Sa no en dan krij ik de prachtige Large katalogus thús. It liket hast wol in keunstwurk dat boek mei in grut ferskaat oan teesjurts, jaskes, sokken en oare artikelen wêrbij teksten en foto's in grutte rol spylje. Kom ris op in festival dan kin ik mij de heal dei wol fernuverje oer al dy prachtige teksten dy't meinamme op sjurts stean.
De Motorhead fans kinne mar útsykje der is kar genôch
Ek Cash libbet noch altiten troch op sjurts
Of gean ik wer foar in Iersk sjurt
Yn dit soarte fan sjurt sjoch ik mij fuortendaliks noch net rinnen
Dizze soe bijgelyks wolle kinne foar mij
.Mar ik slút net út dat dit de folgjende wurdt....., want ik fyn him moai en tapaslik
Freed 23 maaie. Kreas fytswaar. En in doel. De start fan de Schuttevaerrace meimeitsje. Dus op de fyts nei Starum. Tsjin alven wachtsje wij (dochter Hildau en pakesizzer Jelske wiene der ûnderwilens ek) op de start, Op alle boaten is ien man/frou oanwêzich,. de rest moat drave fanôf de kamping oan de oare kant fan it doarp. At de oare 4 dravers der binne kinne se fuort.
Jelske, mei op de eftergrûn de efterbliuwer op de Sa Better, de boat wêr't soan Tsjeard mei faart. Hij is de rinner fan it team en sil op Flylân 18 en op Skylge 12 kilometer drave moatte.
Hij komt dan ek as earste fan it team oandraven en hat noch krekt efkes tiid om hoi Jelske te roppen
en dan bin dêr ynienen de oare trije ek al en is it hurry up om fuort te kommen.
in earste eintsje mei de moter oan en sij fleane as tredde de haven út
gong is alles no
en al gau binne se tusken allegear oare skippen dy't meielkoar de goeie route sykje om de earste boei om te kommen
wij seagen noch efkes bij de Visserman, bij Jaap en Regina dus , ús eardere buorlju
in moai plakje mei útsicht oer de no tige lege haven
en dan sette wij wer ôf
ik op de fyts, no oer it Heidenskip en de Gastmar
om efkes in pontsje mei te pikken en Menno Sappé oan de praat te hâlden
80 km op de teller en noch droech ek.... in moaie tocht en no mar sjen op schuttevaer wêrbij je de boaten live folge kinne.
Wij sjogge nei Sa Better dan witte wij wêr't se binne.
Ien fan de moaie aspekten fan twitter binne de tips. Je wurde troch oaren ynienen attendearre op in goed tillevysjeporgramma. Yn myn gefal giet it faak om muzykprogramma's. Mar ek teaterstikken, boeken en films wurde oanpriizge.
Sa as sneon.
Wieke de Haan twittere: De helaasheid der dingen komt derfoar.
De helaasheid der dingen is in boek fan de Flaamske skriuwer Dimitri Verhulst.
It knotsgek boek wat ik mei in soad nocht lêzen ha.
Ik haw mij tidens it lêzen in byld kreeard. Dat byld, ik bin it foar in grut part ek al wer kwyt, dat wol ik fêsthâlde. Dat wol ik net oer de kop helje litte troch in film.
Op myn reaksje nei Wieke "dat ik myn byld fêsthâlde wol" en ik myn twiit beslút mei #antyfilm krij ik de fraach:
Bist ek antyfilm as it net om in boekferfilming giet?
In goeie fraach.
It antwurd is ja.
De lêste kear dat ik in film yn de bioskoop sjoen ha wie yn 1976 doe't ik de Kanonnen fan Navarone seach.
Net útsjoen want de lea befoel mij. en dan foaral myn eagen.
Dêrnei haw ik thús noch wolris in inkele kear in film sjoen. Dêr ûntkomme je net oan mei trije bern yn de hús dy't wol fan film hâlde.
Ik bin in lêzer en gjin filmsjogger
Ik bin in radioman en gjin tillvysjesjogger.
Ik fyn it freeslik dat Puk en de Petteflet ferfilme is.
Ik sil net mei in pakesizzer nei dy film ta.
Nee, ik hoop dat ik it boek hiel faak foarlêze mei.
Oer mevrouw Helderder en sa........
Ik sjoch der no al nei út want it measte bin ik kwyt en ik wol it graach wer yn byld bringe.
Freed en sneon wiene de Rock & Roll dagen yn Frjuentsjer. It waar wurke tige goed mei en op sneontemiddei wie it dan ek in feest om dêr te wêzen.
Nostalyske apparaten en elpees fan the Platters
Ik haw neat mei auto's mar dit wie in pronkje om te sjen.
