Stikelaaien

 

Aaien helje op Bonkwert

Fytsen

 

Fytsen bij skoalle, neat bijsûnders, 

soene je sizze.

Fytsen fan bern, 

wêrfan de âlders net mei de auto nei skoalle ride.

Neat bijsûnders, dy fytsen yn it rek.

Of toch.

Der stean sa'n 25 fytsen op de rige

allegear mei it foartsjil yn it fytsenrek 

Allegear? Nee net allegear.

Twa binne gelyk omdraaid en stean klear om gelyk fuort te fytsen.

Tafal? Nee!

It binne de fytsen fan pakesizzers Samme en Nyck.

Dy dogge dat thús sa, bij ús op de oprit, bij it swimbad 

en dus ek bij skoalle.

Dat ha se leard fan harren heit

en dy hat it wer fan syn heit.........

Tekst

Rou-adfertinsjes is boeiend lêsfoer.

Net om al dy boatsjes, frachtauto's en fûgels 

dy't wat sizze oer it wurk of de hobby fan de meast man

Nee. it binne de teksten dy't mij boeie.

Hjoed wer sa'n moaie sin  boppe in adfertinsje

 

As de dei fan hjoed moarn net hellet, bist ûnderweis nei wêr't it begjint

Wykein

Foar de twaentweintichste kear hawwe wij in famyljewykein hân.

Altyd it wykein nei Pinkster komme de seis bern 

fan Tjeerd Holtrop en Annie de Weerd bijelkoar.

mei oanhang, 

mei bern  en oanhang,  

mei pake en beppesizzers soms ek al mei oanhang

en mei tal fan hûnen.

De earste kear yn Hoogerheide noch yn tinten

no yn foukarren, karafans, kampers en noch wat tinten

wêrfan in inkele op ynstoarten stie

en dat ek die 

nei dy ien groue bui freedtenacht.

Sa'n 75 wiene der sneontemiddei yn Elsloo

doe't de famyljeleden sels de pizza's bakten.

It roljend karke

 

In moai artikel oer de rollato yn it AD,

it helpmiddel om mobyl te bliuwen

Big four

Myn each falt op in berjocht yn de krante oer de Big Four.

De Big Four spotte bij Tsjerkwert?

Dat is in oare Big Four dan dy't ik yn de holle haw.

Ik haw myn bêst dien om de echte Big Four te sjen

en dêr foar moast ik nei Amsterdam, nei Nijmegen en nei Ljouwert

Metallica, Anthrax, Slayer en Megadeth, dat is de Big Four.

Dy spylje fêst net yn it lân bij Tsjerkwert

Trochsette

 Wêr is begong dat fûleindige ferlangen fan Jellie 

om de 11 stêdentocht te fytsen op pinksternoandei?

Se jout sels dizze wike it antwurd.

"It is 50 jier dat ik út Israel werom kaam

en dy simmer de 11 stêdentocht fytste 

mei heit, broer en dêr in freon fan.

Op in gewoane fyts, op in gewoane sneon,yn gewoane klean.

It wie ôfsjen, mar it slagge"

Dêr moat it yndie begong wêze

en hat it him trochsetten 

neidat ik yn har libben kaam

en wij meardere kearen de tocht fytst hawwe

Ik bin op tiid opholden

mar Jellie net.

Ek yn 2024, nettsjinsteande in lichem dat net fit is 

hat se it wer presteard.

Respekt foar it trochsetten.

en mei in laits oer de finisjstreep

25 registrearde tochten fanôf 1977

5 fan earder dy't net registreard  binne

en ien yn 1974 op dy oare dei

Swannen

 Ik rin fannemoarn oer Skrok

en sjoch dêr de twa swannen.

Ik neam se it aai- of âlderleas pear.

Sa sjocht it der út

Oeral sjogge je in swan op it nêst

mei in tasjoggende swan deunbij.

Ik tink dat it hjir ek sa west hat.

Moannenlyn wie der in nêst 

bij ien fan de fytsroasterbrechjes.

It like mij net in goed plak ta, 

sa flak tsjin it paad oan.

At se fûl op de aaien binne, 

blaze se se raar spul.

Fan de iene op de oare dei wie it nêst fuort

en lei der flakbij yn it lân in nêst

Ik tink dat it nêst troch minskehannen is ferpleatst

fanwege de feilichheid.

Ferstannich tink ik dan.

Net leuk, tink de swan dy't er opsitte moat

Hjir settelje ik mij net.....

It nêst liket noch altiten leech

en de twa swannen sitter der wat bij

as in aaileas pear

Op Skrok, sûnder in eigen nêst

Bij it Ienzer tunneltsje

60 kilometer

 

Ik fyn it in opmerklik ferkearsboerd op dit plak.

Op dizze side fan it boerd stiet dat de 60 kilometersône foarbij is

en dat je dus flugger ride meie.

Op de oare side stiet dat je 60 ride meie, at je dizze kant útkomme.

De betonreed foarbij dit boerd rint noch 65 meter troch oan de bocht ta.

dêrnei ride je it hiem op fan boer Dijkstra yn de Súdhoeke.

"Remje yn ferbân mei in net oersichtlike bocht"

dat soe better wêze.

De list fan it NK

Pinkstermoandei is it de Bûnspartij.

Dat neame se tsjinwurdich it NK foar senioren

Ik sjoch de list troch.

