Marten de Boer fan Easterein is yn de sechtiger jierren
sloalmaster en letter haad fan de Herfoarmde legere skoalle yn Wommels.
Marten, dy't ik letter bij SDS ek tsjinkom
en wêr't ik noch wolris mei fuotballe ha
hat ek wat mei taal en skiednis en Frysk
Hij skriuwt in boek oer Hinnaarderadiel
en ik fyn it wakker nijsgjirrich.
It boek leit nea fier fuort
want sa no en dan sykje ik noch wat op
wêrfan ik tink dat it yn dat boek stiet.
It boek wer in kear yn de hân
betsjut altyd wer stikjes lêze.
Ik haw altyd niget oan taal hân.
In opstel meitsje is myn favorite fak op de legere skoalle,
It wurdt meast wurdearre mei in heech sifer.
Wierskynlik bin ik dêr net ûngefoelich foar
want it motivearret mij om mij yn de taal te ferdjipjen
De Fryske taal fansels, de taal fan myn hert.
Ik harkje nei taalprgramma's op radio Fryslân
en sneup wit ik hoe faak yn dit boek om
Efkes Taelbuorkje fan H. Tjepkema
Bij it folgen fan de kursus Frysk , A, B en de akte
ûntstiet "de fanatike Fries" sa't se mij no karakteriseare
Ien fan de earste Fryske boeken dy't ik kocht
is Hwat der bart fan Piter Boersma
Jim sjogge oan Hwat dat it noch de tiid wie fan de âlde stavering.
Ik haw it boek twa kear lêzen
omdat ik nei de earste kear tocht,
wat haw ik mist, hoe sa in moai boek?
"Wêrom skriuw ik net in boek"
gong der doe troch mij hinne.
Mei wat mear spanning, wat mear aksje.
Mei oare wurden, ik fûn neat oan it boek
mar sette it wol op myn list
foar it heljen fan de Afûk akte.
Dat mûnling eksamen is in bijsûnder barren
want de eksaminator is ......Piter Boersma.
Hoe en wat wit ik net krekt mear.
Ik haw de Afûk akte helle.....
Yn de jierren 70,
sammeleYpe Poortinga in protte folksferhalen
dy't hij yn twa boeken útbrocht.
Ik haw se doe mei nocht lêzen.
Ik kom der no net mear trochhinne.
Ik haw beide boeken en doch se net fuort.
Ik kin se wol nei in boekenmerk bringe of
oanbiede bij in kringloopwinkel,
mar ik frees dat se dêr hiel lang lizzen bliuwe
want wa hat hjir yn dizze moderne tiid noch belangstelling foar.
Dan kinne se better mar bij mij op souder lizze
It boek "Voordeliger per dozijn"
is al hiel lang yn myn besit.
It tink dat it in ôfskreaun boek fan de bieb is.
It is ek it ienige boek dat ik folle faker as ien kear lêzen haw.
Fermaaklik boek, foar mei op fakânsje.
Oer in húshâlding mei 12 bern
dêr't de heit altyd dwaande is om út te finen
hoe't dingen effisjint dien wurde kinne yn syn húshâlding
It winkeljen, it ôfwaskjen, it waskjen ensafuorhinne
Tusken de âlde boeken fûn ik ik noch in prachtich boekje
fan Tsjebbe Hettinga.
Ut 1973.
Persoanlik kocht fan Tsjebbe. Op de Kliuw bij Tsjerkje.
It boekje is útjûn yn eigen behear.
Begryplik want wa sjocht it op dat momint sitten
yn sa'n literaire boeresoan fan de Burchwerterhoeke.
Neist de tagaonklike fersen falt op
dat it yn in pracht hânskrift skreaun is
en dat it fol stiet mei adfertinsjes.
De dichter hie it bedriuwslibben nedich
Foaral yn Snits hiene se fertrouen yn de opset,
want neist de hjir ôfprinte foto's fan it boekje
stiet der moaie adfertinsje yn fan "de Witte Kat",
omskreaun as : intieme sfeer,
voortreffelijke hapjes,
heerlijke koffie.
Letter kocht ik ek noch in twadde bondel fan him
en miskien ek noch wol in tredde, mar dy kin ik net mear fine
Jim ha gelyk at jim sizze
dat ik wolris seur oer ús fierstentegrutte gemeente.
