Michiel Hiemstra stoarn,
in karakteristike doarpsgenoat
en in man fan myn generaasje
De KV Wommels frege mij
om wat te skriuwen
as oantinken oan Chiel,
want sa neamde is him
Sjoch hjir
woensdag 30 juni 2021
Fytse, farre, fytse, busse, fytse
Moandei
op de fyts nei Starum
dat binne 37 kilometers
foar de wyn.
Wachtsje op de boat
bij it keunstwurk
Farre,
sa'n 25 kilometer nei Enkhuzen,
18 km per oere
op in rêstich mar,
mei mar 8 fytsen oan boat
en 9 minsken
lâns in tagongspoarte yn Inkhuzen
lâns de fjoertoer op wei nei Andyk
de roze buorden folge nei de bus
dy't it fytspaad ferfangt
want dat is jierren ticht op de Ofslútdyk
Mei 3 fytsen yn de bus
nei Koarnwertersân
Noch 22 kilometer nei hûs
yn de wyn,
dat dan wol wer
In moaie tocht fan 106 kilometer
dinsdag 29 juni 2021
Humor yn de tsjerke
Marten de Boer fan Easterein
hat earder ek alris in boekje skreaun oer de tsjerke:
Dûmny jo ha my wol ris mear ferfeeld'.
Der sil noch wol mear boekjes mei humor wêze
oer dûmny's en tsjerken.
Ik kaam dit stikje tsjin yn de krante:
zondag 27 juni 2021
Hichtepunten
Trije hichtepunten, der gongen wij sneon foar.
Letterlike hichtepunten wol te ferstean.
Wij moasten der wol 92 kilometer foar fytse.
1. It brechje fan Bartlehiem
Foar sommigen minsken in symboal.
Foar mij net.
In hinderlike hindernis
omdat je der net bij op fytse kinne
In rinbrêchje op fytspaden
ik haw der in hekel oan.
"Je moet er twee keer langs"
je moet er twee keer langs"
seit in entûsjaste Hollanner
at wij der oerhinne rinne.
Ik sjoch him oan en ûnnoazel "oh ja"?
"Ja, je moet er twee keer langs"
Ik haw "gjin idee" wêr't hij it oer hat
Wij fytse fierder
2. de terp fan Hegebeintum
De heechste terp fan Fryslân
en dat mei elkenien witte.
In nij besikerssintrum moat dizze attraksje helpe
ta in symboal út eardere tiden te wurden.
It is in moaie klim
en it hat wol wat dêr op de fierders keale flakte
3. De seedyk bij Swarte Hoanne
Bij Swarte Hoanne stiet de slykwurker
In symboal fan de Bildtkers
dy't oan it ynpolderjen west hawwe.
De striid tsjin de see en tsjin de blubber
92 kilometer fytst, wêrfan 200 meter mei de boat.
Bij Keimpetille stutsen wij it van Harinxmakanaal oer
en fytse fia in net bewaakte oergong it spoar oer nei Wjelsryp
donderdag 24 juni 2021
Kokosnuten
Wat in moaie moarn.
Ik fytste troch Spannum
en betocht mij
dat dêr noch immen is dy't myn heit goed kind hat.
Dy tip hie ik in moanne lyn krigen.
Frou B. is 95 jier,
ik wist wêr't se wenne
en sij wie yn de tún yn de slach mei ûnkrûd.
Ik ferteld wa't ik wie
en sij noege mij entûsjast út mei de wurden
ik haw ek noch wat yn'e hûs fan jim heit.
Ik wie benijd.
Oan de kofje en oan de praat.
Prachtich, op dy leeftyd noch safolle witte
en sa bij de tiid.
Sjoch sei se
dit hawwe wij krigen fan dyn heit
doe't hij út Yndie kaam (1949)
en doe't wij trouden....
Har man (A.) wie de ienige dy't dy twa jier
dat heit yn Yndie siet, faak skreaun hie
oer hoe't it yn Spannum wie en sa.....
Twa útsnijde kokusnúten
dy't je foar de smokerij brûke koene.
Frou Beukens hat it no 70 jier yn besit
Prachtich dat sa'n kadootsje
mei sa'n ferhaal bewarre is
Keunstkuier
Yn Penjum is oan't 3 july de keunstkuier.
In noflik eintsje rinne flakbij en yn it doarp
bij in 30 tal keunstwurken lâns.
En in slach troch in doarp
mei syn karakteristike dingen
maandag 21 juni 2021
zondag 20 juni 2021
Pankoekite
Doe't ik sa'n jonkje wie, sa âld as dizze trije,
ieten wij ek wolris pannekoeken thús.
Dat wie dan op tiisdei.
Nea op in oare dei.
Us mem hold fan fêste skemas
De iene tiisdei echte brúne beannen,
mei in klûntsje Blaue Bân, spekjes en smots,
de oare tiisdei pankoeken mei sjerp of sûker.
Net beide, it wie of sjerp of sûker.
