiskje at it fiskjen hielendal ferbean wurdt

Folle lok en seine

Foto is makke yn de earste Dútske Radfahrerkirche, dy't oan de Elbe leit en wêr't wij dizze simmer wiene. Sjoch hjir foar mear foto's

Voetbalgenen

De boppesteande foto siert de foarside fan in reedlik nij boek. Jeroen Siebelink hat bij in oantal eks Oranje spilers west, om te sjen hoe't sij omgean mei in fuotbaljende soan of dochter.
Ik haw it boek op de tablet lêzen fan de Vakantiebieb.
In tige nijsgjirrich boek, omdat it ferskil tusken de iene en de oare hiel grut is.  Nim no Jaap Stam fan wa't de dochter fuotballet bij C3 fan vv Hoonhorst.  "At se it mar leuk fynt" is de strekking fan it ferhaal.
Sjoch nei Ruud Geels dy't syn tonge der ôfbite moat om syn likens yn te halden at syn pakesizzer der neist stiet.
Nim no Dean Gorre.  Syn soan hat de hiele opleiding fan Manchester United troch rûn. In oplieding wêr't je benaud fan wurde. .
Nim no Dennis Bergkamp, wêrfan de soan fuotballet bij Almere City, in satellyt klup fan Ajax.
It moaie fan dit boek is dat it in ynsjoch jout yn de betiden "subjektive" geast fan dy eks fuotballer dy't it allegear better tinkt te witten en fuotbal foar eigen bern wol hiel wichtich fynt. It jout ek in prachtich ynsjoch hoe't der  mei bern omgien wurdt yn de hurde jeugdopliedingen. It giet ek oer de argewaasje fan bemuosike âlders wat in hieltyd grutter probleem is bij de (gruttere) klups.

In oantal nijsgjirrige saken yn it boek

Bij Manchester United hat elk jeugdalvetal syn eigen trainingsfjild. Dat giet fan U8 oant U18.
Fanôf U15 binne de oefenfoarmen geheim. Alders meie dêr nea bij wêze.

Het is stil langs de lijn bij Under 17. Over de volle lengte staan ouders en ze zwijgen. Toen Kenji (soan fan Dean Gorre) destijds werd aangenomen bij United moesten Dean en Magali een overeenkomst tekenen waarin ze beloofden dat ze langs de lijn geen enkel geluid zouden voortbrengen. Geen aanwijzing mag je hier geven, zelfs een aanmoediging is uit den boze. Na een doelpunt mag worden gejuicht, dat nog net. Elke andere prikkel brengt de geraffineerde coaching fan  United in gevaar en daar mee de uitgebalanceerde ontwikkeling van de spelers.

Bij één club uit de Premier League bleek een gescout jongetje, toen hij bukte om de bal met zijn handen op te pakken, een luier onder zijn broek te dragen.

Ik soe elkenien dit boek oanriede. It beskriuwt it fuotbalwrâldsje mei de eks Oranjespilers en harren soan of dochter yn de haadrol.
Nei Gorré, Bergkamp en Stam ek ferhalen fan Koeman, Helder, van Hooydonk, Makaay, de Wolf, de Jong en Perez.

Zittingszaal 14

It jier is hast om en dan sjogge je op sommige dingen werom. Sa as op twitter. Wat hat twitter mij oplevere, wat hat twitter mij brocht?
Ik kin dêr koart oer wêze. Ik bin folger fan sa'n 250 twitterakkounts. Leaver sprek oer it folgen fan 250 minsken dy't efter dy akkount sitte. Want myn kar om in nije folger ta te heakjen oan de list is altiten bewust.
Immen folge op twitter is foar mij: nijsgjirrich wêze nei de dingen dy't hij sij docht en sjocht. Dat is ek de reden dat ik in ferskaat oan minsken folch dy't ferskillende ynteresses hawwe. It hat foar mij gjin sin om allegear nijsstjoerders en sportnijs en soks sa wat te folgen. Ik gean foar de minsk dy't wat fertelt oer syn muzyk, oer syn natoer, oer har libbenfysje, oer har reizgjen, oer syn wurk, oer har sport, oer syn treinerfarings, oer har bakken, oer syn leafde foar Snits, oer syn eilân en oer har wize fan tinken en gean sa mar troch.
Sa hawwe alle minsken wol in reden wêrom ik se folch.
De meast bysûndere fyn ik @zittingszaal14.
Bin tige ynteressearre yn de misdie en wat ik dêr fia twitter fan mei krij, haw ik fan Rob Zijlstra dy't efter @zittingszaal14 sit.
Streekrjocht krije je op in humorfolle en relativearjende wize wat mei fan de saken dy't yn de rjochtbank fan Grins spylje.
Boppedat ferrykt hij ús sa no en dan mei moaie kollums.
It tip dus.

