Lytse bear

 

De befestiging

Aant docht mei oan de lytse bearenloap op Skylge

10 kilometer op sneon 1 novimber

It is net in oare Aant

Myn earste 10 yn wedstriidferbân

Ik nim it serieus

Gean der 5 dagen earder hinne

Wenne oan de lucht, oan de wyn, oan de paden

straf

Ik sit wer wat yn stambeamûndersyk

Lolle Gatses is in namme dy't earne fier fuort 

yn de stambeam opdûkt.

Sa te sjen mocht hij in kear net nei in Nachtmiel

want sa te sjen strafte de tsjerke 

Ek syn tsjinstanner op de kermis yn Wytmarsum

krige deselde straf

Net nei it Nachtmiel, dat erfaarde ik earder as in beleaning......

In 'mûne"

 

Gjin idee hoe't je sa'n ding neame.

Is it in wynmûne sûnder wjukken?

Wat kinne je der mei en levert it op?

Sjoen yn de buert fan Koudum

Weakens

 Sels in ienfâldich boerd op de romte, 

djip yn de berm,

tusken de Laekwerterwei en de Weakenserbrêge

is net mear feilich 

foar in te brede trekker

mei in te breed apparaat der efter

Weakens is oanriden

Weakens is oanslein

Taal

Lêze is in hobby fan mij

Je komme sokke moaie dingen tsjin

Taal is nijsgjirrich

Taal is moaier as foto's

Ik soe wol mei in krante takinne mei minder foto's

Of gjin foto's

In krante sûnder moaie taal of wurden is ûnbesteanber.

'Kladdekoer' lês ik yn in boek. Prachtich, dat gean ik brûken

Op de radio hiene se it oer de

'Mobiele kattenkastratiebus' 

ik lis yn in deuk

E-bike hater

It is freedtemoarn 

Ik fyts oer Skrok nei Hinnaard

Healwei Skrok sil ik in man foarbij fytse

At ik hast neist him bin, seit er

'Ik hearde jo al oankommen'

Mei sa'n opmerking stean myn earen op skerp 

en myn hier yn de nekke giet rjocht oerein stean.

Ik sil troch fytse sûnder wat te sizzen mar nee....

'Jo earen binne noch goed'", sis ik

'Dêr giet it net om, dit is in echte fyts' jout menear oan

' Dat is moai mar wat wolle jo dêr meisizze'

'Gewoan fytse is better' wit menear de wiisneus te melden 

'Ha jo ek in auto, freegje ik him'

'Ja dy haw ik, at it wat minder waar is, brûk ik dy'

'Ja krekt',  sis ik dan. 'ik riid gjin auto, ek net at it waar wat minder is.

'At it waar wat minder is, sit ik ek op myn e-bike 

en dan sitte jo fêst yn in stjonkauto, is't net sa?'

De earen wiene dochs net supergoed of Eastyndysk, 

hij hie gjin werwurd mar hij begong oer de leeftyd

"Minsken yn de 60 en jonger hoege gjin E-bike',

wie syn nije argumint

"Ik bin 70 west', ferdidigje ik mij ek noch.

Hij sjocht mij oan, of wol der sizze, dat liichst

en foardat der wer in argumint betinkt

set ik myn E-bike yn de turbo.

100 meter fierder hear ik him noch praten en roppen....

Kieze

 

It is hjerst

wij binne op it Bildt

it lân is griis

it waait hurd

de loft is driigjend

wij stean op in krúspunt

kieze

'houten urnen' of 'uitvaartkisten'

Wij gean rjochtôf

Net dit dan dat

Claw Boys Claw haw yn de planning foar sneon

In lêste optreden hjir yn de buert

Spitich, dat ik dan net nei Blackboxred kin,

tink ik at it programma fan DeBeatirks bekend is

En dan komt tongersdei dat berjocht

 

Dus gelyk nei de mailboks foar it berjocht oer BlackboxRed yn DeBeatriks

Hoera, noch net fol dus......

De polder

 Ik haw nea echt neitocht

hoe't de minsken yn de jierren 50 yn de polder terjochte komme.