Wij dogge it no at wij de jonges ferrasse wolle.
Hearlike ferhalen tsjinelkoar, dy heare wij dan.
Sa seit de iene, dat sûker net goed is
wylst hij de sjerpflesse hast op de kop hâldt.
Se kinne it hiel goed meielkoar fine
en lústerje goed nei elkoar.
It wie in hearlik pankoekfeessie
en dat op sneon,
Oh ja, it wie net kâld yn de hús hear.....
zaterdag 19 juni 2021
Biljerte
Ik bin yn de bieb,
en dêr leit de gids fan ús fierstentegrutte gemeente.
Nijsgjirrich as altyd, nim ik ien mei
In gids, ik bledderje him troch
en konstatearje dat de adfertinsjes hast eachje as redaksjoniel nijs.
In gemeentegids, foar wa is dy en wat stiet der yn?
freegje ik mij ôf at ik in poging doch om der wat wizer fan te wurden.
It is mij net slagge.
Wat in bealch fol wurk foar.....
Ja, foar wa soe dit no wêze?
It is in brij oan adressen fan ferienings.
Ik wit net at se bij ús fierstentegrutte gemeente ek witte
dat er ynternet is.
Dat je dêr altyd aktueel binne en mei sa'n gids net.
Weismiten jild neam ik it....
Ik bledderje oan de ein ta
(ja, ik bin in trochsetter)
en stuitsje op de biljertferienings yn de gemeente
Mar leafst yn 40 plakken is in biljertferiening
en yn sommigen sels mear.
Toppenhuzen spant de kroan,
dêr hawwe se 7 biljertferienings mei dizze biljertnammen:
- Krekt oer it lekken
- de Trochsjitters
- Dwers troch it lekken
- Fan kyt ôf út
- Oer de Bân út
- Oer de Raede
- Wat dacht je wat
Yn oare doarpen hawwe wij ûnder oaren dizze:
- Arum - Een voor Een
- Burchwert- De Twastriid
- Eksmoarra - 't Keutje
- Eksmoarra - de Stootsters
- Gastmar - Nea tocht
- Hartwert - Nocht en wille
- Heech - de Kromme Keu
- Heech - Frjemde ballen
- Himmelum - de Kromme Keu
- Hichtum - de Wille Stjitters
- de Hommerts: fan los út
- de Hommerts: mei trije oer trije
- it Heidenskip: it Krytsje
- Kûbaard: de Fleanende Bal
- Nijlân: Op it griene lekken
- Wâldsein: de Poedelaar
- Ysbrechtum: Brike Pjukkers
- Zurich: de Pompers
Dat mei neat út dizze gids fermannichfâldige wurde mei,
dan wol iepenbier makke wurde,
sûnder tastimming fan de útjouwer út Den Helder
dat is wol hiel raar.......
Dêr lûk ik mij neat fan oan.
vrijdag 18 juni 2021
It lange gêrs
Moaie blomrike bermen dêr hâld ik fan.
Dêr is de lêste 5 jier aardich wat yn feroare.
Ik sjoch ek dat der no mei belied meand wurdt.
Earst in strookje lâns de dyk en de rest stean litte.
Dat strookje gie der ôf doe't it gers noch net lang wie.
No is alles lang.
Te lang.
Der binne bochten mei te min oersicht foar fytsers en auto's
It wurdt no gefaarlik.
No't de lannen oeral keal binne
kin it bermmeanen begjinne.
Want dat is hurd nedich
It binnenpaad bij Skrok en it binnepaad nei Lytsewierrum
mei wol lang bliuwe.
De stikels der wat weihelje bij de brechjes
is goed genôch
 |
| bij Lytsewierrum |
 |
| Skrok |
woensdag 16 juni 2021
Húskes
Wij fytsten ferline wike in rûntsje Nederlân.
It wie moai waar en it hoechde om ús net waarmer.
Fytse lâns de Hanzeroute,
de Midden Nederlân route,
de Maas Route
en fierders sa't it ús útkaam.
It oernachtsjen hiene wij fierders net regele
dus hoopten wij dat de Freoenen op de Fyts
wer iepen stiene foar gasten.
It wie drok mei fytsers en rinners
dus al te krytysk sjen nei in oernachtingsplakje wie der net bij.
Wat dizze kear opfoel wiene de 'huskes".
As earste sliepten wij yn dizze prachtige blokhut
yn in romme tún bij aardige minsken
As tredde ferbliuw ûntdekten wij "erbarmelike" omstannnichheden binne
at wij de berjochten lêze oer gastarbeiders.
In stikje fan de loads wie "omtoavere" ta in ferbliuw foar twa minsken.
Twa bêden in heal oanrjocht en in jierren 50 lampe.
Fierders koene je de kont dêr net keare.
Dat "de kont net keare kinne" net allinne figuerlik mar ek letterlik sa wie
jout dizze foto oan.
De kast wie it húske.......