Moai dat it keatsfjild ek foar wat mear swingende saken brûkt wurdt as it keatsen
In prachtige rubberen of plastik flier soarget der foar dat it hillige fjild goed bliuwe sil
en foar de echte rock en roll dûnskes wie noch in houten flierke dellein
en dat allegear op de klanken fan the Rocking Navigators, ien fan de safolle bandsjes
en de bern koene harren heupen oefenje
de Tinstars rockten en roolden
en dat diene se flak bij Godsacker
in tip fan TenT om de Vezpa net te missen wie net oan dôvemansearen rjochte. In prachtich optreden fan dizze hearlike band út Amsterdam mei allegear bekend rock en roll deuntsjes
Sa'n Rock & Roll feest is echt in feest foar jong en âld. Prachtich om te sjen hoe't in hiel soad âldsjes harren fernuveren oer de muzyk út harren jongere jierren. Hearlik om te sjen dat muzyk en moai waar foar in prachtige stimming soarget.
Freed, frij, moai waar, lisfytse, in doel, Ljouwert,
Mar foardat ik Ljouwert berik kom ik lâns de mânske tinte bij Hylaard. It is maaie en dan is it High Night. Twa kear dit jier. It kin net op.
Wylst der wurke wurdt oan myn doel, dangelje ik de stêd efkes troch. It is wer in goed momint om bij de boekwinkel fan de Afuk te sjen. Neist boeken, kaarten en bernespultsjes hawwe se in hiel soad snypsnaren.
En hjir wie it allegear om te dwaan hjoed. In nije sadel foar myn lisfyts. Wij neame dit in sitskaal en bij Liever Ligfietsen, in spesjaalsaak yn lisfytsen kinne je soks krije en dwaan litte.
Werom lâns de Boalsertertrekfeart tusken Húns en Leons. Prachtich dy hynders en dy skiep ! Altyd wer.
De bermen binne no wer op syn moiast, it groeit en docht en in flagje op in lisfyts is hast nedich.
Thús wachtet Jelske. Wij passe fannemiddei op en se bliuwt ek wer in nachtje útfanhûs. Dat wurdt wer foarlêze út "Hoe't Harm hûn in boarter fûn"
In bijsûnder aardich boek oer it gedrach fan minsken mei in soad jild. En oer hoe't se net de mindere wêze wolle foar dy oare rike. Ik soe der graach mear oer fertelle wolle mar dat is net leuk foar de minsken dy't dit boek noch lêze wolle.
Normaal sprutsen kin ik maklik in boek fanside lizze om letter wer fierder te gean. Bij dit boek wist ik fan gjin ophâlden, sa nijsgjirrich nei it ferrin. Hieltyd waard ik wer ferrast...
In tip.
Tongersdeis tusken 12 en 12.30 draai ik in pleinwacht op skoalle.
In bysûnder heal oere is dat altiten.
Fan de sifers en it belied nei de bern op it plein.
In heal oere omrinne en iepen stean foar de fragen.
"Meester, wij waren eerst bij de tafeltennistafel en nu gaan zij flauw doen"
Aksje: oerlizze mei beide groepkes. Falt net ta om elkoar útprate te litten. Sykje nei oerienstimming. Beide groepkes 10 minuten want de oare 10 minuten binne al om troch de diskúsje. Akkoard.
"Meester, die jongens lopen steeds door het voetbalveld en doen flauw"
Aksje: Ik kom sa, earst mar efkes op ôfstân waarnimme wa't it krekt binne en hoe't it krekt sit. Twa knapen dogge yndie irritant. Tasprekke en freegje wêrom. Gewoan omdat wij dat leuk fine. Dúdlik makke dat de fuotballers it net leuk fine en ik dus ek net. Noch ien kear op it fjild dan meie se harren binnen melde. It helpt krij gjin klachten mear.
"Meester, zijn de 10 minuten al om?"
Aksje: Mei noch twa minuten te gean dus op nei de earste groep en oanjaan dat it oer twa minuten dien is. Lichte protesten (no al) mar de wikseling ferrint soepel.
"Meester, de stuiterbal leit op it dak of oer it dak fan it fytsehok".
Aksje: twa jonges meie oer it stek en sykje. De oaren hjir bliuwe.
"Meester, Yvonne wil niet meer meedoen omdat se denkt dat wij gemeen doen"
Aksje: nei Yvonne mei de oare famkes, fielt har eftersteld, tinkt dat se wat útsletten wurdt. Triennen. Oare twa lizze út dat it net sa is. Misbegryp dus. Noch in kear besykje en der oer praten bliuwe. Sjoch se letter mei harren trije laitsjen.
"Meester, ken je de Bermuda." Trije jonge komme bij mij.
Aksje: ik graaf yn myn geheugen. De Bermuda?