Sa tusken neus en lippen wol ris wat heard 

mar gjin goed byld

Ik haw it boek fan Eva Vriend thús 

en lês dat mei in protte ynteresse

Wat in proses hat dat west.

It Ryk dat alles bepaalde dêr.

Hoe't it der útkomt te sjen

hokker minsken der wenje meie

en de ynrjochting fan de doarpen

Wij binne sneintemiddei

bij in prachtich konsert fan Syb van der Ploeg en Maarten Peters 

Plak fan barren is de Filmtsjerke yn Aldeholtwâlde. 

Sij dogge it repertoire fan Simon en Garfunkel. 

Moaie stimmen en muzyk, 

nijsgjirrige ferhalen en in sfearfolle lokaasje.

Wij seagen dit foar de twadde kear en it wie wer geweldich

Slachterin

Pakesizzer Nyck en ik sille meidwaan oan de Slachterin. 

5 kilometer is it doel 

want dy ôfstân is foar in jonkje fan 7 lang genôch 

en foar in pake fan 71 soms te lang. 

Wij hawwe in taktysk plan. 

Sa'n trije kilometer wat lykop drave 

en dan soe Nyck mei syn enerzjy foar syn eigen kânsen gean kinne. 

It plan doocht, de útfiering net. 

Nei 100 meter fanôf de start draaf ik allinne e

n sjoch yn de fierte it griene sjurt earst noch wol,

mar al gau net mear. 

Wat in toptiid, in moaie medalje om (hij is 2de fan de kategory ûnder de 40) 

en dan minuten lang wachtsje op pake. 

Mar dy is ek dik tefreden mei syn tiid. 

Underweis wetter krigen fan Brecht en op de meet Samme, Nyck en Brecht as supporter. 

Fan de jongste pakesizzer Syb (3) de ynspirearjende fraach.

 'pake, waarom ga je zo langzaam'. 

Dêr haw ik gjin antwurd op. 

Foto's fan Jellie Holtrop en Samme Hofstra

Wat in dei sa'n draverij

Wachtsje op it startsinjaal

20 meter nei de start rinne wij noch bijelkoar

Nyck as earste op Littenserbuorren

Brecht jout wetter oan wylst op de Slachte.....

wylst Nyck al hast mei syn medalje om siet 

Myn fanklup stiet op de meet

 

Imke Klaver

 

Op in moaie dei yn septimber fytse wei efter Hearrenfean

en komme telâne op it Imke Klaverpaad

In fytspaad fan sa'n 3 kilometer

Imke Klaver seit mij neat

dus sykje ik it thús op

Tafallich, echt tafallich praat ik mei Lút Zijlstra

oer in bepaald boek en hij jou oan dat hij in moai boeke hat oer

Imke Klaver

In boeiend boek oer hurd wurkje begjin 1900.

De arbeiders dy't alles oanpakten om mar bôle op de plank te krijen.

Hurddrave

Sneon wie de Kûbaarder hurdrindei

In stoarmeftige hurde wyn.

Dat is net de reden dat ik net meidoch.

De 5-kilometer is in op-en del baan

en dat liket mij psygologysk net goed ta 

om as trage draver elkenien tsjin te kommen.

Nyck en Samme dogge wol mei.

Sij wurde earste en twadde op de kilometer.

Sneon sil ik yn Wommels mei Nyck de 5 kilometer drave.

Alteast wij starte tagelyk mar ik frees dat ik him dêrnei net mear sjoch

Syn earste 5 kilometerrin yn wedstriidfoarm en myn twadde 

Ansichtkaart

Sa't jim witte haw ik in iensidige korresponsinsje

mei in âld- Wommelser dy't no yn Manchester wennet.

Iensidich omdat hij mij regelmjittich kaarten stjoert

mei moaie printen.

Koartlyn skille hij  hij mij en joech oan dathij yn Nederlân wie

Hij wol graach efkes mei jim yn de kunde komme

Sa sit hij dyselde middei bij ús oan de tee,

mei in famyljelid

Hij woe syn famylje syn bertedoarp sjen litte

en lit merkbite dat hij noch hiel wat fan it âlde Wommels wit

en de aktualiteit fan no folget.