Ik jou se no in komplimint
Se pleatse in laadpeal sûnder dat wij der om freegje
Dat is nij foar mij, mar ek foar oaren
Ik sitear ien fan dy oaren fanôf Facebook
Je blijft je verbazen en blijft lachten hier op het Swingoerd.
Staat er opeens een pispaal 🙈😂
Wie heeft dat nu weer bedacht ? Het wordt gewoon gedaan !
Niemand hier op de buurt die een electrisch voertuig heeft en nu ook nog een parkeer plaats minder !
Parkeren is hier dus nu niet meer mogelijk, ja natuurlijk het kan wel maar bij controle €140 boete !
Der komme reaksjes op.
Hoesa hat net ien in elektryske auto?
Der ûntstiet in diskusje mei ûnkundige reaksjes
oer hybride auto's en sels oplade of oan de peal
Gelokkich hat ien der wol ferstân fan
en blike der twa auto's op de buert te wêzen
dy't wol oan de peal kinne/moatte
It is wat.
Gewoanwei komme fersjenningen
pas at je der hiel lang om seure
No is de fersjenning der al
en wurdt der ek wer seurd.
Ik bin der bliid mei,
miskien gean wij no wol foar in hybride auto
at wij wat oars moatte
Tanksij in peal dêr't wij net om frege hawwe as beurt
It skilderij wat mij it meast ferraste
yn it Jopie Huismanmuseum wie dizze
De "Vraatzucht" wie der dus ek al yn 1968.....
Tusken myn jonge jeugd en de folwoeksenheid
binne net folle boeken yn myn kast.
Lêzen beheint him ta it lêzen
fan de ferplichte boeken op skoalle
"De herberg met het hoefijzer"
en de "Donkere kamer van Damocles"
steane mij noch bij.
Ik fyn fan letter twa boekjes fan Bokwerd.
Rink van der velde skreau alle wiken
in stikje yn de Ljouwerter Krante
oer it gean en stean fan de Bokwerteres
De tekst is fermaaklik
en om it ferfryske Hollâns
scheuren wij nu nog onze buizen uit.
De musea yn de súdwesthoeke sette yn novimber
de doarren wiid iepen
Foar elkenien, ek foar wa't it jild der net foar oer hat.
It is fergees. Trichtich dagen lang.
Foar mij de kâns om nei dy musea te gean
dy't ik noch net besocht haw yn ús regio.
Dat binne der mar in pear
en frjemdgenôch stiet it Jopie Huismanmuseum dêr ek bij.
Elkenien is fol lof en ik haw der noch nea yn west?
Dat klopt, op ien of oare wize haw ik net folle
mei dy "vodden en lompen" dy't hij skildere hat.
Nei de besite fan sneintemiddei is dat oars.
It museum hat in moaie audiotoer
mei de efterlizzende ferhalen bij hast alle skilderijen.
Dat sprekt mij tige oan.
It ferskaat oan skilderijen is sa grut
omdat it meigien is mei de ferskillende fases yn syn libben.
Prachtich, yn ien wurd
It wie it jild mear as wurdich.....
 |
| tsjin it leger |
 |
| de doar fan it húske |
Bij it ferlitten fan de legere skoalle
krije bern in bibel, better sein in bibeltsje.
Myn ferbazing giet net oer wat er ynstiet
mar hoe't it mooglik is
om safolle ferhalen, safolle tekst
yn sa'n lyts boekje te krijen.
Hoe tin kin in bledside wêze
dat it him goedhâldt.
No al 57 jier lang.
It ienige boekje dat ik net útlêzen haw,
sterker noch, it ienige boekje
dêr't ik frijwol neat yn lêzen ha.
Dat wurdt him no ek net mear.
It tema hat net myn ynteresse
en de letters binne te lyts.
Ik haw der gjin emoasjoniele bining mei
mar smyt it net fuort
Novimber beoeknmoanne
Alle dagen in boek út myn eigen kast
Toen Dik Trom een jongen was - C. Joh. Kieviet
At de Pietje Bell boekensamling kompleet is
moat der wat oars komme.
It wurdt Dik Trom.
Twa boeken haw ik yn de kast stean
en ik herinnerje mij dat as moaie boeken.
Gjin Kameleonboeken dat hie ek kinnen
mar dy sparre broer Hessel.
