Hurdfytse

Moandei 10 augustus.

De Enecotour yn Fryslân

dat moatte je meimeitsje

earst bij de Bieren

letter bij de finisj

it begjint mei wat plysjemoters

allegear moters en de earste auto

en noch in auto

auto's. moters en plysjes

en de koprinners

en de kop fan it peleton

en wat oaren

en noch mear

en noch mear

en de lêsten alwer

dan noch in efterbleaune moter en auto en plysje

en dan de autos'mei fytsen

noch mear autos mei fytsen

en noch mear

ynhelje moat kinne dêr

auto's mei fytsen

ensafuorthinne

de sikenauto, mei plysje, in auto en in auto mei fytsen

de lêsten?

nee, efterbliuwers..

efter....efterbliuwers

efter...efter...efterbliuwers

de alderlêsten

yn Boalsert de Jumbo bus

yn Boalsert de finisj

op 300 meter

in kopgroepke

hast de lêste

de lêsten

Pypskoft

In moaie fytstocht snein yn de omkriten fan it Hearrenfean en Wolvegea.

it brêchje oer de Tsjonger efter Mildaam

en it slúske 

en it stille wetter

Selsbetsjinning op prachtige lokaasje dêr flakbij

en Pypskoft, wat in prachtich wurd om te brûken

Into the Grave

Ien foto haw ik nommen,
juster op it plein bij de Aldehou
bij it metalfeest Into the Grave.

Ien foto om mij der oan te herinnerjen
dat ik in stikje skriuwe wol
en dat ik dat stikje ek opfleurje kin mei in eigen foto.

Ien foto, haw ik mar
en dat is in ferdomd bytsje,
ik bin dan ek gjin fotograaf
want foar in fotograaf is dit neffens mij it fotoparadys

wat in portretten rinne dêr rûn:
stoere binken
swarte wiven
yn lear
yn koarte broeken
mei kettingen en noasringen
mei kistjes en lipringen
mei lange hierren
en lange burden
en mei in ferskaat oan prachtige teasjurts,
wêr't je gelyk oan sjen kinne,
wêr't se west ha
wannear dat wie
en wêr't se fen fan binne.

Myn griisblauesjurt paste net al hielendal
mar de tekst wol
"The Who....my generation"
om oan te jaan
dat de measten fan myn generaasje oer it algemien
net safolle hawwe mei metal.

Fanôf 15.00 oere dit folksfermaak meimakke
en it wie wer moai.
it wie myn fjirde kear dêr en
ik mei soks wol lije en krij der enerzjy fan.....

Into the Grave 2015
dizze kear haw ik sjoen:
Avatar (leuk)
Ensiferum (Finske folkmetal,dat mocht ik wol lije)
Obituary (de lûdsknoppen gongen flink omheech en efteryn wie it ek hiel goed te hearen)
Cannibal Corpse (goeie muzyk mar ientoaniger kin de sang hast net wêze)
Sepultura (de toppers fan de jûn, wat in enerzje, wat in fariaasje)
Sabaton (in prachtige ôfsluter mei bombastysk geweld en in protte fjoerwurk)

Om tsien oer alven
moai foar de drokte
in loopke nei it stasjon
en mei de bus werom.

it wie in moaie dei.....
sjoch de trailer (hjirûnder) noch mar in kear,
dy jout in prachtich byld hoe't it wurde soe en hoe't ek wie......



Tip foar de organisaasje:
Dit oantal liket mij echt it maksimum, en pisbakken oan beide kanten fan it plein, dat skeelt in hiele soad hinne en wer gerin.......

Jumbo

Jumbo is in supermerke keten
hast oeral yn Nederlân steane der winkels
en ek yn Wommels.
In moaie winkel,
wêr't wij yn Wommels wiis mei en grutsk op binne.

Al dy Jumbo's yn Nederlân binne ek sponser
fan in hurdfytsploech
Jumbo is giel dus de sjurts ek
dat sprekt fansels ek ta de ferbylding.
....yn it giel ride.... de dream fan alle hurdfytsers

dy dream hat Jumbo ta wurklikheid brocht,
foar alle klanten
want dizze simmer wiene der sjurts te krijen
at je foar sa'n 250 euro wat kocht hiene

Ik haw it sjurt binnen
net om der no gelyk yn te fytsen,want ik haw genôch oare sjurts.

