Kapsalon Buding

It stikje út Diggelfjoer fan febrewaris mei foto's

Kappersaak Buding  hat twa kear oan de Terp sitten. Hoe sit dat krekt?

Dit ferhaal fan kapper Buding begjint yn Schonebeek yn Drinte. 
Dêr wurdt Sjieuwke berne. Sij ferhúzet yn 1945 mei har heit en mem nei de Walperterwei yn Wommels.
Sij begjinne dêr in kapperssaak ( it pand neist kapsalon Bontje).
Yn 1946 is der in mooglikheid om oan de Terp (sichtlokaasje!) in saak te begjinnen mei mear romte. In romte foar mannen en in romte foar frouen en in “hokje” dat ôfsketten wurde kin want wa wol no in frou mei krolspjelden of wiet hier yn de kappersromte sjen?
Heit en mem hawwe beide harren eigen ôfdieling en dêrneist de húshâlding mei 4 bern. Sjieuwke moat helpe yn de húshâlding en de kapsalon at se 14 jier is.
In húshâldskoalle ôfmeitsje is der net bij.  
At se 16 jier is mei se nei de kappersfakskoalle sadat se it fak yn twa jier goed yn de fingers krijt.

Thús wurkje bij heit en mem is net altyd like maklik.
Se hat Jan Heeringa troffen bij it dûnsjen en sa ferhuzet sij mei Jan nei Snits.
Gjin kapper mear mar in karriêre yn it jaan fan dûnslessen.
Heit en mem Buding stopje yn 1972 yn Wommels en dêrmei komt der in ein oan dizze kapperssaak oan de Terp.
It pand wurdt ferkocht en de winkel krijt wol gauris in oare bestimming.
Antyk te keap dat sille sommigen noch wol herinnerje. Mar dan wurdt it 1986. Sjieuwke en Jan binne útelkoar en Sjieuwke  siket wenromte en in baan en fia it iene tafal nei it oare keapet se harren “eigen” pand werom.
Werom op it âlde nêst. Se hat 25 jier net kapster west, dus is it saak om de nije techniken en materialen te ûntdekken.
Mei Grietje Bijlsma krijt Sjieuwke  de saak oan de praat. Grietje is fan de nije generaasje kapsters en dat wurket prima.

Wij prate efkes oer de ferskillen fan dy earste jierren at se bij heit en mem yn de saak is en de perioade fanôf 1986. Wêr’t yn 1960 de krolspjelden de oerhân hawwe , is it yn de jierren 80  coup soleil of blondeare.

Wêr’t yn 1960 sommige manlju meardere kearen per wike lâns komme om skeard te wurden, is dat yn 1986 echt ferline tiid.

Wêr’t yn 1960 de salon iepen is, oant soms 9 oere jûns en sneons ek de hiele dei, wurdt it 1986 oant 6 oere en sneontemiddeis fanôf 12.00 oere ticht.

Wat wol gelyk bleaun is de lektuer. Panorama, Margriet en foar de bern de Donald Duck. Troch dat bledsje mochten bern graach nei de kapper gean yn 1960.

Yn 2005 is Sjieuwke stoppe mei de saak, mar se wennet der noch mei alle wille en hat genôch plak foar har hobby: teepûdsjes sammelje. Foto’s fan de saak yn eardere tiden kinne jim sjen op https://datfynik.blogspot.com/

Sjieuwke sparre earder ansichtkaarten. 

Gelokkich hat se dy bewarre fan harren eigen pand

Rûn 1910 siet der in winkel yn it pand sa te sjen.
Rjochts op de foto it bedriuw fan van Wieren/ Baarda

De brêge seach der ek oars út

Flak foar it pân wie der op de Terp in hoekje "tún",
mei romte foar de wask

It diakonijgebou links fan de dyk,
de kapsalon rjochts

In dûbele doar yn de kapsalon en op de bûtenmuorre wie te sjen
hoe âld it gebou wie

Briefpapier fan Buding út de jierren 50
mei in hierkrulspjellenapparaat der op.

It wie doe noch Terp 128 en tillifoannûmers hiene trije sifers