Liftsje nei.....

Tsien jier lang wie de liftploech fan Wommels aktyf. Op 1 jannewaris 2004 gie de reis nei Land's End. Der diene 9 twatallen mei wêrûnder Namkje Koudenburg en Gert-Jan Brandsma en Wybren Jorritsma en Klaas Malda.
No 10 jier letter is der yn Sennen op Lands End in feessie.
Wybren en Namkje dy't 10 jier lyn op dat plak "in stel" wurden binne, binne okkerdeis troud.

It feest lykwols wurdt fierd mei freonen en famylje op it plak wêr't it begong: Sennen bij Lands End.
Dat feest wurdt holden op âld en nij.
Der giet in fleantúch fol gasten hinne ien fan de kommende dagen......
Mar hjoed krige ik in sms-ke fan Beitske Kooistra. Sij hat ek 6 kear meidien oan de liftwedstriid, mar wie der net noch bij doe't de reis nei Lands End gie.
Dat hellet se no yn want sneontemoarn  kaam it earste sms'ke binnen.

sneontemoarn 10.35
Hoi Aant
Myn freon en ik binne ûnderweis nei Sennen foar de bruloloftfan Nam en Wyp. Kin it net litte dy in lift update te stjoeren: Nei in trage start yn Grins no  in flinke klapper nei it suden te pakken. De beste man moat nei Eindhoven mar riidt foar ús fia Breda.
Groetnis fan Ron en Beitske.

sneontemiddei 13.18
Wij bliuwe sa no en dan in update stjoeren. No yn Kia mei Tukkers ûnderweis nei Gand!

sneontemiddei 15.30
Aansens troch de tunnel ......mei de auto yn de trein ......nei Londen

sneontemiddei 16.58
Brrlluupp in sms fan ûnder wetter. Mei de trein yn in healoerke nei UK (sppitich dat it gjin wedstriid is). De bestjoerder fan ús lukse9 persoans buske riidt mei bands troch Europa, in hiel arsenaal oan muzyk knalt út de boksen en út syn mûle.

sneontejûn 21.09
Mei twa windsurfers'; we're surfing the motorway on tp Bristol.
PS : wij sille dy fannacht net wekkerhâlde mei sms-kes

sneintemoarn betiid 3.31
Finish. Lêste rit fan Taunten nei Sennen. Minsken út Cornwall dy't ús nei whitesands lodge brocht ha.
8 liften fan Grins nei Sennen.
Wyp en Nam hawwe ús yn pyama ûntfongen

Grappich

Tsja , at je der binne merke je der neat fan, tink ik. At je it út de loft sjogge is it wol grappich. Hoewol, it skynt dat sommige húseigners in skeafergoeding ha wolle neidat dit yn de belangstelling kommen  is, want sij freze dat harren hús minder wurdich wurden is.

800%

Ek yn 2014 hinget er wer in taalkalinder yn é hús bij ús. Taal...it bliuwt boeien. Fan sokke koppen yn de krante wurd ik net goed. It AD fanb ferline wike freed.
Hoe sil dit gien wêze? Ik tink dat ferslachjouwer Chris Klomp net sa faak bij it fuotbal komt en der ek net folle oer skriuwt en lêst. Hij hat op teletekst sjoen dat Groningens ferlern hat en hij hat fan dyn baas de opdracht krigen dêr iets oer te skriuwen. 

Hij bellet de trainer op en dy hat it oer acht 100% kânsen. Aha tink Klomp 800 % kânsen.

Oh ja...ik moat der wol bij sizze dat Klomp myn favorite sjoernalist net is. Hij hat jierren de berjochtjouwing yn it AD fersoarge oer de saak Vaatstra en hij die dat net objektyf.