Hiel bijsûnder dat wij sa efkes tsjinoer elkoar sitte

en elkoar yn de eagen sjen kinne

It lit him riede, mar ik krige dizze wike wer in moaie kaart

fan in doarp dat mij tige nei stiet

Yn Hichtum binne in soad oare bewenners, 

sûnt wij dêr wennen oan 1982.

Mar yn dit wyte húske oab de feart 

wenje Jan en Griet Kooistra noch wol altiten

Wij hawwe lêsten noch efkes bijpraten

Meindert

2032 dagen hasto libbe.

Dy earste dagen fan dyn libben 

wiene tagelyk de lêste dagen fan dyn libben.

Do wiest in "lief zorgenkind" sa stiet der yn de adfertinsje 

fan begjin maaie 1961.

De rou-adfertinsje...

Wat dy soarch spesifyk west ha, wit ik net.

Oer de dea en de deaden waard net tefolle praten. 

Seker net mei bruorren fan 6 en 8 jier.

Stil, swije, dat is better, 

miskien giet dat aaklike gefoel fan gemis dan oer.

Dat aaklike gefoel is nea oer gien yn ús húshâlding.

It hat in stimpel drukt, 

it hat syn spoaren efter litten

Wie der in skuldgefoel bij myn âlders, 

omdat se net goed op him past hiene?

Wie it wol ferstannich 

om ien dei nei de ferhuzing fan de Hofkamp nei de Molewâl 

in jonkje fan 5 jier op syn autoped boartsje te litten 

flak bij de grutte feart?

Of hawwe se wylst se drok mei it útpakken dwaande wiene

 tsjin mij (6 jier) of myn broer (8 jier) sein: 

let jim wat op Meindert

Wij hawwe it der nea oer hân, 

want ja stil en swije dat wie better.

Op 5 oktober 2025 hiesto 70 jier wurden.

Op dy dei is it 23541 dagen lyn datsto ferdronkst yn de Boalserter Trekfeart.

23541 dagen dy't ik wol libbe hast en do net. 

Ik kin der betiden net bij.

Wat hie der fan dy wurden, 

wat hasto allegear mist, 

dat binne fan dy fragen dêr't ik gjin antwurd op krij.

Hiesto fuotballe en keatst 

of wiesto mear fan it fiskjen en aaisykjen?

Hiest in boekewjirm wurden 

of in handige Harry. Of beide?

It útgean, wille meitsje, efter de froulju oan, 

reizgje, in gesin stichte do bist der net oan ta kommen

Sa no en dan sjoch ik bij dyn stien op it tsjerkhôf yn Wommels.

Nea haw ik oan dyn jierdei tocht.

Ik moast sels opsykje wat dyn bertedatum wie.

Dit jier fier ik dyn 70ste jierdei 

ek al hast al 65 kear dyn jierdei net fiere kinnen

Werom sjen

Foar Diggelfjoer op paad foar in nije rubryk

Weromblik mei in eardere pleatslike ûndernimmer.

As earste like Nanne Stienstra, 

de eardere garaazjehâlder mij wol wat.mij wol wat.

It stikje yn Diggelfjoer kinne jim hjir ûnder ek lêze

Myn romte is (helaas) beheind ta ien side, 

wylst der wol trije siden fuld wurde kinne.

In inkel stikje oer it weromsjen mei Nanne en Doet,

dat net yn Diggelfjoer stiet,  stiet hjir ûnder

1.

Op de fraach wannear de elektroanika syn yntrede docht seit Nanne:

Tjalling Reitsma, de slachter, is de earste 

dy't in auto hat dy't ik yn ûnderhâld krij mei elektroanika 

It is in Ford Sierra, dy sjocht der sa út

It sil dus yn of nei 1982 west ha

2.

Benzine op de bon.

Yn 1973 is de benzine in skoftke op de bon,

fanwege spul yn it Midden Easten

Dat betsjutte foar pomphâlder Stienstra ek in gedoch.

At er wer safolle bonnen binnen krigen hat

moat hij se bij it belestingkantoar yn Harns ynleverje

en dêrnei komt der wer in tankwein lâns.

3.

De foto yn Diggelfjoer is fan 1981,

at djipriolearing oanlein wurdt.