Dy haw ik dus wol allegear lêzen doe
mar net yn besit
Novimber is de boekenmoanne bij mij
Ek dizze boeken steane yn eigen boekenkast
Pietje Bell is weer aan de gang - Chr. van Abcoude
Sân Pietje Belle boekjes yn de kast,
dat seit wol wat.
"Wat moat dy jonge op de jierdei ha?"
"Doch mar in Pietje Bell boek"
Sa sil it gien wêze yn 1964 en 1965.
It iene jier krije ik der 4,
it oare jier 3.
Prachtige boeken doe.
Der skynt no ek in film te wêzen.
Dy haw ik net sjoen.
Fansels net.
Ik bewarje leaver dy herinneringen oan it lêzen
Novimber,
30 dagen oandacht foar in boek út myn eigen kast
De tweeling van de Vinkensteeg - M.A.M. Renes - Boldingh
Dit is in boekje út 1963.
Ek no wer krigen fan it Krystfeest.
Ik tink dat yn dy tiid de boeken fan it Krystfeest
de ienige boeken binne dy't wij krije.
Neist dy appel en in reepke neffens mij.
At it in moai boekje is, wit ik net mear
Ik rop novimber út ta de moanne fan it boek
Tritich dagen lang jou ik oandacht oan in boek(je)
dat yn myn boekenkast stiet.
In boek(je) dat ik net gau fuortdwaan sil
De wilde jagers - W.G. van der Hulst
It kin best wol sa wêze
dat dit myn earste boekje is.
Krystfeest 1960 stiet der yn.
Ik bin dan seis.
Lêze is dan it begjin yn klas ien fan de Herfoarme legere skoalle
Tidens de koroanatiid haw ik mei pakesizzer
thús oan it lêzen west.
Hij is dan 6 en hij koe it aardich goed lêze.
Sa no en dan kom ik him tsjin
Sybren Wassenaar
At ik yn de buert fan Winsum fyts,
fytst hij dêr ek.
Altyd in groet, hast altyd in praatsje
"Wat hiene wij se moai te pakken"
Ja, Sybren dat wie machtich
"Ik haw jim moai holpen"
Ja, seker Sybren
"Fryslân Cup en sij net"
Skitterjend wie dat Sybren
"ik sei al tsjin harren, ik kom jim noch wol tsjin"
Do hast wurd holden Sybren,
dêrom stiest ek op de foto
It sit sa.
Sybren hie mei de 35+ fan Oosterlittens
nei Harkema west.
Striid om de Fryslân Cup 35 +
It seizoen 1994-1995
It gie der nochal hurd en gemien oan ta
en Oosterlittens ferlear.
Wij fan SDS 35+ helje de finale
en moatte tsjin dat selde Harkema Opeinde.
Op in bijfjild fan Cambuur
winne wij mei 5-2
Sybren is der bij.
Hij is noch blider as ús
krige fansels ek in bosk blommen
en dêr herinnert er mij alle kearen oan.
Ik kom dizze foto tsjin yn it srgyf
Us âlde poes
dy't yn maaie der ynienen net mear is,
sjocht fuotbal
Nei Ajax, dat ek mei de lêste jier dwaande is
as topploeg
Noch mar 50 jier âld
en der net mear bij wêze.
Ik skrik op sneontemoarn
at ik syn namme stean sjoch
op de ferkearde side fan de Ljouwerter Krante
Jan Rinse Blanksma, man, heit en soan fan.
Hij wenne yn Easterein en ik wenje yn Wommels.
Ik seach him net folle, feitlik nea.
Dochs haw ik ien geweldige herinnering oan him.
15 febrewaris 2014
reizgen wij tegearre nei Rotterdam
nei it earste Scumbashfestival.
Dat wie in machtige en lange dei.
At ik myn ferslachje fan doe no wer lês
dan fiel ik de muzyk fan dy dei wer.
Jan Rinse dy't mij kennis meitsjen liet
mei de Toy Dols en UK Subs
Dankjewol Jan Rinse
Sjoch hjir
Fan 1999 oan 2008 wurke ik bij de gemeente Snist
Dat wie doe noch in oersichtlik gehiel
Fiif jier lyn hiene wij in reuny yn de Bakkersdochter
Ofrûne tongersdei op 'e nij.
Gjin taspraken, gjin spultsjes, gjin nammebuttons op,
neat fan dat alles
Gewoan efkes prate mei wa't je wolle.
Yn dy jierren dat ik op it stedhûs wurke
fytste ik op in lisfyts.