Frysk

Sa sjogge je mar wer. Goed foarbyld docht goed folgen. 

Pop yn Romein

Freed 20 desimber wie der yn  Poppoadium Romein in aardich muzykevenemint. As ûnderdiel fan it wrâldrekord muzyk meitsje (mear as 360 oeren oan ien stik wei) wie der in fryske middei/jûn mei hiel aardige Fryske bandsjes. 

Bin der fan 5 oant 11 west en mei troch de strakke planning om it rekord te heljen koe ik mar leafst 11 bandsjes sjen en heare. En dêr wiene trije toppers bij. Dat wie yn it earst plak de band Stanton, dy't foar it lêst spilen. Dat is spitich want it wie hearlike rock. Ald Wommelser Simon Schoon spile net ûnfertsjinstelik gitaar.

De twadde band wie foar mij in bekende: Cosmic U. Yn Wommels op it Greidhoekfestival wie it foar mij de ferrassing en ek no fûn ik it wer in bysûnder moai optreden. It pakt je bij de strôt.....
En net allinne mij want it wie moai om te sjen dat minsken dy't (te let) binnenkamen earst wat weromhâldend mar dêrnei fol ferwûndering nei de twa manlju en twa froulju stiene te sjen. It "frjemde" sjongen fan Hiltsje Andringa mei de mystike lûden der bij makket it ta útsûnderlik moaie mominten. En seker at je krekt as mij foar oan bij it poadium stean...

Diff, in hearlike gitaarband, mocht ik ek wol lije. It swingde as in tyt en de stampfolle seal wist it tige te wurdearjen. Dy wol ik wol wer ris sjen (yn Wommelse bijgelyks)

Oh ja....
Ik haw ek noch efkes bij it glêzen hûs west...hiel efkes mar, ik waard der net oars fan.

3 nûmers letter

It is wat mei de bussen. Wêr't it foarhinne in tsjinstferlienend bedriuw wie, is it no net oars as in kommersjeel bedriuw. Bûn oan kontrakten mei oerheden mar wol yn de omstannichheden om der sels in ynfulling oan te jaan.
Mei grutte bliidskip haw ik de ynhâld fan it nije busboekje ta mij nommen. Bij wize fan sprekken dan, want ik leau dat der gjin busboekjes mear binne.  Foar de tiden kinne je no telâne op 9292.
Neffens de oankundigingen wie der hjir en dêr wat feroare. Dan hâld ik meast myn hert fêst. Feroaringen binnen yn dizze tiid hast altiten gjin ferbetteringen..
Line 92 fan Boalsert nei Ljouwert en foaral werom (nei Wommels) is feroare. Ik seach it freedtejûn krekt foardat ik ôfreizge nei in Popjûn yn Romein.
Ik koe myn eagen hast net leauwe. De lêste bus fan Ljouwert rjochting Wommels giet mar leafst 15 minuten letter út Ljouwert.
Net mear om 23.05 mar om 23.20.
Utdrukt yn muzyk, kinne je sizze dat wij 3 nûmers langer bliuwe kinne yn Poppoadium Romein of Asteriks.
Dy lêste trije nûmers binne dus de tajefte dy't ik hjirbij opdraach oan Arriva...

Ps: Noch in oerke letter is ek net slim....dan binne wij noch moai op tiid thús.

Sweeds gers

 

Wa is in Fries? Dat is in fraach dy't sa no en dan oan de oarder komt. Is in Fries immen dy't hjir hikke en tein is, hjir noch altiten wennet en Frysk praat. Of moat hij ek Frysk skriuwe kinne. En moat je om in Fries te wêzen ek Fryske boeken lêze?

Kinne je as ymport Hollanner ea in Fries wurde at je fol faasje begong binne mei de kursus Frysk foar net Friezen en dat Frysk dêrnei ek noch yn praktyk bringt. Kin dy Hollannder dy him ynset foar de Fryske klutuer en taal ea in Fries wurde?

 

Ik tocht der oan bij it sjen fan it boppesteande boerd. Al jierren hinget dat boerd op in hikke tusken Wommels en Easterein.  "Hier groeit Zweeds gras" stiet dêr al jierren.

Dat skynt better te wêzen foar de kij en it skynt ek better te rûken.