Utsein Evert Tanja,
haw ik,noch gjin grutske sjurtbesitters sjoen yn en op de sosjale media.
Ik haw Evert der noch net yn fytsen sjoen
ek noch net yn meanen sjoen trouwens

Ik bin benijd hoefolle sjurts Jumbo hjir yn Wommels útjout.
Miskien moatte al dy Jumbosjurtbesitters
de kommende neisimmer dêr meielkoar efkes mei pronkje
mei it fytstochtje yn üs omkriten
as in aardichheidsje
allegear yn it giel........

Gjin wyn

It slotstik fan de SKS wie gjin sukses en it begjin fan de IFKS ek net.
Bledstil op it Iselmar bij Hylpen.
Gelokkich hiene wij in moaie lisfytstocht (70km). 
Mei, ik doar it hast net te sizzen, twa kear yn 'e wyn. 
Fansels mocht pontbaas Menno Sappe op de foto mei Jellie en brocht hij ús fan it Heidenskip nei de Gastmar.

Reinpakken

Mei ferbazing seach ik koartlyn in nijsgjirrige statistyk.

fan it CBS,
it Centraal Bureau voor de Statistiek.

sij hawwe op in rychje setten hoefolle kilometers Nederlanners fytse,

doe't se dat hiene,

hawwe se it ek noch foar alle provinsjes apart berekkene.

Hoe't se soks berekkenje, is mij net dúdlik.

Der binne net folle minsken dy't it sa goed bijhâlde as mij,

alle kilometers wurde al tsientallen jierren yn tabellen en grafiken setten.

Mar it CBS hat mij neat frege....

Sa'n 1000 kilometer fytst de gemiddelde Nederlanner per jier,

dat is 2.9 kilometer per dei

ik fyts der 11.000 gemiddeld per jier,

en dat is sa'n 30 per dei.

dat is nochal in ferskil.....

hoe sit dit?

Ik nim de proef op de som.

ik doch in rûge skatting fan it eigen buertsje

trije huzen lofts en fjouwer huzen rjochts

ik skat yn dat der minsten 5 buorlju binne
dy't it doarp net útkomme op de fyts,

en dan giet it mei de kilometers net sa hurd.

ik konstatear ek dat er  2 bijsitte dy't ik noch nea fytsen sjoen ha.....
ik skat ek yn dat der trije binne dy't wolris fytse mar it lânlik gemiddelde ek net helje;

gelokkich is Jellie der noch

mei sa'n 4000 yn it jier  is dat suver lyk as mij in dissonant op de buert

al mei al:
miskien hat it CBS wol gelyk.......

Fryslân bliuwt wat efter bij tal fan oare provinsjes 
dus moat it fytsen stimulearre wurde yn Fryslân,

seit men.......

Stimulearje mei mear fytspaden?
Stimulearje mei bettere fytspaden?
Stimulearje mei snelfytspaden?

Ik leau der net sa yn.
Fytse is hjir synonym oan hurde wyn

en fytse is oeral synonym oan reinwetter.

Dy wyn kinne wij net folle oan dwaan: 
miskien wat mear lege begroeiïng hjir en dêr...

It reinwetter?
Statistiken fan fêste fytsers wize út dat it minder as 10 % reint.

Mar at it reinwetter it probleem is, soe ik sizze: 

Provinsje, jou alle ynwenners in goed reinpak, 
dan kin dat net mear de smoes wêze,

om net te fytsen.

En it bijkommend foardiel is dan dat paraplus ferbean wurde kinne op festivals en eveneminten lykas it keatsen,

Gewoan it reinpak mei, krigen fan de provinsje.....

Fluitsjend troch it libben

Snein in rûntsje om.

Burchwert-Hartwert-Kliuw

Hartwert dus....

Stoffel dus.....