It wie fierders in aaardige gastfrou,
it moarnsiten wie goed
en wij hawwe ek goed sliept
Yn dit "appartemint" hong ek noch in tapaslike siswize
maandag 14 juni 2021
It listje fan 10
De muzyk wie geweldich sneontejûn.
Stevie Ray Vaughan undercover,
spile lekkere blûs yn it Bolwerk yn Snits.
Wat in gelok dat live muzyk wer kin.
Gelok?
Wat is gelok feitlik?
Dat ik sneon as alderlêste nei binnen mocht
wylst de band al in kertier spile?
Dat bij de graasje fan ús leave hearen fan it Bolwerk
de doar ek foar mij iepen gong?
Wat is gelok?
Ik hie dus in kaart, as ien fan de earsten kocht.
Yn desimber 2020.
It optreden fan jannewaris wie útsteld, fan febrewaris ek, fan april ek
mar no koe it wurde.
Tefolle kaarten ferkocht troch alle oanpassingen
Systemen dy't net goed wurkje
en dus mochten der 10 man net yn
wie de boadskip oan de doar.
Ik stie op it listje fan 10.
Wij moasten wachtsje
oant it wis wie dat de lêsten net kamen.
In frjemde rigel. Net te akseptearjen.
Doe't ik dan as lêste fan de 10 nei binnenmocht
wie myn adrenaline al heech.
Net fan de wille om de muzyk
mar fan lilkens.
Ik haw hjoed in pittich briefke nei de direksje stjoerd.
zaterdag 12 juni 2021
Rûntsje
400 kilometer yn 5 dagen
dy brochten ús yn Brummen.
Maren Kessel,
Nieuwland
en Lunteren
Hearlik fytst.....
maandag 7 juni 2021
Moai waar
It liket in wike droech te bliuwen
it liket in wike in aardige temperatuer te wêzen
om te fytsen, dus
binne wij op fytsfakânsje
Rjochts op twitter sa no en en dan in foto
fan ûnderweis
vrijdag 4 juni 2021
Dedzjum
Myn mem is berne yn it selde hûs as har mem.
Sa giet it soms.
At in jonge frou bij in heareboer wurke,
wij hawwe it oer de jierren 20 fan de foarige iuw,
dan barde der wolris wat.
"De boeren hiene neat te dwaan,
want foar it wurk hiene se arbeiders, tsjinstfammen en de frou.
Boerefammen waarden wolris it slachtoffer
en sa ek myn beppe.
Dus gie beppe Dutsje foar de befalling in oantal wiken nei har âlders
en gie dêrnei werom nei de boer.
Beppe wurke yn Hartwert, rekke dêr swier
en befoel fan myn mem yn Dedzjum wêr't har âlders wennen.
Wij seagen hjoed efkes yn Dedzjum
en kamen oer de flier bij de iene famylje Poelstra en de oare famylje Poelstra
Sa hearden wij noch wol wat, hoewol it ek foar harren tiid wie.
 |
| it hûs mei it hege dak is it hûs wêrt beppe fan mem befallen is |
 |
| fanôf te efterkant mei no sinnepanielen der op |
 |
| Sa seach it der froeger dus út op dat streekje yn Dedzjum |
 |
| Ik bin net neamd nei de pake (want dy wie der net), mar nei de oerpake |
woensdag 2 juni 2021
Strava yn maaie
Mei in dikke 1000 kilometer yn maaie
sjocht de "heatmap" fan Strava 2021 der sa út.
De kearn leit yn de Greidhoeke
mei sa no en dan in ritsje om utens
dinsdag 1 juni 2021
Op it pakjedrager
Der wie in tiid
dat ik wolris mei in kratsje bier efterop fytste.
Dat wie de tiid dat ik bij de Spar wurke.
In kratsje Classe Royal (goedkeap bier) of Heineken
moast dan efkes te plak brocht wurde bij in klant.
It krat mei ien hân beet hâlde
en mei de oare hân it stjoer.
It is altyd goed gien.
Ik wie in jier as 16.
Moandeitejûn trainde ik foar it lêst.
Foar SDS JO 17-2 sit it frjemde seizoen der ek op
Dizze jonges binne in jier as 16.
Dat sij mei kratsjes bier omfytse dêr leau ik net yn.
Hjoeddedei binne je dêr te jong foar.
As blyk fan wurdearring krige ik foar de lêste training in kratsje.
In kratsje mei 24 soarten bier.
It fan Easterein nei Wommels meinimme op de fyts
mocht neffens ien fan harren gjin probleem wêze.
"Us heit wit datst it froeger koest en soks ferleare je net"
Myn gelok ?
Nije fluchbiners op de fyts.
Sa strak at it mar kin, stiet er fêst.
It rattele wat op de klinkers yn Easterein en Wommels
mar fierders wie in tankber ritsje
Tige tank jonges foar it prachtige seizoen
en "it efter op de fyts kratsje"
Abonneren op:
Posts (Atom)