Der falle mij twa dingen op,

yn it earste plak

Wommels docht net mei.

At dat faker sa west hat, 

sûnt ik der hinne gean

wit ik sa net.

It is wol djiptryst foar in keatsdoarp

It twadde dat mij opfalt is de omskriuwing 

fan in oantal plaknammen

Yndie it wurdt tiid foar in nije wepstek 

foar 130.000 euro at ik it goed begryp

Bûterblommen

 

Ik mocht woansdei wer oppasse.

Pechfûgel Syb mei syn fuotsje yn it gips

liet him noflik rûnride yn Skearnegoutum.

Pake plukte wat bûterblommen

en hij mocht se oerbringe nei hûs.

Twa jier en noch gjin memmeblommedei gefoel.

10 meter fierder as dizze foto

smiet hij se oerboard.

De bôle dy't hij yn de oare hân hie trouwens ek.

Frysk bernediktee

Ik mocht hjoed op stap mei Jelske

ús âldste pake/beppesizzer.

Tolve jier (foar de bus hjoed noch 11)

en sij mei meidwaan oan de finale yn Ljouwert.

Jelske praat mij de earen net fan de holle,

dat dochst se nea,

sij praat net om it praten

sij lêst leaver.

Dus sitte wij  hinne yn de bus, 

bij it wachtsjen foarôf 

yn it skoft

 

en yn de bus werom te lêzen.

In moaie erfaring foar har

yn de grutte Steatenseal mei sa'n 30 oaren.

Alle winners en trije dy't er boppe-ut stutsen.

Jelske komt thús mei in moai boek

yn it Frysk en Ingelsk

want dy lêste taal "kin ik noch better" seit Jelske

wij koene it fanút in sealtsje heare en net echt sjen

de trep derbij foar de groepsfoto

Snits yn Wandrer

 

Dit is Snits

Totaal 226 kilometer oan diken, fytspaden en stegen.

Myn doel wie om 75 % te fytsen

Dat is slagge, 

Alles wat blau is haw ik fytst yn Snits

Dat is 75,2 % is 170 kilometer

Alles wat noch read is

is de restearjende 25 %.

Dêr richtsje ik myn oandacht  earst  net op.

Frjentsjer is it folgende grutte doel

Ja, Wandrer it is in pracht programma

om te bewegen mei in doel

Bildtstar yn Lollum

 

Dat de seal no figuerlik yn fjoer en flam stie sneontejûn yn Lollum

dat is net wier.

Dêr wiene der te min minsken foar om wat entûsjasme te krijen.

Spitich, dus mar letterlik fjoer, flam en reek

Wij hiene in moaie jûn bij Bildtstar

Frjemde fûgels

Al wer op de gewoane fyts

In slach troch de wâlden fanút Garyp.

In goeie kar efterôf want

wij fytsten aardich yn de lijte 

yn dat sm^k, skaad en beamtegrien.

En wij komme lâns Middelbuorren

Bij Middelbuorren stiet dit prachtich gekleurde elektrisiteitsgebou. 

Alteast, ik nim oan dat dy steurende warskôgingsbuordtsjes 

der net  foar de lol opsitte. 

Wat in moaie kleuren en in goeie tekst. 

Wij fielden ús suver oansprutsen

Wielervrienden bijwurke

It oantal gemeenten yn Nederlân wikselt wol gauris.

De weryndielingen binne hjir foarbij,

mar fierderop yn it lân is it noch geande.

Der soene no sa'n 343 gemeenten wêze kinne.

Ik sjoch dat oan myn akkount op Wielervrienden

dy't bijhold yn hokker gemeenten ik fyts en hoefolle dat no totaal binne.

Ik bin sljocht op dit kaartsje

neidat wij 5 dagen fytsten yn in gebied

wêr't wij net safolle west hawwe

Mar leafst 25 gemeenten kin ik bijskriuwe nei dy 5 dagen

71 % fan alle gemeenten hân,
dat is 244 oan no ta

Hjir en dêr noch wat gatten

mar dat is goed, 

dan bliuwt der in útdaging, 

in reden om te fytsen

Rûntsje Limburg Brabân

 

Dit wie ús rûntsje yn de twa súdlike provinsjes

Fan sneintemiddei oan tongersdeitejûn fytse wij

mei prachtich waar in ferrassende rûte.

De rûte waard wat bepaald troch de frije gastadressen

bij Vrienden op de Fites.

Sliepe bij Fletscher yn Sittard

yn Budel- Schoot, yn Boxtel, yn Wijchen en yn Haelen

Totaal sa'n 400 kilometer

Fletscher hotel en Fortuna Sittard stadion

Stadion

In Limburge folkssjonger

Alles wyt yn Thorn, útsein de tsjerke

Weert

in stikje Belgie

it "Dodenpad" op de grins mei Belgie

Fytsretonde bij Eindhoven

In nacht sliept yn Lennisheuvel

Den Bosch

In moai p[lakje efter yn de tún

Bieëgdje

 

De twatalichheid is der gelokkich ek yn Limburch.

It doarp Beegden hjit Bieëgdje.

Dat is noch net sa'n maklik wurd om út te sprekken.

In pleatselike man dy't syn hûn útliet

hat it foar sein en fertelde dat ek hjir in flinke diskúsje west hat

at de Limburgse namme no bopp of ûn deroan stean moast