Kommende woansdei mist hij syn twadde PC.

mear as in jier lyn ferstoarn

In moaie tekst op syn stien

Fluitsjend giesto troch it libben

en sa wie it

Heroine

Yn NRC dizze wike in artikel oer de heroine dy't de Amearikaanske eastkust bedriget.
Talrike jonge (mei namme fammen) wurde slachtoffer.
Alders steane machteleas  oan de kant.
Sij wolle altyd it goeie en steane betiden foar in lestige kar

Helpferlieners sizze tsjin dy âlders:

U staat voor een verschrikkelijke keuze,
U kunt haar in huis houden, en dan gaat ze zeker dood.
Of u kunt haar het huis uitschoppen, en ze heeft nog een kleine kans Dan krijgt ze misschien nog een prikkel om iets te proberen

Omfytse

De Moezel,
in prachtige rivier om lâns te fytsen
mei goeie fytspaden, leuke stedsjes en net te min wynfjilden.

De Moezel,
in rivier mei bochten
slingerjend troch it lânskip

De Moezel
307 kilometer lang
en sûnder te klimmen
is ôfsnije hast net mooglik

Sjoch de foto hjir boppe
bij Punderich...
De blaue line is 500 meter
in oerstek troch de heuvels
stiging fan 15 %
net te fytsen mei bagaazje
daling fan 15 %
net te hâlden dy fyts mei bagaazje

de reade line is it fytspaad
11.5 kilometer

wij fytsten lâns read
yn de wyn, sydwyn en foar de wyn.

typysk de Moezel

De Spar yn Ens

Ik freegje mij wolris ôf wat der gebrûk fan makket,
gebrûk makket fan in kofjesetapparaat,
yn in winkel.
Sjoch bij Jumbo Wommels wolris guon stean
op sneontemoarn
op deselde tiid
kofjetiid sis mar,
wêrfan ik tink: dy sparje thús de kofje út......

ik sjoch mij dat sels net sa gau dwaan .....
Hoewol...

Wij sliepten fan tongersdei op freed
op in kamping yn de buert fan Kampen.
In kamping sûnder foarsjenningen en dat betsjut
moarns gjin kofje en gjin farske bôle.

Regele is dan dat wij fan de earste de beste (horeka) gelegenheid gebrûk meitsje.
Dat wie dus Ens.
Alles ticht útsein de Spar
Ek goed.....
Farske broadsjes wie it  begjin en....
jawol, in kofjetafel mei in krantsje derbij.

En sa sieten wij dus yn Ens
yn de Spar kofje te drinken en it krantsje te lêzen.

En as ekstra tsjinstverliening mochten wij ek noch gebrûk meitsje fan it húske,
want  twa bakjes kofje dat wurket goed.....

Us winkel fan it jier is de Spar yn Ens.....

Boris

Ik haw it altyd sein:
in hûn deryn, dan ik derút
en no is it sa fier.....

Dit is Boris,  in Dútske herder
hij wennet no yn ús hús;

hij is sljocht op
bratwursten,
schweinefleis
und karbonade
mar dy krijt hij net de kommende trije wiken...

hij sil it dwaan moatte mei
hingjende knakwoarsten,
slappe frikandellen
en mjitske kattebrokken

Hij is ek sljocht op ynbrekkers
en dat komt moai út.

want wij binne der net
wij dogge in rûntsje Koblenz:
fytsfakânsje

de kommende trije wiken
dogge wij ús te goed oan
bratwursten,
schweinefleis
und biefstuk

Oer trije wiken giet hij der wer út
en kom ik der wer yn,
alteast dat hoop ik....

(dit berjocht is fia de Google oersetter  maklik oer te setten yn it
Roemeensk, Poalsk, Bulgaarsk en Nederlânsk)

Wat in dei sa'n Frysman dei

Ik hoop dat jim der allegear wat fan mei krigen ha:
de Frysman, it triatlonspektakel,
mei start en oankomst op it Reaklif.

At jim der net west ha, wie dat in miste kâns,
om te sjen wat dizze triatleten presteare
hoe't se dat dogge en
om te sjen wat der foar nedich is om te mooglik te meitsjen

Trije dagen hawwe wij Helden Helpers west, mei in hiel soad genoegen;
wat wie dit geweldich om mei te meitsjen.