"De Bermuda is bekind fan syn trije hoek, der ferdwûnen skippen op frjemde wize neffens mij. It leit yn de buert fan Súd Amearika"
"Oh, en hoe kwam dat dan dat die boten verdwenen"
"Dat wit ik net, ik tink dat net ien dat wit, dêrom is it ek sa mysterieus."
"Interessant" sizze de mantsjes en se boartsje wer fierder.
It sit mij net hielendal lekker dat ik wat ûnwis wie mei myn antwurd. Hoe siet it ek mar wer. Dus opsocht. Dat fan Súd Amearika klopt net hielendal want ik tocht súd Súd Amearika en it is noard Súd Amearika.
Wer wat leard.
Der binne fan dy dagen dan sjogge je hast oankommen dat fytsen wol ris net folle wurde sil. Sneon wie it sa'n dei. Middeis nei it fuotbal en jûns bekomme fan it nei it fuotbal gean.
Bliuwt de moarn oer. De waarsferwachtingen binne min. Reinwetter sei Pyt en Buienradar foarseit ús ek reinwetter fanôf in oere as 10. En dochs wol ik in ein fytse.....
It is njoggen oere at de earste drippen op myn brilleglêzen te sjen binne en ik yn de buert fan de Bokkeleane bin.. Moaie nammen hawwe de strjitten yn Aldegea gemeente Fryske Marren.
Jellie moat wurkje yn Balk (in lytse ynwenner der bij dus) en it liket mij wol wat om fan dêrút nei hús te fytsen.
Earlik sein hie dat ek mei de wyn te krijen. wie der in lytse Dokkumer berne hie dit gjin opsje west op dizze dei.
Ik helje yn Balk moai betiid de fyts fan de auto en fyts fia de Bokkeleane nei de Ige Galamaleane. at de wolken begjinne te drippen. Mar mei de wyn yn de rêch is it best te dwaan. Boppedat it is frijwillich.
Wat ek frijwillich is, alteast dat mei ik oannimme, is it meidwaan oan it fiskwedstriid. Fan Warkum oan Tsjerkwert wurdt yn 5 klassen of 5 gebieten in angeltsje útlein. Hoewol it wurd angeltsje net goed keazen is foar it mânske ark wat der neist de fisker leit en stiet. Komplete ynstallaazjes mei angels sa grou as polsstokken en stuollen gelyk as bij de toksedokter. De grutte griene paraplu soarget der foar dat se droech bliuwe. Ik sjoch sels immen mei in soarte fan byldskerm foar him. Miskien dat dy in bewegingsmelder yn de kurk hat en sa op it skerm sjen kin at der wat beweecht. It sil in aardichheid wêze dat fiskjen.
Tusken Boalsert en Iens rint it Frysk ferzepaad. Bij de meastal lege kamping fan Burchwert stiet ûnder in beam , dy't flink rûgelt, in gedicht fan Meindert Bijlsma.
Kampeare
As ienfâldige wigwammers
sis ik bij sommige kampings
alinne mar
ugh
Moaier kinne je de sfearloze útstrieling dêr net beskriuwe
It is ek Fryske mûnedei. Dat haw ik ûnderweis krekt heard troch in reportaazje op de Omrop (hearlik sa'n radio op de fyts) en dat sjoch ik bij de Krommesyl. De flaggen út en in draaiende mûne. Ik bin ûnderwilens dweiltrochwiet en fyts troch. Goed healwei alven al wer thús nei 43 kilometer.
5 maaie, it befrijiingsfestival yn Ljouwert. It wie in tige noflik barren dit jier mei lekkere muzyk.
It aardige fan dit fergees tagonkelik festival is dat ek jong de kâns krijt om ris wat yn de kunde te kommen mei de popmuzyk. Opmerklik folle bern op it Oldehoofsterkerkhof en dat die de sfear goed.
Fansels kamen dy bern ôf op harren eardere freedtejûn heldin Iris Kroes. Doe foaral bekend wurden mei har harp mar no mei band en frijwol sûnder harp mar mei in goeie stim op it grutte poadium ûnder de Aldehou.
It wie wat mij oangiet in noflik optreden.
Lekker waar op it plein en jong hie in ferheginkje nedich om it allegear goed sjen te kinnen
Yn de Prinsentûn wie it Liet festival. In goeie kar om it op dizze dei te dwaan, want seker mei it moaie waar is it noflik sitten rûn de fiver, mei op de eftergrûn de muzyk. Sa komt der aardich wat folk lâns, hoewol ik grutte twivel ha dat der in soad binne dy't it de 11 ferske folhâlde kinne.