"Dat hat flink jild koste", seit Nanne Stienstra no

4.

"De koplampen doge net" seit Nanne oer him sels.

Hij bliuwt yn autotaal sprekken at hij bedoelt

dat syn eagen bliuwend minder wurde

5.

De branwarauto is yn ûnderhâld bij Stienstra.

At it sa fier is foar in beurt

is der in spesifike reperaasje nedich.

Dat moat lykwols yn Snits dien wurde bij de spesjalist.

Yn oerlis mei gemeente bart dat, 

sadat yn gefal fan in brân in oar korps helpe kin.

Dy nacht giet it alarm ôf.

"Bliksikater brân, hoe moatte wij dat no ha", tinkt Nanne gelyk

Hij springt yn syn VW bus en riidt nei de brânwachtgaraazje

wêr't ferbaasde kollega brânwachtmannen harren ôffreegje wêr't de auto is.

Der stiet noch in los karke mei wat slangen

dy hawwe se efter de VW bus koppele

en op nei de brân.

bij Anne Lanting op de Slachte stiet wat heaguod bûten yn de brân

en wurdt blust troch de ymprovisaasje brânwacht

6

Bij reperaasjes giet de eigen middenstân foar.

At bijgelyks Ruiter syn SRV karre stikken is,

soarget Nanne der foar dat dy earst klear makke waard 

al is it trochwurkjen oant nachts twa oere ta

7

Nanne is earst feint bij Douma..

Doe't hij it oernommen hat, hat ek hij altyd in feint yn tsjinst hân.

Wol ferskillende.

8.

Op de Facebook side fan Wommels troch de tiid stiet de ûndersteande  foto.

Auto's dy't oan de Terp stean mar bij de garaazje heare

It stikje yn Diggelfjoer

Bolwerk 50 jier

 

Yn it Atrium yn Snits is in  útstalling oer 50 jier Bolwerk. 

Wol aardich om wat herinneringen op te heljen oan de hân fan kranteknipsels en posters. 

Myn eigen argyf seit dat ik sa'n 125 bands/artysten dêr sjoen haw. 

De measten fanôf 2010 doe't ik yn myn twadde jeugd kaam. 

Dit jier sit ik op 9 bands en it jier is noch net om. 

Der is mij in soad bij bleaun, 

mar mei Pro-Pain (dêr twa kear sjoen) kinne wij (Tsjeard en ik) altyd goed út de fuotten.

1970

 

Hjir gean ik de kommende dagen oer neitinken

1970 

wat wie doe myn libben

16 jier

Genoeg

Wij  hawwe op "Genoeg" in abonnemint.

In fearnsjierblêd mei safolle ynspirearjende ferhalen, 

moaie reportaazjes en sinfolle tips

Net dat it troch dat blêd komt mar ek troch oare dingen 

sko ik hieltyd mear fuort

út myn fêste patroanen en keuzes

en sykje mear nei en fyn mear sinfolle aktiviteiten

Ek myn boekenkar ferskood  wat fan trillers 

nei nijsgjirrige lytse en grutte biografien

It betsjut wol dat ik iets mear op mijsels bin,

dat ik hieltyd mear mij sels bin.

Keihurd

 

Keihurd, sa hjit it festival yn it Bolwerk yn Snits hjoed

8 bands mar leafst fanôf 16.15 oere

Ik pak de earste trije bands mei

Hearlik!

Hardrock mei PALE

Trash-metal mei Disintegrate

Punk mei Intoxication

Ik hie de eardopkes mei en moast se dizze kear ek brûke

Stop

 

It is wat mei al dy dyk opbrekkens bij ús yn de buert

Bij Easterein, bij Rien en bij Itens

No koe ik altyd wol troch Itens fytse

mar ynienen hawwe se de boel hermetysk ôfsletten.

Miskien dat je mei keunst-en fleawurk

krekt troch de berm kinne

mar mei myn swiere fyts liket mij dat net in goeie opsje.

Spitich dat se oan de ein fan de middei net wat iepener meitsje

Brân

De froulju nei de Jouster merke

en ik in dei mei Syb.