Sneintemoarn, de wekker op 5 oere
om miskien noch in hantaast te dwaan foar de start;
de start mei 22 graden op de thermometer
wat in prachtich gesicht fanôf it Reaklif

















3,8 kilometer swimme
de snelsten binnen it oere,
de lêste nei in oere en 40 minuten of sa

En dan op de fyts foar 4 rûntsjes fan 45 kilometer,
troch de prachtige súdwesthoeke
mei al syn bultsjes.

Moarns mocht ik wetter fulle  foar de fersoargingsposten
en de trochkomst fan de fytsers meimeitsje
en fanof 1 oere stie ik op Laaksum
om de dravers fan wetter, kola, snoepkes en dropkes te fersjen
en fan oanmoedigings fansels.....

Seis kear kamen se lâns
om de 42,2 kilometer te folbringen
en bij alle trochkomsten
seagen wij se wurger wurde.
wurger, mar net sagarijniger
laitsjend en fleurich en tankber,
dat wij der stiene,
en mei it kredo: "blijf lachen"

wat in atleten dy tri-atleten
wij libben fansels mei harren mei
yn de striid tsjin de betiden ferskriklike waarsomstannichheden
en sij libben mei ús mei....
wylst wij oan de tinte hongen yn in fûlendige stoarmbui.

Wij seagen alle rûntsjes wer út nei Hielke,
de fryske reus dy't it sa dreech hie...

wij seagen út nei dat Dútske fromminske,
dy't de iene rûnte "ein bier" woe, de oare rûnte "zwei bier"
en de lêste rûnte om in  "pizza" rôp...

Of nei dy Belch, dy't fier efterop rekke wie troch lekke bannen
en dy't op tiid oankomme woe,
mar sa relakst bleau
en alle ronden tiid hie foar in praatsje,

of de twa dútsers, dy't ús broadsjes "kase und schinken" opieten
omdat se flau wiene fan de bananen
en sa fleurich de lêste rûntsjes diene...

fleurich bin ik ek wurden fan de Vries,
in spontane frijwilliger út Warns
moaie ferhalen en sa entoesjast
en in goeie soarch foar de atleten:

syn "wûnder" hannen massearden of drukten der op los
sadat se wer fierder koene.

Acht oeren stiene wij dêr op de dyk bij Laaksum
en it ferfeelde nea..

it wie sels wûnderbaarlik dat al dy dielnimmers ús gewoan persoanlik tank seinen
tidens harren lêste rûntsje



Ik nim  myn Frysman pet ôf  foar de organisaasje,
dit kin allinne mar opsetten en trochsetten wurde troch befleine triatleten,
mannen en frouen dy't in doel foar eagen ha,
dy't witte wat it is om ôf te sjen
en dy't it mei leafde diene foar harren sport

Wij hawwe it sjoen oan ús soan Tsjeard dy't dit in part fan syn libben makke hat
en ek in part fan ús libben no, troch syn entoesjasme

Dizze organisaasje fertsjinnet takem jier in hiel soad frijwilligers,
sadat it foar harren wat lichter wurdt.

Ik bin der wer bij en "myn deifreon" de Vries fan Warns ek,
ik tink mei in massaazjetafel.......

Never to old to rock

Mei dit sjurt gie ik juster op stap
nei de Ziggodome yn Amsterdam.
It slacht in bytsje op mij sels,
mar it slacht foaral Pete en Roger.
of te wol Townsend en Daltrey fan the Who

"Never to old to rock"
dat lieten ze sjen justerjûn
Daltrey (71) Townsend (70) kleunden der yn
as yn harren beste tiid
der waarden noch krekt gjin gitaren stikken slein
mar de gitaarswyp fan Townsend liket noch like linich as sis mar 40 jier lyn,
en net te ferjitten dy geweldige drummer yn syn glêzen húske op it poadium

It konsert begong yn feite al om goed 6 oere,
hûnderten fans soargen fan te foaren al foar in moaie ûntspannen sfear
op it plein foar de Dome
dat wiene net allinne âlderen,
mar ek de jeugd wit de mzuyk fan de Who op wearde te skatten

In prima foarprogramma mei "the Last Internationale"
en dêrnei prachtige âlde bylden fan the Who
op de super grutte skermen

Om 9 oere gie it los en troch in fantastyske resjy efter de bylden
waard  it gewoan in intym feest
en wat foar feest mei al dy meisjongers
lykas Pinball Wizard, See me, feel me en My Generation

In machtich moai konsert dat tsjin alven dien wie
gewoan sûnder tajefte, want se hiene alles al jûn
en it wie genôch.
It wie best genôch.