Al jierren groeit op dit stikje lân Sweeds gers. Wannear kin dat boerd der wei? Wannear is dit Frysk gers?

 

Jelmer yn WPB

Fleurich winterwaar hjoed. SDS moat út. Nei Berltsum. Yn de winter te fier op de fyts. Dan mar efkes nei Snits. Want Jelmer freon fan Anne-Marije sil wer meidwaan yn it earste. De need is heech want Jelmer stiet net echt te springe. Is al jierren op holden sa'n bytsje. Traint ek net folle. Klupleafde sille wij mar sizze. "It lykt wel 35 plus" seit er immen oan de kant. Richard de Jong en Tinus Vermaning dogge ek wer mei.
WPB it hat sich deljûn bij degradaasje neffens mij. Se wolle noch wol, mar it slagget net mear. Ien helte is it noch bij te hâlden dan is it oer. it Fean skoart yn de twadde helte 4 kear.
Jelmer stiet dan al oan de kant. Aanflarden.....kondysjoniele efterstân. Wol lekker spile, jout er oan.
Ferklomme werom...At ik yn Wommels bin haw ik mij wer waarm fytst.

Ard en Keessie

 In moaie foto yn it AD fan ferline wike.
Ard en Keessie, de twa mannen dy't ek yn myn jongesjierren helden wiene.
Op sneon en snein mei skema's op de skurte folgen wij it riden.
It Ek en it WK
Ard en Keessie ?

Anna Palowna en Puttershoek.

 Foar myn gefoel wie it gjin Ard tsjin Keessie.

 Foar myn gefoel wiene je foar beide. 

Beide hawwe se in soad wûn oan medaljes,  ja sels gouden medalje.

Ard bliuw altyd wat yn de publisiteit.

Ard hie syn medaljes nedich om te reizgjen.

Om wat fan de wrâld te sjen.
Ard wie de wrâldboarger.

No safolle jierren letter stiet Ard mei lege hannen mar wol mei prachtige herinneringen yn de holle.

En Keessie dy koestert syn metaal.

Ik tink dat dy noch yn Puttershoek wennet.

Yn it selde hûs

mei in muorre fol medaljekasten

Wa kin de beam yn?

Wij krigen dit jier in nijjierskaart mei de boppesteande tige nijsgjirrige en prikkeljende fraach.
De goeie lêzer sjocht dat er stiet wat de beam yn kin. Ik meitsje der fan wa kin de beam yn.
Sa'n fraach wie net yn ien wike te beanderjen, dêr haw ik wol in moanne as 11 foar nedich. Gjin 12.
Ik bin der út.
It leafste stjoerde ik ien man de beam yn. Hielendal allinne sa fier mooglik nei boppen sadat hij gjin kâns hat om de deskundige út te hingjen at it om Ajax, om de dea fan Mandela, om iisbearen op it waad, om korrupsje yn de polityk, om de dea fan Kennedy giet of oer de moard op Marinanne Vaatstra.
Boppe yn de beam sûnder tillefoan en ôfsluten fan de ether, de kabel en de satellyt sadat hij fier wei bliuwt bij bij programmamakkers fan P&W en DWDD.
De PR de Vries beam......
En at hij mei syn moaie praatsjes it folk oertsjûge kin dat hij immen mei ha moat om tsjin oan te lullen dan mei Bauke Vaatstra him selsskip hâlde.
De heit fan Marianne dy't nei it oppakken fan in ûnskuldige dieder bewearde dat hij no rêst krije soe, dat hij no bûten de publisiteit bliuwe woe en dat it no oer wie.
De man dy't no de oandacht noch mear op him sels festigt mei in belachlike skeafergoeding.

In soan derbij

It is hjoed 11-12-13. Dat skynt in moaie datum te wêzen om te trouwen. It duorret haw ik begrepen hast 90 jier foardat wij wer sa'n soarte fan datum krije. Dus at je dan dochs trouwe wolle dat kin it ek likegoed op dizze dei.
Om it noch aardiger te meitsjen is it tiidstip om te trouwen ek oanfullend: om 14.15 oere . Sa krije wij in 11,12,13.14,15 trou momintsje.
Grutte flecht op de koai om op dat tiidstip te trouwen.
Dus moasten sommige sykje om in alternatyf.

