Boartsje mei taal

Twa wiken lyn spruts ik Pyt Postma yn Wommels oan.
“Dyn namme komt faak foar yn de rubryk "Nij Frysk Wurdboek”, ik soe der wol efkes mei dij oer prate wolle, want ik fyn dat wol nijsgjirrich.
Meitsje ik der in blochje oer”

“Altyd goed,” seit Pyt en hij begjint gelyk al mei entûsjasme te fertellen oer hoe en wat.
“Ik haw krekt wer in wurd ynstjoerd.
“Wjerskôgje”, as nij wurd foar “doublecheck”. 
Pyt leit mij dan gelyk ek út hoe’t hij der oan komt. 

Op tiisdeitemoarn 13 july bledderje ik de Ljouwerter krante troch en myn each falt op in kop mei it wurd  “Wjerskôgje”

Pyt, tink ik gelyk. It is him wer slagge.

Ik stap gelyk op de fyts en tref him thús oan. 
In grutte laits en grutsk.
Dochs wol, hoewol it fansels mar in aardichheidsje is.  
In pear fragen oan Pyt

Pyt, do dochst faak mei, hoe bist dêr sa ta kommen?

Sûnt ik net mear hoech nei te tinken op it wurk tink ik oer dit nei.
Ik haw in soad aardichheid oan de Fryske taal en fyn it alle kearen wol in útdaging om wat te betinken. Boartsje mei taal is prachtich.

Op hokker wize dochsto dat. Sikest yn âlde boeken, of wurdboeken of smytst it thús yn de groep?

At ik gelok ha, dan sjit mij al frij gau wat te binnen.
Do sjochst op de krante fan hjoed dy’t hjir leit, dat ik al in wurd opskreaun haw.
Dat skeat mij as earste te binnen foar de nije opjefte.

Mar it kin ek wêze dat ik der wat mei omrin, der in nachtsje oer sliep en dat ik dan tefreden bin.

Hoe faak hast wol net meidien?

Sûnt juny 2019, mar in inkele kear kom ik net op in wurd wêr’t ik tefreden oer bin.
Dan stjoer ik neat yn.

Dyn wurd is no útkeazen en ik sjoch datst it grutsk bist. Is dit al faker bard?

Ja it wurd “fly-by” moast ek in kear oersetten wurden en doe stjoerde ik “flo-sjo”yn.  Mei de útlis der bij wie it rekke.

Ik hie dy kear meardere wurden ynstjoerd en dy fûnen se wol grappich.

Der binne troch de jierren mear as hûndert nije wurden makke, brûkst se sels ek?

Der binne in pear wurden dy’t hingjen bliuwe, mar it bliuwt lestich om nije wurden yn in petear te brûken sûnder der bij te sizzen wat ik der mei bedoel.
Dan sjit it syn doel wat foarbij.

Wat fynst fan oare ynstjoeringen?

Ik fyn it in fermaak om dat te lêzen. Moaie fynsten betiden, mar soms fyn ik it te fier socht. 

Bist altyd hoopfol ast wat ynstjoerst?

Dat is net altiten sa, mar somtiden dan mien ik op foarhân hast seker te witten dat myn wurd útkeazen wurdt.
Dan bin ik tige tefreden dus.
De sjuery sjocht it dan oars.

Swier teloarsteld dan?

Seker net, der binne safolle mogglikheden mei taal. It is fansels geweldich dat se in wurd fan mij útsykje, mar at it net sa is, haw ik gjin argewaasje

Wat noch wat foarbylden fan wurden dyst ynstjoerd hast?

hacker – net ynbrekker

vintage – earsttenein

freelancer – kwartsjesiker

Hast ek kontakt mei oare ynstjoerders want it binne faak deselde?

Ik haw gjin kontakt mei oaren, útsein mei Harm Posthuma. Dêr haw ik it lêst efkes mei oer hân want hij stjoert ek wol ris wat yn.

Lêst in soad Frysk?

Ja, best wol. Bin no mei Hylke Speerstra syn nije boek dwaande en at er ien moai byldzjend Frysk brûkt is it Speerstra wol.

Ta beslút

De rubryk Nij Frysk Wurdboek stiet tiisdeis yn de Ljouwerter Krante. Ek op Facebook binne de ynstjoeringen te folgen.

Wij kinne fêst noch mear ynstjoeringen fan Pyt yn de krante ferwachtsje. Net op facebook, dêr docht hij net oan.