In nij boek

Dizze foto haw ik fannemoarn makke bij Deinum;

in oaljefantepaadsje nei de ferbeane grutte dyk

dy't ôfsletten is foar it ferkear.

De foto jout in byld wat paste bij myn reisdoel.

Dit oaljefantepaadsje is hast net te finen.

it noeget net út om lâns te gean 

mei kriebels lofts en stekkers rjochts

mei amper sicht wêr't je útkomme.

Mar minsken dy't hjir lâns gean litte harren net keare of weromstjoere.

sa fielde it fannemoarn ek wol wat

doe't ik in ôfspraak makke hie om it boek

"Het Vaatstra Complot"op te heljen.

net út in boekhannel oan de Nijstêd,
mar efterôf op de romte, 

bij in oare komplottinker.

it wie foar it earst dat ik spruts mei in oare komplottinker,
it waard in alderaardichst petear.....

wij dielden ús miening

wij dielden ek ús gefoel

dat je hast oansjoen wurde foar "wrâldfrjemd"

at je noch altiten fan miening binne dat Jasper S

de moardner net wêze kin

en dat de oerheid korrupt wêze kin.

moai dat ik op myn eigen blog skriuwe kin wat ik tink en wat ik fyn

it hjit net foar neat "datfynik"

Ek dit boek sil ik wer lêze,

hoewol ik hast alle feiten al wit

troch it oare boek en ynternet publikaasjes.

en mocht immen it ek lêze wolle, dan kin dat.

Graach sels.

Roan

Al wer 4 moanne âld 

en it is in lust 

om nei him te sjen

gewoan sjen...

of  útsjen nei
syn laits

machtich

45 kilometer folderje

Wat in prachtige fytsroute hawwe se makke foar de triatlon
fan sneon 4 july yn de Súdwesthoeke
It Frysman fytsrûntsje is 45 kilometer lang en hat alles:
iepen fjilden,
winerige seediken,
tsjustere bosken,
romme bochten
moaie diken
en ....
alle heuvels dy't er yn Gaasterlân binne
binne opnommen yn de route.

Fjouwer kear moatte se dit rûntsje ôflizze
neidat se earst 3800 meter swommen hawwe yn it Iselmar
bij it Rea Klif
en foardat se de 42,2 kilometer noch draven gean,
in rûntsje fan 6 kilometer mei
7 kear de beklimming fan de "Leaver dea as slaaf" bult

Wij fytsten hjoed de 45 kilometer
en it draafrûntsje fan 6 kilometer
en dat wie ús genôch
mear as genôch
want wij mochten yn alle brievenbussen
dy't oan de route stiene
in struibriefke dwaan
mei dêrop de meidieling dat it fijn is om oan de route te wenjen
en dat men op 4 july rekken hâlde moat mei dit spektakel.

Folderje oer in lingte fan 45 kilometer
wat in gedoch (wol graach dien!):
sykje nei huzen
sykje nei brievebussen
en sykje nei iepeningen yn dy bussen

wat in ferskaat oan bussen
en wat in ferskaat oan plakken
wêr't se de bussen delsette of oanhingje.
it wie betiden in syktocht.

Wat in gelok dat de PTT earder betocht hat
dat in brievenbus net te fier fan de dyk ôf  wêze mei
en dat in grut part dus hast fytsend te berikken binne

neist al dat op- en ôfstappen
moasten wij dy ferrekte heuvels ek noch op..

in muorrebus

Noch in bysûndere útstalling fan diggelguod bij Nijemardum

Underdiel fan de stien route yn Gaasterlân 

in brievenbus

in nij útsichtpunt efter Nijemardum oan de seedyk

mei sicht op wynolens tusen de Lemmer en Urk

Jellie hâldt wol wat fan rinnen

Underweis it goeie doel noch stipe foar in nútekeek

somtiden moast Jellie wol hiel fier fuort om in brievebus te finen

Pleats bij Warns mei in hiele goeie tekst

Sjoch op dizze wepside en kom lâns
bij it episintrum fan it barren
dat is bij it Rea klif

en dêr leit dizze stien

In feesie yn Hollân

Wij hiene in feessie
dat komt wol faker foar
meastal is dat yn de buert
dizze kear yn Akersloot
dat leit tusken Alkmaar en Haarlem

De wyn is de lêste tiid noard
dus, dus
tochten wij:
wij gean op de fyts.