De minsken op it poton, gelyk foar it podium wol, sij hiene gjin kar, want fanwege de opnames dy't makke waarden troch de Omrop waard harren dringend fersocht om sitten te bliuwen want oars kaam der te folle beweging op it poton en dus yn de opnames. Bliid dat ik nei ien nûmer al fuortrinne koe : it lûd wie efteryn oan de sydkant net best en it geeamel bij de wikseling mei de artisten duorre mij ek te lang en boppedat woe ik Douwe Bob ek wol efkes sjen. En dat wie in treflik optreden mei syn band.
Nei it optreden fan Douwe Bob noch trije nûmers sjoen, helaas net fan de winner Bruno, mar dy hie gelokkich op Aaipop al heard.
It hichtepunt fan de jûn wie it prachtige optreden fan Diff. In lekkere gitaarband (5 stiks) mei in hearlike stim fan de sjonger. Dat se harren optreden ôfsluten mei de Broken Brass band wie best genôch want it swingde de panne út, mar helaas bin ik gjin leafhawwer fan safolle getoeter.
It optreden fan the Broken Braas dêrfoar haw ik dan ek berêstend oer mij hinne komme litten.
Al mei al, in noflike 5 maaie fiering. En op de fraach dy't ik foar de kamera net beantwurdzje woe "wat 5 maaie foar mij betsjut" is it antwurd hiel simpel: de muzyk.
It komt net faak foar dat ik myn eigen eagen net leau.
Mei tank oan in bril sjoch ik prima.
Ik skrik ek net sa gau fan iets.
At iets foar in skrikbarend hege priis oanbean wurdt, dan lit mij dat kâld.
At te lêzen stiet dat fuotballers en foaral traêners yn it betelle fuotbal jiersalarissen hawwe wêr't ik 40 jier foar wurkje moat dan wurd ik dêr al net mear oars fan. Hiene sij mar in fak leare moatten. It is sa't it is en it rint sa't it rint
En dochs wie der ferline wike in momint dat ik efkes twivele oan myn gesichtsfermogen Wij wiene yn Belgie.
Us tank wie hast leech.
Op syk nei in tank yn Remouchanps. In LPG tank, want op dy skjinne brânstof ride wij no ienris. LPG 0,478 stiet der op in boerd.
LPG 0,478 ???????
Dat kin net wier wêze!
0,478 per liter?
Foar 18 euro hiene wij de tank fol en riden dêr de 395 kilometer op nei hús ta.
0,478 per liter
Tsja dy belesting yn Nederlân.
Je witte it ek wol mar op sokke mominten dan soene je hast wol yn de Ardennen wenje wolle.
At it dêr plat wêze soe.
In midwike Ardennen Op it lêste momint noch boekt. Mar wij wiene der wol klear foar. Yn Remouchamps, yn de buert fan Spa, lykwols net. De heechoanprize folslein ynrjochte Karstentinte stie der wol mar dat wie dan ek alles.
It begong om trije oere al bij it ynskriuwen. Gjin beddeguod. Wurdt foar 5 oere brocht. Bij de tinte oankommen miste der fan alles. Der wie gjin stream, gjin stuollen, gjin lampe en oer de lytse ynfentaris kin ik mij better mar stilhâlde. It lange gers kaam hast boppe de kuolkast út. De tinte hong oan alle siden en it die bliken dat der net in hearring yn de grûn siet.
It fromminske dat it allegear foarelkoar bringe moast wie ek ferrast dat er safolle ferhierd wiene en die de ien nei de oare tasizzing om it foarelkoar te krijen. It wie ûnmooglik om dat wier te meitsjen, want ek alle buorlju kamen mei de selde klachten.
Om it mar op te lossen waard in noch leech steande tinte leechroôve mei spul. Wij in lampe, sij in gastel, wij in kofjekanne, sij in kuolkast.
It wie fjouwer oeren letter dat de eardere tasizzingen allegear foldien wiene. It fromminske bleau fatsoenlik en it begrutte har ek wol wat.
Dêrom krigen wij as "kompensaasje" foar al dit lijen in flesse reade út eigen bûse.
It alder slimste lykwols wie it momint dat wij fuortgiene. Doe kaam der immen te kontrolearen om der foar te soargjen dat wij ús boarch fan 50 euro weromkrije koene. Doe die pas echt bliken wat er allegear net wie. De jongfeint die krekt of wie der neat oan de hân en rûn gewoan alles troch. Hij lei ús nochris omslachtich út dat hij it net ôfskowe woe mar dat de tinten fan Labyrinth wiene en dat dy ferantwurdlik binne en dat sij allinne mar kontroleare. De helt miste en wij krigen de 50 euro werom. Sil hjoed noch efkes in moai briefke skriuwe nei Labyrinth en harren tank sizze foar dizze mislearre tinteferhier.