Dy njoggen jier haw ik altyd trou myn wenwurk ferkear
op dy lisfyts dien.
Hús - stedhús 13 kilometer,
werom it selde of iets mear
want wat fariaasje yn de rûte is better
Fan de âld kollega's dy't mij tongersdei oansprutsen
frege elkenien: hast de lisfyts noch?
Dat ik it burd ek noch haw, koene se sjen
oars hiene se dat ek frege, tink ik.
De lisfyts haw ik dizze simmer ferkocht
mar ik wie wol de fyts,
al holp Bosch mij wol tsjin de hurde wyn
Hans de Booy stiet de ôfrûne tiid wat yn de belangstelling.
In sjonger dy't de measten kinne fan Annabel.
Hij is wat oan legerwâl rekke en dat stiet sûnt koart yn in "biografysk portret",
dat him stypje moat wat ynkomsten te krijen. I
k haw it portret lêzen dan wol skand.
Wij hiene yn 1983 yn it Dielshûs in primeur.
It earste optreden yn Noard Nederlân.
Om wat ynkomsten binne te krijen organisearden wij konserten
De waan fan de dei regearde soms
en neffens it boekingskantoar soe in "topper" as Hans de Booy
foar in grutte tarin soargje kinne,
want elkenien song Annabel, het wordt niets zonder jou.
Dat wie ek sa.
Mar leafst 600 man neffens de Ljouwerter Krante.
Finansjeel in goeie jûn mar muzikaal net.
De resinsje moandeis wie striemin.
It optreden yn it Dielshûs krige dan ek gjin ferfolch.
Why Not stie yn it foarprogramma.
Dat moat hast in hichtepunt west ha foar dy band yn dy tiid foar 600 man publyk
 |
Wij sjogge dat yn Snits de hjerst begjint
It liketwol de wike fan de lêzingen
Twa kear nei de Tiid yn Boalsert
In lêzing oer Ynje.
It ferhaal fan in soan fan in Ynjegonger
en in soan fan in Molukker.
It idee is prima, liket mij sa ta,
de útfiering liket nearne nei.
Gjin ferhaal, mar wat lossen stikjes
op basis fan emoasjes.
Ik bin yn it skoft fuortgien
mei it idee dat ik as soan fan in Ynjegonger
dit better dwaan soe.
Twadde lêzing giet oer de skiednis fan it fuotbal
yn de Súdwesthoeke
Jack de Vries, argifaris bij de Tiid
nimt ús mei oan de hân fan foto's en filmkes
oer de oprjochting fan de klups yn ús gemeente
nei legendaryske wedstriden
en bekende fuotballers
Ynteraktyf, want de tahearders wurde útnoege
om yn te heakjen en oan te fullen
Mar leafst twa en healoere boeit it
fan begjin oan ein.
Yn Rothenburg oan de Tauber,
dat is oan de Romantyske strasse,
is it djiptepunt fan de reis
It is 28 septimber en de winkels foar kryst
binne der al klear foar.
Wat in rotsoai.
Sneintejûn sitte wij yn Balk, yn Poadium Gorter.
Wij sille ús ferrasse litte troch Syb en Maarten,
Sij dogge de muzyk fan Simon & Garfunkel.
It is útferkocht, krekt as it middeikonsert.
Bij de earste klanken fan Sound of Silence
bin ik ferrast, mjiskien wol ferbjustere.
It klinkt as in klok
Alles dêrnei ek.
It ferhaal fan Paul en Art
wurdt om en om ferteld troch Syb en Maarten.
It is foaral Maarten dy't in prachtige wize fan fertellen hat.
It ferhaal, de muzyk en de stimmen
it is in topjûn.
De sfear sit der ek aardich yn bij it publyk,
dat thús skynber allegear de CD thús hat.
De twa artysten belûke it folk der ek aardich bij
en oars docht it folk it sels wol.
Sa'n jûn is it safolste bewiis
dat der neat boppe live muzyk giet
ek al binne de bylden op You Tube sa echt
en it lûd fan Spotify geweldich is
Mochten jim in hotel sykje
oan de Lech
en jim binne yn de buert fan Stanzach
dan kin ik jim ferwize nei dit hotel.
Romtlik, gastfrij, freonlike minsken,
grutte keamers, moai útsicht fanôf balkon
en prima moarnsiten en jûnsiten.