Sneontemoarn om 8 oere fuort
mei de wyn yn de rêch
en middeis om healwei trijen wiene wij  yn Heemskerk
in sliepadres bij Vrienden op de Fiets
alderaardichste weduwefrou
Wij hiene doe 114 fytst

it feessie wie yn Akersloot
fanút Heemskerk 7 hinne
lekker iten en dronken
en 7 werom

Sneintemoarn nei in goed moarnsbrochje
rjochting Enkhuizen
de natoer hie syn wurk goed dien
de wyn wie súd

Enkhuizen
fisk dus
mei it boatsje oer
nei Starum

De wyn wie ynienen súdwest
dat wie seker net ferkeard
en  it leste stikje fan de Bieren ôf
nei Wommels ta
wie de wyn west.

nei 98 kilometer thús
mei sneintemoarn twa oerkes wat wetter
mar fierder in hiel soad mei de wyn yn de rêch

Steatsoplichterij

Mislik
dat radio (miskien ek wol TV) spotsje
fan de Steatslotterij

De grutte baas kondigt oan
dat se it better dwaan gean,
earliker foaral
dat se ek better kommuniseare sille,
omdat wij dêr rjocht op ha

Ja, ja.....
Mear as twa jier lyn skreau ik dit op myn blog
ik haw mij doe oansletten bij de stichting Loterijverlies

sij hawwe mei meardere rjochtsaken
boppe tafel krigen dat dy baas fan de Lotterij
no it grutte publyk paaie moat.
mei belachlike teksten

Hij hie sizze moatte:

Beste minsken,
Ik stean hjir  mei in djipreade kleur,
wij hawwe jim jierren besoademitere,
en dat wisten wij wol,
mar wij woene it net tajaan,
de stichting Loterijverlies hat ús der opwezen,
hat rjochtsaken wûn en no moat ik tajaan
dat jim te koart kommen binnen
wij hawwe jim prizen ûntholden
de kâns op in priis wie folle lytser as wij seinen

ik skamje mij kapot
en biedt jim oan om de periode dat it mis west hat
no frij mei te spyljen
gjin ynlis
mar wol kâns op alle prizen

De stichting Loterijverlies fynt dit er fan:

Reclamecampagne Staatsloterij volstrekt onacceptabel

Wellicht heeft u de afgelopen dagen reclame gezien of gehoord van de Staatsloterij. Hierin geeft de Staatsloterij aan dat zij het vervelend vindt onduidelijk te zijn geweest in haar communicatie. Maar, zoals bekend, de Staatsloterij heeft u jarenlang in feite gewoon bedrogen. Dat de misleiding op kleine schaal heeft plaatsgevonden is bovendien onjuist, aangezien er meer dan een paar honderd miljoen euro aan beloofde prijzen aantoonbaar nooit werd uitgekeerd. Bovendien is deze campagne een schending van de afspraken tussen de Staatsloterij en Loterijverlies. Wij zullen er alles aan doen deze campagne te laten stoppen.