9.10 oere op 11,12,13 dat kin like goed.
De trou amtner moat der efkes earder út, de bruid hat moarns gjin tiid mear om noch nei de kapper te gean en de brêgeman kin de krullen net mear foar njoggenen oplapje. Mar fierders kin it best en hawwe je nei de seremony ek noch wat oan de dei.
Sa troude hjoed dochter Hildau mei Meindert.
In 9.10.11.12.13 troudei dus.
Mei dochter Jelske derbij, dat is net ûngewoan tsjintwurdich.
Sa'n troudatum kinne je hast net ferjitte. Dêr binne gjin smoeskes foar te betinken.
Wij nimme der jûn in pear op yn lytse rûnte.
Fan herte lokwinske foar it breidspear.

De molkbus

deYn myn kantoar brûk ik al moai wat jierren in molkbus as papierbak.  Net samar in molkbus mar ien dy't noch herinnert oan de tiid dat de Terpen hjir yn de greidhoeke 4 suvelfabriken hie. De datum jout oan dat dat goed 6 jier duorre hat. Doe gyngen der ferskillende fabriken ticht. Easterein, Wiuwert, Skearnegoutum en ta eintsjebeslút Wommels.

In prachtich beskildere molkbus, mei in oantinken oan de 4 doarpen. Net mei in byld fan it fabryk mar fansels fan de tsjerketoer. 

Yn de bus steane de initsjalen J.H.W. 

Dat soe Jan Hosftsra Wommels wêze kinne en dat soe betsjutte dat elkenien bij it ôfskie sa'n moaie bus krigen hat? Want dat hij dit sels skildere hat, is útsletten.

Mislearre

 

Kosten noch muoite wiene besparre op it kongres PO/VO ôfrûne woansdei yn Nieuwegein. De râne ferskynselen wiene yn oarder lykas de de ûntfangst de ynlieding en de tusken de middei hapkes.
Trije wurkwinkels koene wij foar ynskriuwe. De earste oer Privacy en Beveiliging wie prima. In sterk ferhaal en goed brocht.
Fol goeie moed begong ik dan oan oan de middei sesje. It soe gean oer de bekostiging fan it ministearje fan ûnderwiis en de weromkoppeling nei ús as skoallen. It soe dus gean oer ynformaasjefoarsjenning.

It ministearje hie ien of oare deskundige ynhierd fan in ien of oare organisaasje (foar it gemak neam ik de man mar efkes Twijnstra of Gudde.
Menear Twijnstra of Gudde wie al hiel lang lyn ynhierd troch it ministearje om de probleemkes út de ynformaasje foarsjenning te heljen en der in goed gehiel fan te meitsjen.
Menear Twijnstra of Gudde hie op kantoar wakker oan it tekenjen west mei ferâlderde en nije skema. Miskien hie der it ek wol dwaan litten. Dy kâns achtsje ik bij neier ynsjen grutter want menear Twijnstra of Gudde fertyske hielendal yn hoe't it wie en hoe't it komme soe.
No hie menear Twijnstra of Gudde ek noch pech of wie it gelok. Want fan de 30 oanwêzigen dy't yn de seal sieten, wiene der likernôch 15 fan it ministearje sels. Dy woene ek wolris heare wat menear Twijnstra of Gudde ûndersocht en betocht hie.
Menear Twijnstra of Gudde trof it dus net want al dy froulju fan it ministearje woene fansels graach merkbite litte dat sij wisten dat it net allegear sa wie as menear Twijnstra & Gudden allegear fertelde.
Hij bleau suver laitsjen en grapte sels dat dit wol in ûnferwachte ynteraktive wurkwinkel wie mar in gruttere ôfgong wie hast net tinkber.
En wij sieten der bij en harken al lang net mear nei de diskusjes dy't de ministearje froulju fierden mei menear Twijnstra of Gudde en de froulu ûnderling.
Wij wiene wol hiel bliid dat it oere om wie en dat it mar in heale minút útrûn.
De dei wie bedoarn, de oandacht bij de tredde wurkwinkel kaam net echt wer op gong en foardat de neisit begong riden wij al werom nei Fryslân.
Ferslein troch it foarbyld hoe't menear Twijnstra of Gudde in dei mislearje litte koe.