 It is wer in moaie dei mei him

Sljocht op bisten en de fearkes dy't hinnen ferlieze

Bij Lucas in tûke stoofparreplukker

en in kastanje ûnder in beam komt yn de tas

Mar it moaiste is op it begjin fan de middei

Hij boartet mei syn brânwarauto

en ropt ynienen "der is brân"

Yn myn entûsjasme rop ik: 

ja, der stiet in buorkerij yn de brân, wij moatte der hinne"

Dat is net oan dovemansearen rjochte.

hij draaft nei de garaazje

docht syn tinkbyldige learzens oan,

lûkt syn tinkbyldich pak oan

en set syn tinkbyldige helm op.

Ik sil nei de fyts,

mar hij sommeart mij ek dat selde te jaan.

Dus learzens oan, it swarte pak oan en de helm op.

Ik fyts hij hat de auto yn de hân mei de sirene oan.

"wêr is de buorkerij"

ik kies foar de pleats dy't it tichtst bij stiet

en sa fytse wij rjochting de Reuzepôle

"Sjoch de hynders binne der al út en de kij rinne ek al yn it lân",

meitsje ik him wiis.

De sirene giet út

want wij kinne net yn de pleats,  jou ik oan, want dêr is it te waarm

"It is klear sis ik dan" en dat fynt hij gelokkich ek.

Wij fytse it trekpaad noch efkes om

en fytse fansels ek efkes bij de brânwargaraazje lâns.

Frouen

It is tafal dat ik twa boeken oer frouen tagelyk lês.

It hinget der soms fan ôf wannear in boek beskikber is yn de byb.

Totaal ferskillende boeken

Ik  mei se net fergelykje

Ik doch it al.

Powerfrouen giet oer sukses. 

Sichtber sukses yn de muzyk

In wrâld fan kontrakten en jild.

Genietsjend fan de rom en de ear

Mar soms ek teloarstelling at it oer is.

Yn it boek giet it oer sa'n 70 frouen 

lykas Anouk, Conny Vandenbos, Bojoura, Meau en Froukje

In boek dat ik reedlik gau út haw 

en wat net hingjen bliuwe sil yn myn tinzen

Bij 'Striid sûnder ein" is dat wol oars.

Wat wurdt it libben fan Trui Jentink prachtich beskreau troch Itty Sluis

Wat in frou wie dy Trui, dochter fan in dûmny

Har hiele libben striid fiere

Stride tsjin har heit en mem

stride tsjin ûnrjocht binnen en bûten de tsjerke

stride tsjin dranksuchtige mannen

stride tsjin boeren en feanbazen omdat dy harren macht brûke

Opkomme foar de armen, de wezen en foaral de froulju.

Dy âlde Fryske taal dêr wurd ik ek sa bliid fan

Wat in moaie wurden , wat in prachtige sinnen, wat in boeiende taal

Genietsje

 Ik stean bij it stek fan de basisskoalle

en wachtsje op Samme en Nyck.

Oeral stean heiten, memme, pakkes en beppes.

Neist mij stiet in "stokâlde"frou

alteast dat liket mij sa ta.

"Op wa  wachtsje jo", freegje ik

"Op net ien, ik kom hjir tafallich lâns 

en stean no te wachtsjen oant ik der echt lâns kin.

Mar ik genietsje fan al dy bern, dat lûd, prachtich toch".

"Jo ha gelyk, sa haw jo it seker net meimakke"

"Nee, wij moasten ús mar rêde út skoalle,

kilometers troch in lân want ik wenne op in buorkerij"

82 is se, en se wachtet krekt sa lang dat de bern allegear fuort binne.

Moai toch, in healoerke genietsje fan út skoalle kommende bern

Yn ús Gebou

It is net samar in affysje

Doug Sampson as drummer en eks lid fan Iron Maiden

yn ús Gebou yn Spannum

Ik gean der net foar Doug hinne,

ik bin net fan "persoansferhearliking"

Yn de jierren 70 sit hij twa jier bij Iron Maiden

en sit hij letter yn Airforce.

Airforce spilet, Airforce stoppet, Airforce spilet wer

It is in ferhaal foar de boeken

hoe't se yn Spannum bedarje

Prachtich.