Jan B

De Blokhúspoarte wie in finzenis
yn Ljouwert
de finzenen binne der net mear
it gebou noch wol
de sellen ek

de Blokhúspoarte is no it kulteriele hert
fan Ljouwert
mei mooglikheden
foar kreative geasten
om wat te betinken en út te finen

dat kin dan yn ien fan de sellen

Ik soe graach ien sel reserveare wolle
foar in kreative geast
in hiele kreatieve geast wol te ferstean
om syn talint noch mear ûntwikkelje te kinnen
syn talint
om minsken del te sabeljen
bestjoerders te kak setten en te misledigjen
te leksoaien oer alles en noch wat,
om slachtoffers te meitsjen,
folle mear slachtoffers
yn dat lytse keatswrâldsje

it moat him dochs slagje
mij syn oanwêzige talint
om se allegear fuort te skriuwen
ja, fuort te pesten

sadat hij der aanst hielendal allinne sit,
op de parsetribune
mei syn pinne en syn boekje
om de bûtenslaggen te notearen
te seuren oer de kofje
en it plak wêr't er sitte moat

it moat him slagje om de titel
"grutste feech út de panne sjoernalist"
te pakken
it moat him slagje
om Johan Derksen foar te bliuwen

at hij mar lang genôch yn de sel sit
en him fierder ûntwikkelt
mei de doar op slot......

dizze Jan B.

dy't  him sels sjoernalist neamt
en objektyf en ûnôfhinklik
en noch slimmer keatsleafhawwer

de man dy't gjin inkele positive bijdrage levert oan it keatsen
en dy't  je persoanlik ferantwurdlik hâlde kinne
foar de teloargong yn it keatswrâldsje

Festivals

NRC Next publisearre ferline wike
in kaart mei festivals yn Nederlân.

Alles stiet der op neffens harren
en dat betsjutte dat it Noarden in wite flek wie
der wie neat.

Tal fan reaksjes kamen der
en in moaie nije kaart
mei dêrop alle festivals
yn it Noarden

en om grutsk om te wêzen yn Wommels
Greidhoek'festival stiet er fansels ek bij..

Tinte

De earste ideeën oer de fakânsje begjinne te kommen,
op de fyts
dêr binne wij it al wer oer iens

B&B of in tinte mei
in lytse tinte of de iets gruttere
foar de wissichheid
de "swiere" mar efkes opsetten.
slagget dat noch
is alles noch kompleet...?

Yn 12 minuten
en alles kompleet

Poes sjocht de bui al wer hingjen,
dy tinkt:
dy gean ynkoarten wer fuort
en bin ik wer oanwezen op de buorlju

13 kear in famyljewykein

De ôfrûne 14 jier hawwe wij 13 kear in famyljekamping wykein holden.
de Holtroppen
It earste wykein nei Pinkster
besykje wij in kamping foar ús sels te krijen

Twa kear binne wij op it selde plak west
ien kear hawwe wij it fanwege it waar net trochgean litten

Hooghalen wie de earste
Bourtange wie it fierste
Boazum wie it tichtste bij
en Kolderwâlde wie de lêste

It moaiste ferhaal giet oer Nijbeets
Dêr soene wij net hinne.
der wie in kamping boekt yn Noard Hollân
dúdlik oanjûn dat oare minsken net wolkom wiene
fanwege it geseur oer nachtelike muzyklûden

doe't de earsten der oan kamen
nei 80 kilometer riden of fytsen (wij dus)
die bliken dat dizze ôfspraken
yn Noard Hollân neat wurdich binne

gau beret,
 hjir geane wij net hinne
ien fan de famyljeleden sei doe:
"dan kinne wij better bij ús op it hiem"
en sa barde
wij strutsen del yn Nijbeets
"Kamping it Alternatyf".

Wat langer as in wike

in boek per wike
dat is it tema fan de byb
wêr't ik besykje ynfulling oan te jaan
\
in boek per wike
dat slagget aardich al is it mei muoite

Boek nûmmer 22
"Een van ons"
fan Asne Seierstad

Ik doar hast net te skriuwen
dat it in prachtich boek is...

dêrom sis ik dan ek mar
"it is in freeslik boek,, "
omdat it in freeslik ferhaal is...
oer Anders Breivik
de man dy't in bom yn Oslo dellei
mei 8 deaden
en op it eilân Utoya
mei 69 deaden
hast allegear bern
dy't hij gewoan deaskeat
mei ien of meardere skotten

Skriuwster Asne Seierstadt
in oarlochssjoernaliste
hat der in lêsber ferhaal fan makke

In boek per wike
dat slagge mei dit boek net
it freeslike ferhaal wat him ôfspile op it eilân
lêsde ik net samar efkes troch....

Mear as twa wiken haw ik der oer dien....
mar it wie de muoite wurdich

Brother Dede

Kom tocht ik sneon
nei 3 minuten harkje

lit mij ek ris in stikje opnimme
fan dat hearlike jankende gitaarke....

in minútsje mar
as herinnering
oan Brother Dege út Louisiana

dy't echt foar fiif hânfol minsken stie op te treden
op de Luchtplaats
fan de Blokhúspoarte

it koe
want ik wie net ien ta lêst
want der wie nimmen
dy't efter mij stie.

Prison Blues

In moaie lokaasje,
perfekt waar
goeie muzyk
en toch....
mankearde der wat oan:
 it wie wat sfearloas

Dat is myn konkluiuzje
nei in jûntsje Prison Blues

De Blokhúspoarte wie de lokaasje
neat mis mei,
in binnen en in bûtenpoadium
neat mis mei,
sfearfol terras mei in sitje hjir en dêr
neat mis mei
in ferskaat oan iterskreamkes
oan dy fan de Hotdogs wie neat mis mei

en toch kaam it net los
fierstentemin minsken
dy't at se op de Luchtplaats oankommen
harren ôffregen "wêr is elkenien"

hawar
neat fan oanlûke
ik kom foar de muzyk

oan de bands mankearde neat.
mar wat hat it no fan sin om twa bands tagelyk te plannen
en tuskentroch minstens in heale oere omhingskoft?

Sa slagge it mij dus net om de echte bluesband The Tightropes út te sjen
want ik woe efkes nei Dario Mars & the Guillotines (allinne om de namme al)
en at dat sa leuk is, kom je dus net werom bij The Tichttropes....

En nei trije kertier wachtsje
want hoe is it mooglik, beide healwei achten band begongen in kertier letter,
moast ik wer kieze,
de twa jonges fan Scrappy Tapes yn it sellenblok

Brother Dege

moasten opbokse tsjin Brother Dege (út Louisiana) op it bûtenpoadium
sneu foar de twa, nei trije nûmmers dochs nei bûten
en ik bleau hingjen bij in moaie lûd fan the Brother

bij de oansteklike Bluesgrassklanken fan  Blues Grass Boogieman
yn it sellenkompleks
kaam de stimming der suver wat yn.

wat in gelok dat de organisaasje yn de gaten hie
dat de tribute oan Herman Brood
sûnder de oankundige Piter Wilkens,
pas begjinne mocht doe't de Boogieman út bluegraast wie

Wol, in moai en stevich ein dy Brood muzyk
en ta beslút
in moaie bijkomstichheid wie
dat it op tiid dien wie,
sa betiid sels dat ik in bus earder nei hûs koe.

Konkluuzje: goie muzyk, te min minsken en in minne programmearing

Doe't ik bij it station lâns rûn, galmde de pianoklanken yn de hal....moaie muzikale ôfsluting fan de jûn.

Hjir ûnder in
Klipke fan Dario Mars & the Guillotines, wat ik persoanlik it moaiste optreden fûn

Gier

Ik fytste krekt oer de Littenserbuorren
de dei nei.....
want juster wie dit tydlik efkes
it middelpunt fan de ierde
foar fûgelspotters

in groep feale gieren (goed Frysk?)
wie it paad kwyt rekke
sa't men seit
want it bart mar in inkele kear
dat dy bisten hjir te sjen binne.

it paad kwyt en op de Littenserbuorren bedarje
dat is tusken Wommels en Waaksens
en letter wiene se bij Burchwert en Hichtum
dat hiene de feale gieren nea tinken kinne
doe't sij Spanje of Portugal ferlieten

ik haw de feale gieren net sjoen
nettsjinsteande de meldingen op twitter,
is dat in miste kâns
at je witte dat se der binne
en net de muoite nimme
om dy trije kilometer efkes te fytsen?

Nee hear,
it is dêr sûnder dy gieren ek prachtich
mei al dat oare fûgelguod
sa as kening fan de greide

en ik haw der gjin behoefte oan
om alles mei eigen eagen te sjen,

it moaie is foaral dat ik troch dizze meldinge
en mei help fan Wikepedia en Joetjoep
no alles wit fan feale gieren