Trije Ingelske mannen op leeftyd 

en in jonge sjonger út Portugal

De band docht  syn bêst.

In sjonger mei in strôt 

dy't mij tinken docht oan it lûd fan Iron Maiden.

Prima lûd

Dy "fernneamde" drummer dy sit aardich ferskûle 

efter syn trommels en bekkens

Oars rint er wol in sjonger of gitarist foar him lâns.

De band docht syn bêst, spilet ek prima,

mar earlik, 

der binne te min minsken dy't meigean yn in wyld feest

Foaral sjen, wat bewege, klappe en op tiid  ien drinke en smoke

Spitich dat de sfear der net echt ynkomt

d' Roels trapen ôf en dat is in lekkere sound

In noflike jûn yn Spannum

Thúsakku

 Ik wit it

de saldearingsregeling is der noch 

en dy ferreknt de stroom dy't ik brûk mei de stroom dy't ik opwekt haw

Mar, yn 2027 wurdt it oars

Ik fyn it in moaie útdaging om no al wat mei de stroom om te gean

al is der gjin salderingsregeling

Dit apparaat slacht automatysk myn oerstallige sinne-enersjy op

sadat ik it brûke kin at der gjin sinne is.

2,5 kilowatt kin der opslaan

en miskien is dat genôch foar in jûn en in nacht

It is fia in app moai te folgjen

enit systeem kin útwreide wurde mei in twadde of tredde boks.

Oranjewâld

 

Snein in rûte fytst tusken de Jouwer en Hearrenfean

Dan kom je ek bij Oranjewâld lâns

In moaie beam en in moai byld kin ik net samar foarbij fytse

In spotprint?

 

Yn Kompjûter Idee kom ik dit spotprintsje tsjin.

It soe grappich wêze kinne en dat is it ek

mar is de wurklikheid al net sa?

En dat is net grappich liket mij sa ta

Moaie dei en jûn

Sneon in bannige mar moaie dei

Op it "ofsluten park "bij de triatlon op de fytsen passe.

Prizige fytsen, dat is wol te sjen

Moai om op it park te stean en de emoasjes te sjen.

Ynspanning en teloarstelling,

dy ferflokte hurde wyn, dat kâlde wetter

dy aaklike bui tsjin trijen

mar úteinlik de foldwaaning.

In swimmer dy't syn draafskuon oandwaan wol

mar dêr wol hiel lang wurk mei hat

en ik hast fan doel wie de skuonleppel op te heljen

De fytser dy't sûnder sadel weromkomt

en 7 kilometer sûnder sadel fytst hat

( Klaas de Jong fynt letter op de Littenserbuorren in sadel

en bringt it bij ús )

Dy iene atleet dy't syn foarnamme alle ear oan docht

en wêrtorch wij it âlde rymke mar efkes fan stâl helje

.........ben je boos,  pluk een roos
zet hem op je hoed,
dan ben je volgend jaar misschien goed)

Ik tink net dat hij wer komt,

want neat wie goed.

Fan en oer al dy oare atleten gjin kwea wurd.

In moaie dei

Doe moast de jûn noch komme

Mei de bus nei Ljouwert 

om de iepening fan poadium DeBeatriks mei te meitsen

en te harkjen nei trije hearlike bands

Vanity Box hat wol in hiel moai nûmer om nochris te hearen

Ingelsk

 Ik fyts it doarp troch

sa't ik wol faker doch.

Efkes de fuotten strekke en om mij hinne sjen.

En.......

argewaasje hawwe oan al dy buskes en frachtautos 

mei dy freeslike Ingelske teksten

Earmoede en de diakonij

 

Ik lês wer in moai boek

In boek dat ynsjoch jout oer earmoede en stânsferskillen

Yn de greidhoeke, wêr't de boeren de baas binne

en de lege feanen wêr't de feanbaas beslist oer libben en dea.

In boek oer de ûndergeskikte rol fan de frou yn de 19-de iuw

Geertruide is dochter fan in dûmny yn Nijlân

en sij sjocht it mei ôfgrizen oan

Sa sil se har paad sykje om de rol fan de frou te feroarjen

Ik bin healwei en lês it mei ferbjustering